ಚಾರ್ಮಾಡಿ: ಕಾರು ಬೆಂಕಿಗಾಹುತಿ

ಕೊಟ್ಟಿಗೆಹಾರ: ಇಲ್ಲಿನ ಚಾರ್ಮಾಡಿ ಘಾಟಿಯಲ್ಲಿ ಸೋಮವಾರ ತಡರಾತ್ರಿ ಚಲಿಸುತ್ತಿದ್ದ ಕಾರಿನಲ್ಲಿ ಬೆಂಕಿ ಹೊರ ಹೊಮ್ಮಿದ್ದು, ಸುಟ್ಟು ಕರಕಲಾಗಿದೆ.

ಮಂಗಳೂರಿನ ಜೋಕಟ್ಟೆಯ ಆತೀಫ್‌ ಹಾಗೂ ಅವರ ಕುಟುಂಬದವರು ಚಾರ್ಮಾಡಿ ಘಾಟ್ ಮೂಲಕ ಬೆಂಗಳೂರಿಗೆ ಹೋಗುತ್ತಿದ್ದಾಗ ಜೇನುಕಲ್ ಅಣ್ಣಪ್ಪ ಸ್ವಾಮಿ ದೇವಸ್ಥಾನದ ಬಳಿ ಕಾರಿನಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ಕಾರಿನಲ್ಲಿ ಆತೀಫ್‌, ಅವರ ಪತ್ನಿ, ಮಗಳು ಹಾಗೂ ಮಗಳ 8 ವರ್ಷದ ಇಬ್ಬರು ಹಾಗೂ 3 ತಿಂಗಳ ಮಕ್ಕಳು ಸೇರಿದಂತೆ ಒಟ್ಟು ಐದು ಜನ ಇದ್ದರು. ಎಲ್ಲರೂ ತಕ್ಷಣವೇ ಇಳಿದು ಹೊರ ಬಂದಿದ್ದು, ಅಪಾಯದಿಂದ ಪಾರಾಗಿದ್ದಾರೆ.

ಸ್ಥಳಕ್ಕೆ ಬಣಕಲ್ ಪೊಲೀಸ್ ಸಬ್‌ ಇನ್‌ಸ್ಪೆಕ್ಟರ್ ಗಾಯತ್ರಿ, ಸಹಾಯಕ ಸಬ್‌ ಇನ್‌ಸ್ಪೆಕ್ಟರ್ ಟಿ.ಕೆ.ಶಶಿ, ಸಿಬ್ಬಂದಿ ರಘು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಬಗ್ಗೆ ಬಣಕಲ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.