ಕಡೂರು | ಮೆಸ್ಕಾಂ ಸೆಕ್ಷನ್‌ ಆಫೀಸ್‌ ಆರಂಭಿಸಲು ಯತ್ನ: ಶಾಸಕ ಕೆ. ಎಸ್‌.ಆನಂದ್‌

ಕಡೂರು: ಸಿಂಗಟಗೆರೆ ಭಾಗದಲ್ಲಿ ವಿದ್ಯುತ್‌ ಸಮಸ್ಯೆ ಬಗೆಹರಿಸಲು ಮೆಸ್ಕಾಂ ಸೆಕ್ಷನ್‌ ಆಫೀಸ್‌ ಆರಂಸಲು ಪ್ರಯತ್ನಿಸಲಾಗುವುದು ಎಂದು ಶಾಸಕ ಕೆ.ಎಸ್‌.ಆನಂದ್‌ ಭರವಸೆ ನೀಡಿದರು.

ತಾಲ್ಲೂಕಿನ ಸಿಂಗಟಗೆರೆ ಗ್ರಾಮದಲ್ಲಿ ಮಂಗಳವಾರ ‘ಶಾಸಕರ ನಡೆ, ಗ್ರಾಮ ಪಂಚಾಯಿತಿ ಕಡೆʼ ಕಾರ್ಯಕ್ರಮದ ಅಂಗವಾಗಿ ಹಮ್ಮಿಕೊಂಡಿದ್ದ ಜನಸಂಪರ್ಕ ಸಭೆ ಉದ್ಘಾಟಿಸಿ ಮಾತನಾಡಿದರು.

ಸಿಂಗಟಗೆರೆಯು ಕ್ಷೇತ್ರದ ಅತಿ ದೊಡ್ಡ ಗ್ರಾಮ ಪಂಚಾಯಿತಿಯಾಗಿದ್ದು, ಒಬ್ಬರೇ ಲೈನ್‌ಮನ್‌ ಸುತ್ತಮುತ್ತಲ ಹಳ್ಳಿಗಳ ವಿದ್ಯುತ್‌  ಸಮಸ್ಯೆ ಬಗೆಹರಿಸಲು ಶ್ರಮಿಸುತ್ತಿದ್ದಾರೆ ಎನ್ನುವ ಮಾಹಿತಿ ಇದೆ. ಒಬ್ಬರು ನಿರ್ವಹಣೆ ಮಾಡಲು ಕಷ್ಟವಾಗುತ್ತಿದೆ. ಮೆಸ್ಕಾಂ ಬೀರೂರು ಉಪವಿಭಾಗದ ಅಧಿಕಾರಿಗಳು ಪ್ರಸ್ತಾವ ಸಲ್ಲಿಸಬೇಕು. ಸಚಿವರೊಂದಿಗೆ ಮಾತನಾಡಿ ಸೆಕ್ಷನ್‌ ಆಫೀಸ್‌ ಆರಂಭಕ್ಕೆ  ಯತ್ನಿಸುವೆ. ಅಲ್ಲಿಯವರೆಗೆ ಸಾಧ್ಯವಿದ್ದಲ್ಲಿ ಹೆಚ್ಚುವರಿ ಲೈನ್‌ಮನ್‌ಗಳನ್ನು ನಿಯೋಜಿಸಿ ಎಂದು ಮೆಸ್ಕಾಂ ಎಂಜಿನಿಯರ್‌ಗೆ ಸೂಚಿಸಿದರು.

ಇದಕ್ಕೆ ಉತ್ತರಿಸಿದ ಮೆಸ್ಕಾಂ ಎಇಇ ವೀಣಾ, ಇಲಾಖೆಯ ಮಾರ್ಗಸೂಚಿ ಪ್ರಕಾರ 10 ಸಾವಿರ ಸಂಪರ್ಕಗಳ ಲಭ್ಯತೆ ಇದ್ದರೆ ಮಾತ್ರ ಸೆಕ್ಷನ್‌ ಆಫೀಸ್‌ ಆರಂಭಿಸಬಹುದು. ಇಲ್ಲಿ ಅಷ್ಟು ಲಭ್ಯತೆ ಇದೆಯೇ ಎಂಬುದನ್ನು ಪರಿಶೀಲಿಸುವೆ. ಹೆಚ್ಚುವರಿ ಲೈನ್‌ಮನ್‌ ನಿಯೋಜನೆ ಕುರಿತು ಹೊಸದಾಗಿ ಪ್ರಕ್ರಿಯೆ ನಡೆದಿದ್ದು, ಬೀರೂರು ಸಣ್ಣ ಉಪವಿಭಾಗ ಎಂದು ಕಡಿಮೆ ಸಿಬ್ಬಂದಿಯನ್ನು ನಿಯೋಜಿಸಲಾಗುತ್ತಿದೆ. ಶಾಸಕರು ಅಧೀಕ್ಷಕ ಎಂಜಿನಿಯರ್‌ ಜತೆ ಮಾತನಾಡಿದರೆ ಪರಿಹಾರ ದೊರೆಯಬಹುದು ಎಂದು ತಿಳಿಸಿದರು.

ಸಿಂಗಟಗೆರೆ ಸಾರ್ವಜನಿಕ ಆಸ್ಪತ್ರೆಯಲ್ಲಿ ರಕ್ತದೊತ್ತಡ ಪರೀಕ್ಷಿಸುವ ಯಂತ್ರ ಹಾಳಾಗಿದೆ. ಇಸಿಜಿ ಇದ್ದರೂ ಬಳಕೆ ಇಲ್ಲ. ವೈದ್ಯರ ಸೇವೆ ಲಭ್ಯವಿಲ್ಲ. ಆಂಬುಲೆನ್ಸ್‌ ಇಲ್ಲ, ಎಂಬಿಬಿಎಸ್‌ ವೈದ್ಯರನ್ನು ನೇಮಿಸಿ, ರಾತ್ರಿವೇಳೆ ವೈದ್ಯಕೀಯ ಸೌಲಭ್ಯ ಕಲ್ಪಿಸಿ ಎಂದು ಮಂಜುನಾಥ ಕೋರಿದರು. ಇದಕ್ಕೆ ಉತ್ತರಿಸಿದ ತಾಲ್ಲೂಕು ವೈದ್ಯಾಧಿಕಾರಿ ಡಾ.ಶ್ರೀನಿವಾಸ್‌ ಎರಡು ತಿಂಗಳಿನಿಂದ ಎಂಬಿಬಿಎಸ್‌ ವೈದ್ಯರು ಇಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಆಯುಷ್‌ ವೈದ್ಯರು ಕೂಡ ಸೇವೆಯಲ್ಲಿದ್ದಾರೆ. ಇಸಿಜಿ ಬಳಸಲು ಸೂಚಿಸಲಾಗಿದೆ. ರಕ್ತದೊತ್ತಡ ಪರೀಕ್ಷಿಸುವ ಯಂತ್ರ ಹೊಸದಾಗಿ ಕೊಡಿಸಲಾಗುವುದು ಎಂದು ವಿವರ ನೀಡಿದರು.

ಗ್ರಾಮದ ಕೆರೆಗೆ ಭದ್ರಾ ನೀರು ಪೂರೈಕೆಗೆ ಕ್ರಮ ವಹಿಸಬೇಕು ಎಂದು ಮನು, ಪ್ರಿಯಾಂಕ್‌ ಅರ್ಜಿ ಮುಖೇನ ಕೋರಿದ್ದರು. ಉತ್ತರಿಸಿದ ಶಾಸಕ ಆನಂದ್‌, ಈ ಕೆರೆಯು ಭದ್ರಾ ಉಪಕಣಿವೆ ಯೋಜನೆಯ ಮೂರನೇ ಹಂತದಲ್ಲಿ ಸೇರುತ್ತದೆ. ಎರಡನೇ ಹಂತಕ್ಕೆ ಸರ್ಕಾರವು ₹ 407 ಕೋಟಿ ಹಣ ಮಂಜೂರು ಮಾಡಿ ಶೇ 60ರಷ್ಟು ಕಾಮಗಾರಿ ಮುಕ್ತಾಯವಾಗಿದೆ. 2ನೇ ಹಂತದಲ್ಲಿ ಮಲ್ಲಾಘಟ್ಟ ಕೆರೆಗೆ ನೀರು ಬರಲಿದ್ದು ಅಲ್ಲಿ 0.22 ಟಿಎಂಸಿ ನೀರು ಸಂಗ್ರಹ ನಿರಂತರವಾಗಿ ಇರುತ್ತದೆ. ಅಲ್ಲಿಂದ ಈ ಭಾಗದ ಎಲ್ಲ ಕೆರೆಗಳಿಗೂ ನೀರು ಹರಿಯಲಿದೆ. ಇಲ್ಲಿ ಕಾಮಗಾರಿ ಅನುಷ್ಠಾನಕ್ಕೆ ಅಂದಾಜಿ ₹ 150 ಕೋಟಿ ಹಣ ಅಗತ್ಯವಿದ್ದು ಹಣ ಮಂಜೂರಾತಿಗೆ ಯತ್ನ ನಡೆದಿದೆ ಎಂದು ತಿಳಿಸಿದರು.

ಇಲ್ಲಿ 272 ಮನೆಗಳಿಗೆ ಇ-ಸ್ವತ್ತು ಇಲ್ಲ, ಇರುವ ಸಮಸ್ಯೆ ಬಗೆಹರಿಸಿ ಎಂದು ಕೆ.ಎಸ್‌.ಆನಂದ್‌ ಗ್ರಾಮ ಪಂಚಾಯಿತಿ ಅಧಿಕಾರಿಗಳಿಗೆ ಸೂಚಿಸಿದರು. ತಹಶೀಲ್ದಾರ್‌ ಸಿ.ಎಸ್‌.ಪೂರ್ಣಿಮಾ ಉತ್ತರಿಸಿ, ಇಲ್ಲಿ ಕಂದಾಯ ಉಪಗ್ರಾಮಗಳು ಮತ್ತು ಬಡಾವಣೆ ಅನುಮೋದನೆಗೆ ಪ್ರಸ್ತಾವ ಕಳುಹಿಸಲಾಗಿದೆ. ಇನ್ನು 2-3 ತಿಂಗಳಿನಲ್ಲಿ ಇ-ಸ್ವತ್ತು ಸಮಸ್ಯೆ ಬಗೆಹರಿಸಲಾಗುವುದು ಎಂದು ಮಾಹಿತಿ ನೀಡಿದರು.

ಶಾಲೆಗೆ ಹೊಸ ಕೊಠಡಿ ಮಂಜೂರು ಮಾಡಿಸಿ, ಬಸ್‌ ವ್ಯವಸ್ಥೆ ಮಾಡಿ, ಶಿಥಿಲ ಕೊಠಡಿಗಳ ದುರಸ್ತಿಗೆ ಕ್ರಮವಹಿಸಿ, ಕಲ್ಲೇಶ್ವರ ದೇವಾಲಯಕ್ಕೆ ಸೇರಿದ ಇನಾಮು ಜಮೀನುಗಳು ಸರ್ಕಾರಿ ಎಂದು ಪಹಣಿ ಬರುತ್ತಿದೆ, ಸರಿಪಡಿಸಿ ಎಂದು ಹಲವಾರು ಅರ್ಜಿ ಸಲ್ಲಿಸಿದರು. ಮುಜರಾಯಿ ಇಲಾಖೆಗೆ ಸೇರಿದ ದೇವಾಲಯ ಆಗಿರುವುದರಿಂದ ಆಸ್ತಿ ಸಂರಕ್ಷಣೆಗೆ ಇಲಾಖೆ ನಿರ್ದೇಶನದಂತೆ ರಾಜ್ಯದಾದ್ಯಂತ ಈ ರೀತಿ ಕ್ರಮ ವಹಿಸಿದೆ ಎಂದು ತಹಶೀಲ್ದಾರ್‌ ಉತ್ತರಿಸಿದರು.

ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಮಧುಮಾಲಾ, ಉಪಾಧ್ಯಕ್ಷೆ ಮಂಜುಳಾ, ಗಿರೀಶ್‌ ಆರಾಧ್ಯ, ರಮೇಶ್‌, ರಘು, ರವಿ, ಶಾಂತಾ, ಮಂಜುನಾಥ, ಶಾರದಾ, ಸುರೇಶ್‌, ಶಶಿಕಲಾ, ಪಿಡಿಒ ಲತಾ, ತಿಪ್ಪೇಶಪ್ಪ, ಗ್ರಾಮಸ್ಥರು, ವಿವಿಧ ಇಲಾಖೆಗಳ ತಾಲ್ಲೂಕು ಮಟ್ಟದ ಅಧಿಕಾರಿಗಳು ಹಾಜರಿದ್ದರು.