ಚಿತ್ರದುರ್ಗ: ‘ನಗರ ಸಾರಿಗೆ’ಗೆ ಬಡಿದಿದೆ ‘ಗರ’

ಚಿತ್ರದುರ್ಗ: ‘ಶಕ್ತಿ’ ಯೋಜನೆಯಡಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆಯ (ಕೆಎಸ್‌ಆರ್‌ಟಿಸಿ) ಚಿತ್ರದುರ್ಗ ವಿಭಾಗಕ್ಕೆ ₹ 177.33 ಕೋಟಿ ಆದಾಯ ಬಂದಿದೆ. ಆದರೆ ಬಸ್‌ ಕೊರತೆಯ ಸಬೂಬು ಕೋಟೆನಾಡಲ್ಲಿ ನಗರ ಸಾರಿಗೆಯ ಶಕ್ತಿ ಕುಂದಿಸಿದೆ.

ರಾಜ್ಯ ಸರ್ಕಾರದ ಪಂಚ ಗ್ಯಾರಂಟಿ ಯೋಜನೆಗಳಲ್ಲಿ ಒಂದಾದ ಶಕ್ತಿ ಯೋಜನೆ ಜಾರಿಯಾಗಿ ಜೂನ್ 11ಕ್ಕೆ ಎರಡು ವರ್ಷ ಪೂರ್ಣಗೊಂಡಿದೆ. ಈ ಯೋಜನೆಯಡಿ ಜಿಲ್ಲೆಯ ಸಾರಿಗೆ ಸಂಸ್ಥೆಯ ಬಸ್‍ಗಳಲ್ಲಿ 4.36 ಕೋಟಿ ಮಹಿಳೆಯರು ಉಚಿತ ಪ್ರಯಾಣ ಮಾಡಿದ್ದು, ₹ 177.33 ಕೋಟಿ ಆದಾಯ ದೊರೆತಿದೆ. ಆದರೆ ಈ ಯೋಜನೆಯಿಂದ ನಗರದಲ್ಲಿ ಸಂಚರಿಸುವ ವಿದ್ಯಾರ್ಥಿನಿಯರು, ಉದ್ಯೋಗಸ್ಥ ಮಹಿಳೆಯರಿಗೆ ಯಾವುದೇ ಪ್ರಯೋಜನವಾಗಿಲ್ಲ.

ಒಂದೂವರೆ ದಶಕದಲ್ಲಿ ನಗರ ಸಾರಿಗೆ ಸೇವೆಯು ನಾಲ್ಕು ಬಾರಿ ಉದ್ಘಾಟನೆಗೊಂಡ ಹೆಗ್ಗಳಿಕೆ ಇದೆ. ಒಂದೆರಡು ದಿನ ಸಂಚರಿಸಿ ಪುನಃ ದಾರಿ ಮರೆಯುವುದು ಮಾಮೂಲಿಯಾಗಿದೆ. ಇದರಿಂದ ನಗರ ವ್ಯಾಪ್ತಿಯಲ್ಲಿ ಆಸ್ಪತ್ರೆ, ಬಸ್‌ ನಿಲ್ದಾಣ, ರೈಲು ನಿಲ್ದಾಣ, ಮಾರುಕಟ್ಟೆಗೆ ಬರುವವರು, ಗ್ರಾಮೀಣ ಭಾಗದಿಂದ ನಿತ್ಯ ದುಡಿಮೆಗೆ ಬರುವ ಮಹಿಳೆಯರು, ಶಾಲೆ– ಕಾಲೇಜುಗಳ ವಿದ್ಯಾರ್ಥಿಗಳು ಗೂಡ್ಸ್‌, ಲಗೇಜ್, ಸೀಟ್‌ ಆಟೊ ಅವಲಂಬಿಸಿದ್ದಾರೆ.

ನಗರದ ವ್ಯಾಪ್ತಿ ವರ್ಷದಿಂದ ವರ್ಷಕ್ಕೆ ವಿಸ್ತರಣೆಯಾಗುತ್ತಿದೆ. ಕರುಣಾಕರ ರೆಡ್ಡಿ ವರು ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದ ಸಂದರ್ಭ ನಗರ ಸಾರಿಗೆ ಸೇವೆ ಅಸ್ತಿತ್ವಕ್ಕೆ ಬಂದಿತ್ತು. ಆದರೆ, ಕೆಲ ದಿನಕ್ಕೆ ಸೇವೆ ನಿಲ್ಲಿಸಿತ್ತು. ಹೀಗೆ ಮೂರು ಬಾರಿ ಮರು ಚಾಲನೆಗೊಂಡು ನಿಂತಿದ್ದ ಸೇವೆ ಕೋವಿಡ್‌ ಬಳಿಕ ಪ್ರಾರಂಭವಾಗಿತ್ತು. ಸರ್ಕಾರ ‘ಶಕ್ತಿ’ ಯೋಜನೆಗೆ ಚಾಲನೆ ನೀಡಿದಾಗ ಆಶಾ ಭಾವ ಮೂಡಿತ್ತು. ಆದರೆ ನಗರ ಸಾರಿಗೆ ಬಸ್‌ಗಳು ಹಳ್ಳಿಗಳತ್ತ ಮುಖ ಮಾಡಿದ ಕಾರಣ ಆಟೊಗಳೇ ಗತಿಯಾದವು.

ಕೋವಿಡ್‌ಗೆ ಮುನ್ನ ನಗರದಲ್ಲಿ 19 ಬಸ್‌ಗಳು ನಿತ್ಯ 20 ಮಾರ್ಗಗಳಲ್ಲಿ ನಿತ್ಯ ನಗರದಲ್ಲಿ ಸಂಚರಿಸುತ್ತಿದ್ದವು. ಐಯುಡಿಪಿ ಲೇಔಟ್‌, ಕೆಎಸ್‌ಆರ್‌ಟಿಸಿ ಬಡಾವಣೆ, ಜೋಗಿಮಟ್ಟಿ, ಚಳ್ಳಕೆರೆ ಟೋಲ್‌ ಗೇಟ್‌, ಜೆಎಂಐಟಿ ವೃತ್ತ, ಮಾಳಪ್ಪನಹಟ್ಟಿ, ಕನಕ ವೃತ್ತ, ಹೊಳಲ್ಕೆರೆ ರಸ್ತೆ, ಬಿ.ಡಿ ರಸ್ತೆ ಮಾರ್ಗದಲ್ಲಿ ಸಂಚಾರ ಹೆಚ್ಚಾಗಿತ್ತು. ಬೆಳಿಗ್ಗೆ 7ರಿಂದ ರಾತ್ರಿ 7ರವರೆಗೆ ಸೇವೆ ಲಭ್ಯವಿತ್ತು. ಜನರೂ ಈ ವ್ಯವಸ್ಥೆಗೆ ಹೊಂದಿಕೊಂಡಿದ್ದರು.

ಲಾಕ್‌ಡೌನ್‌ ವೇಳೆ ಶೇ 50ರಷ್ಟು ಪ‍್ರಯಾಣಿಕರ ಸಂಚಾರಕ್ಕೆ ಅನುಮತಿ ಕಲ್ಪಿಸಿದಾಗ ನಗರ ಸಾರಿಗೆ ಬಸ್‌ಗಳು ಗ್ರಾಮಗಳ ಹಾದಿ ತುಳಿದವು. ಕೊನೆಗೆ ಬಸ್‌ಗಳ ಸಂಖ್ಯೆ 4ರಿಂದ 1ಕ್ಕೆ ಇಳಿದಿದೆ. ಇರುವ ಒಂದು ಬಸ್‌, ಐಯುಡಿಪಿ ಲೇಔಟ್‌ ಹಾಗೂ ಕೋಡನಹಟ್ಟಿ ಮಾರ್ಗದಲ್ಲಿ ಸಂಚರಿಸುತ್ತಿದೆ. ಆದರೆ, ಸಮಯ ಮಾತ್ರ ಕೇಳಬೇಡಿ ಎಂದು ಜನರು ಬೇಸರ ವ್ಯಕ್ತಪಡಿಸುತ್ತಾರೆ.

ನಗರ ಸಾರಿಗೆ ಬಸ್‌ಗಳ ಅವ್ಯವಸ್ಥೆಯ ಲಾಭವನ್ನು ಆಟೊ ಚಾಲಕರು ಪಡೆಯುತ್ತಿದ್ದಾರೆ. ನಗರ ವ್ಯಾಪ್ತಿಯಲ್ಲಿ ಸಂಚರಿಸಲು ಸೀಟುಗಳ ಲೆಕ್ಕದಲ್ಲಿ ಪ್ರಯಾಣಿಕರಿಗೆ ದರ ನಿಗದಿಪಡಿಸಿವೆ. ಸಾರಿಗೆ ಸಂಸ್ಥೆಯ ಬಸ್‌ಗಳು ಸಂಚರಿಸುವ ಮಾರ್ಗದಲ್ಲಿಯೇ ಆಟೊಗಳು ಓಡಾಡುತ್ತಿವೆ. ಇದರಿಂದ ಗ್ರಾಮೀಣ ಪ್ರದೇಶದ ಜನರು, ಜಿಲ್ಲಾ ಆಸ್ಪತ್ರೆಗೆ ಬರುವವರು, ಕೂಲಿ ಕಾರ್ಮಿಕರು, ಶಾಲೆ– ಕಾಲೇಜು ವಿದ್ಯಾರ್ಥಿಗಳಿಗೆ ಆರ್ಥಿಕ ಹೊರೆಯಾಗಿದೆ.

ಐಯುಡಿಪಿ ಬಡಾವಣೆ, ವೆಂಕಟೇಶ್ವರ ಬಡಾವಣೆ, ಮಠದ ಕುರುಬರಹಟ್ಟಿ ಮತ್ತು ಮೆದೇಹಳ್ಳಿಯಿಂದ ನಗರಕ್ಕೆ ಬರುವ ವಿದ್ಯಾರ್ಥಿಗಳು, ಕೂಲಿ ಕಾರ್ಮಿಕರಿಗೆ ಆಟೊ ಪ್ರಯಾಣ ಅನಿವಾರ್ಯವಾಗಿದೆ. ವೈಶಾಲಿ ವೃತ್ತ, ಚಳ್ಳಕೆರೆ ಟೋಲ್‌ ಗೇಟ್‌, ಗಾಂಧಿ ವೃತ್ತ, ಸಂತೆಹೊಂಡದ ಬಳಿ ಆಟೊಗಳು ಸಾಲುಗಟ್ಟಿ ನಿಲ್ಲುತ್ತಿರುವುದು ಸಾಮಾನ್ಯವಾಗಿದೆ.

ನಗರ ವ್ಯಾಪ್ತಿಯಲ್ಲಿನ ‍ಪ್ರವಾಸಿ ತಾಣಗಳಾದ ಕೋಟೆ, ಆಡುಮಲ್ಲೇಶ್ವರ, ಮುರುಘಾ ಮಠ ಹಾಗೂ ಚಂದ್ರವಳ್ಳಿ ಕೆರೆಗೆ ನಿತ್ಯ ನೂರಾರು ಪ್ರವಾಸಿಗರು ಭೇಟಿ ನೀಡುತ್ತಾರೆ. ಬಸ್‌ ವ್ಯವಸ್ಥೆಯಿಲ್ಲದ ಕಾರಣ ಪ್ರವಾಸಿಗರು ಆಟೊ, ದ್ವಿಚಕ್ರ ವಾಹನ ಆಶ್ರಯಿಸಿದ್ದಾರೆ.