ಮಂಗಳೂರು | ಮಾದಕ ವಸ್ತು ಸರಬರಾಜು: ಒಬ್ಬನ ಸೆರೆ

ಮಂಗಳೂರು: ನಿಷೇಧಿತ ಮಾದಕ ವಸ್ತುಗಳನ್ನು ಬೆಂಗಳೂರಿನಿಂದ ತೆಗೆದುಕೊಂಡು ಬಂದು ಮಂಗಳೂರಿನ ವಿದ್ಯಾರ್ಥಿಗಳಿಗೆ ಸರಬರಾಜು ಮಾಡುತ್ತಿದ್ದ ಕೇರಳದ ಎರ್ನಾಕುಳಂ ಜಿಲ್ಲೆ ಮಟ್ಟಾಂಚೇರಿಯ ನಝೀರ್ ಅಹಮ್ಮದ್ ಖಾನ್‌ ಅವರ ಮಗ, ದೇರಳಕಟ್ಟೆಯಲ್ಲಿ ವಾಸವಾಗಿರುವ ಮಹಮ್ಮದ್ ಅರ್ಷದ್ ಖಾನ್ (29) ಎಂಬಾತನನ್ನು ಸಿಸಿಬಿ ಪೊಲೀಸರು ದೇರಳಕಟ್ಟೆಯಲ್ಲಿ ಶುಕ್ರವಾರ ಬಂಧಿಸಿದ್ದಾರೆ.

ಈತನಿಂದ 53.29 ಗ್ರಾಂ ಎಂಡಿಎಂಎ, 2.33 ಗ್ರಾಂ ಹೈಡ್ರೋವಿಡ್ ಗಾಂಜಾ ಮತ್ತು 45 ಗ್ರಾಂ ಎಂಡಿಎಂಎ ಪಿಲ್ಸ್‌ ವಶಪಡಿಸಿಕೊಳ್ಳಲಾಗಿದೆ. ₹ 10 ಲಕ್ಷದ 85 ಸಾವಿರ ಮೌಲ್ಯದ ಮಾದಕ ಪದಾರ್ಥ ಸೇರಿದಂತೆ ಒಟ್ಟು ₹ 11,5,500 ಮೌಲ್ಯದ ವಸ್ತುಗಳು ಆತನಿಂದ ಲಭಿಸಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.