ಪುತ್ತೂರು | ಕೊಚ್ಚಿ ಹೋದ ರಸ್ತೆ ಮೋರಿ: ಸಂಪರ್ಕ ಕಡಿತ

ಪುತ್ತೂರು: ನೆಟ್ಟಣಿಗೆ ಮುಡ್ನೂರು ಗ್ರಾಮದ ಕೆಮ್ಮತ್ತಡ್ಕ ಎಂಬಲ್ಲಿ ಇತ್ತೀಚೆಗೆ ನಿರ್ಮಿಸಿದ್ದ ರಸ್ತೆ ಮೋರಿಯೊಂದು ಮಳೆ ನೀರಿನೊಂದಿಗೆ ಕೊಚ್ಚಿ ಹೋಗಿದ್ದು, ಗ್ರಾಮೀಣ ಭಾಗದ ಈ ರಸ್ತೆ ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿದೆ.

ನೂಜಿಬೈಲು-ಪೆರ್ನಾಜೆ ರಸ್ತೆಯಿಂದ ನೂಜಿಬೈಲು-ಕೆಮ್ಮತ್ತಡ್ಕ ಮೂಲಕ ಕಾಸರಗೋಡಿನ ದೇಲಂಪಾಡಿ ಗ್ರಾಮದ ಹೂಜಂಪಡಿ ಎಂಬಲ್ಲಿಗೆ ಸಂಪರ್ಕಿಸುವ ರಸ್ತೆಯಲ್ಲಿ, ಕಚ್ಚಾ ರಸ್ತೆ ಭಾಗವಾಗಿರುವ ಕೆಮ್ಮತ್ತಡ್ಕ ಎಂಬಲ್ಲಿ ತೋಡಿಗೆ ಮೋರಿ ಅಳವಡಿಸಲಾಗಿತ್ತು.

ಈ ರಸ್ತೆ ಸಂಪರ್ಕ ಕಡಿತಗೊಂಡಿರುವುದರಿಂದ ಸಾರ್ವಜನಿಕರು ಮತ್ತು ಶಾಲಾ ಕಾಲೇಜು ವಿದ್ಯಾರ್ಥಿಗಳಿಗೆ ತೊಂದರೆ ಉಂಟಾಗಿದೆ.

ನೆಟ್ಟಣಿಗೆ ಮುಡ್ನೂರು ಗ್ರಾಮ ಪಂಚಾಯಿತಿ ವತಿಯಿಂದ ಮೋರಿ ನಿರ್ಮಿಸಲಾಗಿತ್ತು.