ಕಾಸರಗೋಡು: ಒಂದೇ ಕುಟುಂಬದ ಮೂವರ ಶವ ಪತ್ತೆ

ಕಾಸರಗೋಡು: ಕಾಞಂಗಾಡು ನಗರ ಬಳಿಯ ಆವಿಕ್ಕರ ಎಂಬಲ್ಲಿನ ಕ್ವಾರ್ಟರ್ಸ್ ಒಂದರಲ್ಲಿ ಶನಿವಾರ ಒಂದೇ ಕುಟುಂಬದ ಮೂವರ ಶವ ಪತ್ತೆಯಾಗಿದೆ.

ಸ್ಥಳೀಯ ನಿವಾಸಿ ಸೂರ್ಯಪ್ರಕಾಶ್ (56), ಅವರ ಪತ್ನಿ ಗೀತಾ (48), ಸೂರ್ಯಪ್ರಕಾಶರ ತಾಯಿ ಲೀಲಾ (90) ಎಂಬುವರ ಮೃತದೇಹ ಸಿಕ್ಕಿವೆ. ಮಹಿಳೆಯರಿಬ್ಬರ ಶವ ಮಲಗುವ ಕೋಣೆಯಲ್ಲಿ ಬಿದ್ದುಕೊಂಡಿರುವ, ಸೂರ್ಯಪ್ರಕಾಶ್ ಅವರ ಶವ ಅಡುಗೆಮನೆಯಲ್ಲಿ ನೇಣು ಹಾಕಿಕೊಂಡ ಸ್ಥಿತಿಯಲ್ಲಿ ಪತ್ತೆಯಾಗಿದೆ.

ಸೂರ್ಯಪ್ರಕಾಶ್ ಅವರು ಕಾಞಂಗಾಡು ನಗರದಲ್ಲಿ ವಾಚ್ ರಿಪೇರಿ ಅಂಗಡಿ ನಡೆಸುತ್ತಿದ್ದರು. ಲೀಲಾ ಅವರು ನಿವೃತ್ತ ಶಿಕ್ಷಕಿಯಾಗಿದ್ದರು. ಕೆಲಕಾಲಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದರು.

ಪ್ರಕರಣಕ್ಕೆ ಸಂಬಂಧಿಸಿ ಹೊಸದುರ್ಗ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.