ದಾವಣಗೆರೆ | ರಸ್ತೆ ಅಪಘಾತ; 3 ವರ್ಷದಲ್ಲಿ 927 ಸಾವು

ದಾವಣಗೆರೆ: ಜಿಲ್ಲೆಯ ವಿವಿಧೆಡೆ 2023ರಿಂದ 2025ರ ನಡುವಿನ ಮೂರು ವರ್ಷಗಳ ಅವಧಿಯಲ್ಲಿ ಒಟ್ಟು 3,188 ರಸ್ತೆ ಅಪಘಾತಗಳು ಸಂಭವಿಸಿದ್ದು, ಒಟ್ಟು 927 ಜನ ಮೃತಪಟ್ಟಿದ್ದಾರೆ. ಸಾವಿರಕ್ಕೂ ಹೆಚ್ಚು ಜನ ಗಾಯಗೊಂಡು ಆಸ್ಪತ್ರೆ ಸೇರಿದ್ದಾರೆ.

2023ರಲ್ಲಿ ಒಟ್ಟು 1,082 ರಸ್ತೆ ಅಪಘಾತಗಳು ಸಂಭವಿಸಿವೆ. ಈ ಪೈಕಿ 293 ಅಪಘಾತಗಳಲ್ಲಿ 307 ಜನ ಅಸುನೀಗಿದ್ದಾರೆ. ಇನ್ನು 789 ಮಾರಣಾಂತಿಕವಲ್ಲದ ಅಪಘಾತಗಳಲ್ಲಿ ನೂರಾರು ಜನ ಗಾಯಗೊಂಡಿದ್ದಾರೆ.

2024ರಲ್ಲಿ 1,029 ಅಪಘಾತಗಳು ನಡೆದಿವೆ. ಈ ಪೈಕಿ 289 ಅಪಘಾತಗಳಲ್ಲಿ 265 ಜನ ಕೊನೆಯುಸಿರೆಳೆದಿದ್ದಾರೆ. 740 ಅಪಘಾತಗಳು ಗಾಯಗಳನ್ನುಂಟುಮಾಡಿವೆ. 

2025ರಲ್ಲಿ 1,077 ಅಪಘಾತ ಸಂಭವಿಸಿವೆ. 297 ಅಪಘಾತಗಳಲ್ಲಿ 269 ಜನ ಪ್ರಾಣ ಕಳೆದುಕೊಂಡಿದ್ದರೆ, 756 ಅಪಘಾತಗಳಲ್ಲಿ ನೂರಾರು ಜನ ಗಾಯಗೊಂಡು ಆಸ್ಪತ್ರೆ ಸೇರಿದ್ದಾರೆ. ಅತಿ ವೇಗ/ ಚಾಲಕರ ಅಜಾರೂಕತೆಯಿಂದ 22 ಅಪಘಾತಗಳು ಹಾಗೂ ವೀಲ್ಹಿ ಹುಚ್ಚಾಟದಿಂದ 2 ಅಪಘಾತಗಳು ನಡೆದಿವೆ.

ಮೃತರಲ್ಲಿ ಪುರುಷರೇ ಹೆಚ್ಚು:

3 ವರ್ಷಗಳಲ್ಲಿ ವಿವಿಧ ಬಗೆಯ ರಸ್ತೆ ಅಪಘಾತಗಳಲ್ಲಿ ಮೃತಪಟ್ಟ 927 ಜನರ ಪೈಕಿ ಪುರುಷರ ಸಂಖ್ಯೆಯೇ ಹೆಚ್ಚಿದೆ. 2023ರಲ್ಲಿ 263, 2024ರಲ್ಲಿ 265 ಹಾಗೂ 2025ರಲ್ಲಿ 269 ಪುರುಷರು (ಒಟ್ಟು 797) ಮೃತಪಟ್ಟಿದ್ದಾರೆ. 2023ರಲ್ಲಿ 41, 2024ರಲ್ಲಿ 35 ಹಾಗೂ 2025ರಲ್ಲಿ 44 (ಒಟ್ಟು 120) ಮಹಿಳೆಯರು ರಸ್ತೆ ಅಪಘಾತಗಳಲ್ಲಿ ಮೃತಪಟ್ಟಿದ್ದಾರೆ. 3 ವರ್ಷಗಳಲ್ಲಿ 10 ಮಕ್ಕಳೂ ಅಸುನೀಗಿದ್ದಾರೆ. 

ಯಮಸ್ವರೂಪಿ ರಾಜ್ಯ ಹೆದ್ದಾರಿಗಳು:

ಮಾರಣಾಂತಿಕ ಅಪಘಾತಗಳ ಪೈಕಿ ರಾಜ್ಯ ಹೆದ್ದಾರಿಗಳಲ್ಲೇ ಹೆಚ್ಚು ಅವಘಡಗಳು ಸಂಭವಿಸಿವೆ. ಮೂರು ವರ್ಷಗಳ ಅವಧಿಯಲ್ಲಿ ರಾಜ್ಯ ಹೆದ್ದಾರಿಗಳಲ್ಲಿ (ಎಸ್‌ಎಚ್‌) ಒಟ್ಟು 373 ಮಾರಣಾಂತಿಕ ಅಪಘಾತಗಳು ಘಟಿಸಿವೆ. ಇನ್ನು ರಾಷ್ಟ್ರೀಯ ಹೆದ್ದಾರಿಗಳಲ್ಲಿ (ಎನ್‌ಎಚ್‌) 209 ಅಪಘಾತಗಳು ಸಂಭವಿಸಿವೆ.

ಗ್ರಾಮೀಣ ರಸ್ತೆಗಳಲ್ಲಿ 170, ಉಪರಸ್ತೆಗಳಲ್ಲಿ (ಇತರೆ ರಸ್ತೆಗಳು) 78, ಜಿಲ್ಲಾ ಮುಖ್ಯ ರಸ್ತೆಗಳಲ್ಲಿ (ಎಂಡಿಆರ್‌) 33 ಹಾಗೂ ರಿಂಗ್‌ ರಸ್ತೆಗಳಲ್ಲಿ 16 ಅಪಘಾತಗಳು ಸಂಭವಿಸಿವೆ.

ಯುವಜನರೇ ಹೆಚ್ಚು ಬಲಿ: 

2025ರಲ್ಲಿ ಜಿಲ್ಲೆಯಲ್ಲಿ ಸಂಭವಿಸಿದ ರಸ್ತೆ ಅಪಘಾತಗಳಲ್ಲಿ 21ರಿಂದ 30 ವಯಸ್ಸಿನ 63 ಜನರು ಮೃತಪಟ್ಟಿದ್ದಾರೆ. 31ರಿಂದ 40 ವಯಸ್ಸಿನ 74 ಜನ, 51ರಿಂದ 60 ವಯೋಮಾನದವರ ಪೈಕಿ 58 ಜನ, 41ರಿಂದ 50 ವಯೋಮಾನದವರ ಪೈಕಿ 55 ಜನ ಅಸುನೀಗಿದ್ದಾರೆ ಎನ್ನುತ್ತವೆ ಪೊಲೀಸ್ ಇಲಾಖೆಯ ಅಂಕಿ ಅಂಶಗಳು.