ದಾವಣಗೆರೆ | ಅರ್ಥಶಾಸ್ತ್ರ ಅರ್ಥೈಸಲು ‘ಆಕರ್ಷಕ’ ಮಾರ್ಗ: ಚಾರ್ಟ್‌ಗಳ ಲೋಕ ಅನಾವರಣ

ದಾವಣಗೆರೆ: ಖಾಸಗಿ ಕಾಲೇಜುಗಳು ಹೊಂದಿರುವ ಆಧುನಿಕ ಸೌಲಭ್ಯಗಳು ಇಲ್ಲಿಲ್ಲ. ಹೊಸ ಯೋಜನೆಗಳನ್ನು ಕಾರ್ಯಗತಗೊಳಿಸುವಷ್ಟು  ಹಣಕಾಸಿನ ಲಭ್ಯತೆಯೂ ಇಲ್ಲ. ಆದರೆ ಇಲ್ಲಿನ ಉಪನ್ಯಾಸಕರೊಬ್ಬರ ಆಸಕ್ತಿಯ ಫಲವಾಗಿ, ಅರ್ಥಶಾಸ್ತ್ರ ವಿಷಯಕ್ಕೆ ಸಂಬಂಧಿಸಿದ ಕಠಿಣ ಪರಿಕಲ್ಪನೆಗಳನ್ನು ಸುಲಭವಾಗಿ ವಿದ್ಯಾರ್ಥಿಗಳಿಗೆ ಅರ್ಥೈಸುವ ಯತ್ನವೊಂದು ಸದ್ದಿಲ್ಲದೇ ನಡೆಯುತ್ತಿದೆ. 

ನಗರದ ರಾಜನಹಳ್ಳಿ ಸೀತಮ್ಮ ಮಹಿಳಾ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಅರ್ಥಶಾಸ್ತ್ರ ಪಠ್ಯಕ್ರಮಕ್ಕೆ ಸಂಬಂಧಿಸಿದ ನೂರಾರು ಚಾರ್ಟ್‌ಗಳನ್ನು ತಯಾರಿಸಿ, ಪ್ರದರ್ಶನಕ್ಕೆ ಇಡಲಾಗಿದೆ. ಕೊಠಡಿಯ ಒಳಹೊಕ್ಕರೆ ಹಣಕಾಸು ವಿಚಾರಕ್ಕೆ ಸಂಬಂಧಿಸಿದ ಬೃಹತ್ ಲೋಕವೊಂದು ಚಿತ್ರದ ರೂಪದಲ್ಲಿ ತೆರೆದುಕೊಳ್ಳುತ್ತದೆ. ಕಾಲೇಜಿನ ವಾಣಿಜ್ಯಶಾಸ್ತ್ರ ವಿಭಾಗದ ಪ್ರಥಮ ಹಾಗೂ ದ್ವಿತೀಯ ಪಿಯು ವಿದ್ಯಾರ್ಥಿಗಳೇ ಬಹುತೇಕ ಚಾರ್ಟ್‌ಗಳನ್ನು ರಚಿಸಿರುವುದು ವಿಶೇಷ. ಇದರ ರೂವಾರಿ, ಕಾಲೇಜಿನ ಅರ್ಥಶಾಸ್ತ್ರ ಉಪನ್ಯಾಸಕ ಷಂಸುದ್ದೀನ್ ಖಾನ್.

ಗಣಿತದಷ್ಟೇ ಕಠಿಣ ಎಂದು ಪರಿಗಣಿಸಲಾಗಿರುವ ಕ್ಲಿಷ್ಟ ಪರಿಕಲ್ಪನೆಗಳು ಅರ್ಥಶಾಸ್ತ್ರದ ವಿದ್ಯಾರ್ಥಿಗಳಿಗೂ ಎದುರಾಗುತ್ತವೆ. ಬಜೆಟ್‌ರೇಖೆಯ ಇಳಿಜಾರು, ಬೇಡಿಕೆ ರೇಖೆಯ ಚಲನೆಗಳು, ಬೇಡಿಕೆಯ ಪಲ್ಲಟ, ಸರಕುಗಳ ದರದಲ್ಲಿ ವ್ಯತ್ಯಾಸ.. ಹೀಗೆ ಹಲವು ವಿಚಾರಗಳನ್ನು ಪಠ್ಯದ ರೂಪದಲ್ಲಿ ಬೋಧಿಸಿದಾಗ ವಿದ್ಯಾರ್ಥಿಗಳ ಮನಸ್ಸಿನ ಆಳಕ್ಕೆ ಇಳಿಯುವುದು ಕಷ್ಟ. ವಿಜ್ಞಾನ ವಿಭಾಗದಲ್ಲಿ ನಡೆಸುವ ಪ್ರಯೋಗಗಳು, ವಿವಿಧ ಚಾರ್ಟ್‌ ಹಾಗೂ ಮಾದರಿಗಳನ್ನು ಬಳಸಿ ಬೋಧನೆ ಮಾಡುವ ವಿಧಾನವನ್ನೇ ಇಲ್ಲೂ ಅಳವಡಿಸಿಕೊಂಡಿರುವುದು ವಿಶೇಷ.  

ಬಾರ್ ಚಾರ್ಟ್, ಕಾಲಂ ಚಾರ್ಟ್, ಲೈನ್‌ ಚಾರ್ಟ್, ಏರಿಯಾ ಚಾರ್ಟ್, ಪೈ ಗ್ರಾಫ್‌ಗಳ ಮೂಲಕ ಪಠ್ಯಕ್ಕೆ ದ್ಯಶ್ಯರೂಪ ನೀಡಲಾಗಿದೆ. ಉತ್ಪನ್ನವೊಂದರ ಪೂರೈಕೆ ಹಾಗೂ ಬೇಡಿಕೆಯನ್ನು ಬಾರ್ ಚಾರ್ಟ್ ಮೂಲಕ ಪ್ರಸ್ತುತಪಡಿಸಲಾಗಿದೆ. ಜನಸಂಖ್ಯಾ ವಯೋಮಿತಿಯ ಹಂಚಿಕೆಯನ್ನು ಪೈ ಚಾರ್ಟ್ ಮೂಲಕ ಸುಲಭವಾಗಿ ಅರ್ಥೈಸಲಾಗಿದೆ. ಇಂತಹ ನೂರಾರು ಚಿತ್ರಪಟಗಳನ್ನು ಇಡೀ ಕೊಠಡಿಯಲ್ಲಿ ಒಪ್ಪವಾಗಿ ಜೋಡಿಸಿದ್ದು, ವಿದ್ಯಾರ್ಥಿಗಳಿಗೆ ಸುಲಭವಾಗಿ ತಿಳಿಸುವ ಯತ್ನ ಮಾಡಲಾಗುತ್ತಿದೆ. ಎರಡು ವರ್ಷಗಳ ಹಿಂದೆ ಮಾಡೆಲ್‌ ರೂಪದಲ್ಲಿ, ಕಳೆದ ವರ್ಷ ರಂಗೋಲಿಯ ಮೂಲಕ ‍ಪ್ರಸ್ತುತಪಡಿಸಲಾಗಿತ್ತು. ಇಂತಹ ಯತ್ನ ಸರ್ಕಾರಿ ಕಾಲೇಜುಗಳಲ್ಲಿ ಇದೇ ಮೊದಲು ಎನ್ನುತ್ತಾರೆ ಉಪನ್ಯಾಸಕ ಷಂಸುದ್ದೀನ್.