ಅಜ್ಜಿಯ ಆಸರೆಯಲ್ಲಿ ಓದಿ ಚಿನ್ನಕ್ಕೆ ಮುತ್ತಿಟ್ಟ ನಯನಾ

ದಾವಣಗೆರೆ: ‘ನನಗೆ ವಿಜ್ಞಾನ ವಿಭಾಗದಲ್ಲಿ ಓದುವ ಹಂಬಲ. ಆದರೆ, ಆ ಸಮಯದಲ್ಲಿ ಕುಟುಂಬದ ಆರ್ಥಿಕ ಪರಿಸ್ಥಿತಿಯ ಕಾರಣಕ್ಕೆ ಅನಿವಾರ್ಯವಾಗಿ ವಾಣಿಜ್ಯ (ಬಿ.ಕಾಂ) ಪದವಿ  ಓದಬೇಕಾಯಿತು. ಹಲವು ಬಾರಿ ಪ್ರಯತ್ನಿಸಿದರೂ ಸಿಎ ಕೋರ್ಸ್‌ ಪಾಸಾಗಲಿಲ್ಲ. ಹೀಗಾಗಿ ವಿಶ್ವವಿದ್ಯಾಲಯದಲ್ಲಿ ಎಂ.ಕಾಂ ಪದವಿಗೆ ಸೇರಿದೆ. ಆದರೆ ಅಲ್ಲಿ ಯಶಸ್ಸು ಕಂಡೆ..’ 

ದಾವಣಗೆರೆ ವಿಶ್ವವಿದ್ಯಾಲಯದ 2024–25ನೇ ಸಾಲಿನ ಸ್ನಾತಕೋತ್ತರ ವಿಭಾಗದಲ್ಲಿ 7 ಚಿನ್ನದ ಪದಕಗಳಿಗೆ ಮುತ್ತಿಕ್ಕಿರುವ ನಯನಾ ಎನ್‌.ಬಿ. ಅವರ ಮಾತುಗಳಿವು. 

ಶಾಲೆಯಿಂದ ವಿಶ್ವವಿದ್ಯಾಲಯದವರೆಗೂ ಅಜ್ಜಿಯ ಆಸರೆಯಲ್ಲಿ ಬೆಳೆದು, ಓದಿ ಎಂಕಾಂನಲ್ಲಿ ಮೊದಲ ರ‍್ಯಾಂಕ್ ಪಡೆದಿರುವ ಅವರು, ದಾವಣಗೆರೆ ವಿಶ್ವವಿದ್ಯಾಯದ ‘ಚಿನ್ನದ ಹುಡುಗಿ’ ಎನಿಸಿಕೊಂಡಿದ್ದಾರೆ. 

‘ಯಾವುದೇ ಕೆಲಸವಾಗಲಿ, ಅದನ್ನು ನಿಷ್ಠೆಯಿಂದ ಮಾಡುವುದು ನನ್ನ ಸಿದ್ಧಾಂತ. ಎರಡು ಅಥವಾ ಮೂರನೇ ರ್‍ಯಾಂಕ್ ನಿರೀಕ್ಷಿಸಿದ್ದ ನನಗೆ ಮೊದಲ ರ‍್ಯಾಂಕ್‌ ಬಂದಿದ್ದು ಅಚ್ಚರಿ ಮೂಡಿಸಿತು’ ಎಂದು ‘ಪ್ರಜಾವಾಣಿ’ ಜೊತೆ ತಮ್ಮ ಅಭಿಪ್ರಾಯ ಹಂಚಿಕೊಂಡರು.  

ತಂದೆ ಭರಮನ ಗೌಡ, ತಾಯಿ ಮೀನಾಕ್ಷಿ ಹರಿಹರ ಸಮೀಪದ ಜಿಗಳಿಯಲ್ಲಿದ್ದಾರೆ. ಅಜ್ಜಿ ರತ್ನಮ್ಮ ಜೊತೆ ದಾವಣಗೆರೆಯಲ್ಲಿ ವಾಸವಿರುವ ನಯನಾ, ಸಿದ್ದಗಂಗಾ ವಿದ್ಯಾಸಂಸ್ಥೆಯಲ್ಲಿ ಆರಂಭಿಕ ಶಿಕ್ಷಣ, ನಂತರ ಎವಿಕೆ ಮಹಿಳಾ ಕಾಲೇಜಿನಲ್ಲಿ ಪದವಿ ಪಡೆದಿದ್ದಾರೆ. 

ಕನ್ನಡದಲ್ಲಿ ಚಿನ್ನದ ಪದಕ: 

‘ಇರುವ ಒಂದೆಕರೆ ಜಮೀನು, ಜೀವನೋಪಾಯಕ್ಕೆ ಆಗಾಗ್ಗೆ ಸಣ್ಣಪುಟ್ಟ ಅಡುಗೆ ಕೆಲಸ ಮಾಡಿಕೊಂಡಿರುವ ಅಪ್ಪನಿಗೆ ಅಕ್ಕ ಹಾಗೂ ನನ್ನನ್ನು ಓದಿಸುವ ಹಂಬಲ. ಊರಿನಿಂದ ಅಂದಾಜು 40 ಕಿಲೋಮೀಟರ್ ದೂರದ ವಿಶ್ವವಿದ್ಯಾಲಯದಕ್ಕೆ ದಿನವೂ ಬಂದು ಹೋಗುತ್ತಿದ್ದೆ. ಕಷ್ಟವಿದ್ದರೂ ಚೆನ್ನಾಗಿ ಓದಿ ಚಿನ್ನದ ಪದಕವನ್ನೇ ಜಯಿಸಬೇಕು ಎಂಬುದು ನನ್ನ ಹಟ. ಅಂದು ಇಟ್ಟುಕೊಂಡಿದ್ದ ಗುರಿಯನ್ನು ಸಾಧಿಸಿದ ಹೆಮ್ಮೆ ನನ್ನದು’ ಎಂಬುದು ಅನುಷಾ ಎಂ.ಎಂ. ಅವರ ನುಡಿ. 

ವಿಶ್ವವಿದ್ಯಾಲಯದ ಕನ್ನಡ ಸ್ನಾತಕೋತ್ತರ ಪದವಿಯಲ್ಲಿ ಇರು ಮೂರು ಚಿನ್ನದ ಪದಕಗಳನ್ನು ಗಳಿಸಿದ್ದಾರೆ. 

‘ಪದವಿಗೆ ಸೇರಿದಾಗ ನನ್ನ ಮದುವೆ ನಿಶ್ಚಿತಾರ್ಥ ನಡೆಯಿತು. ಪರೀಕ್ಷೆಗೆ ಒಂದು ತಿಂಗಳಿದ್ದಾಗ ನನ್ನ ಮದುವೆ ಆಯಿತು. ಮನೆಯವರು, ಪತಿಯ ಬೆಂಬಲದಿಂದ ಪರೀಕ್ಷೆಯನ್ನು ಸಮರ್ಥವಾಗಿ ಎದುರಿಸಿದೆ. ಯಶಸ್ವಿಯೂ ಆದೆ. ಮುಂದೆ ಸಹಾಯಕ ಪ್ರಾಧ್ಯಾಪಕಿಯಾಗುವ ಆಸೆಯಿದೆ’ ಎಂದು ತಮ್ಮ ಕನಸನ್ನು ಅವರು ತೆರೆದಿಟ್ಟರು. 

ನಾಲ್ಕು ಪದಕ: ಎಂಬಿಎ ಪದವಿಯಲ್ಲಿ ನಾಲ್ಕು ಚಿನ್ನದ ಪದಕಗಳನ್ನು ಪಡೆದಿರುವ ದೀಪಾ ಆರ್. ಅವರು ದಾವಣಗೆರೆಯ ರಿಯಲ್ ಎಸ್ಟೇಟ್ ಉದ್ಯಮಿಯ ಪುತ್ರಿ. ಚಾಣಕ್ಯ ಅಕಾಡೆಮಿಯಲ್ಲಿ ಪದವಿ ಪೂರೈಸಿದ್ದಾರೆ. ವಿಶ್ವವಿದ್ಯಾಲಯದ ಎಂಬಿಎ ವಿಭಾಗದ ಪ್ರಾಧ್ಯಾಪಕರು ನೀಡಿದ ಮಾರ್ಗದರ್ಶನವನ್ನು ಅವರು ಸ್ಮರಿಸುತ್ತಾರೆ. 

ಅರ್ಥಶಾಸ್ತ್ರದಲ್ಲಿ ಮೂರು ಚಿನ್ನದ ಪದಕ ಪಡೆದಿರುವ ಕೋನೇನ್ ತಬಸ್ಸುಮ್ ಅವರು ದಾವಣಗೆರೆಯ ಚೌಕಿಪೇಟೆ ನಿವಾಸಿ. ತಂದೆ ಉದ್ಯಮಿ. ಐಇಎಸ್‌, ಐಆರ್‌ಎಸ್‌ನಂತಹ ನಾಗರಿಕ ಸೇವಾ ಪರೀಕ್ಷೆಗಳನ್ನು ಎದುರಿಸುವ ಇಚ್ಛೆ ಹೊಂದಿರುವ ಅವರು, ಆಸಕ್ತಿಯಿಂದಲೇ ಅರ್ಥಶಾಸ್ತ್ರ ಆಯ್ದುಕೊಂಡು, ಮೂರು ಪದಕಗಳನ್ನು ಪಡೆದಿದ್ದಾರೆ.

ಹಿರಿಯೂರಿನ ಐಮಂಗಲದ ಚಂದನ್ ವಿ.ಎಂ. ಪತ್ರಿಕೋದ್ಯಮದಲ್ಲಿ ಮೊದಲ ರ‍್ಯಾಂಕ್ ಪಡೆದು ಎರಡು ಚಿನ್ನದ ಪದಕಗಳನ್ನು ಪಡೆದಿದ್ದಾರೆ. ಬೆಳಿಗ್ಗೆ ವೇಳೆ ಮನೆಗಳಿಗೆ ಪತ್ರಿಕೆ ವಿತರಿಸುತ್ತಲೇ ಶ್ರದ್ಧೆಯಿಂದ ಓದಿದ ಅವರು, ಪತ್ರಿಕಾ ಏಜೆಂಟ್ ಆಗಿರುವ ತಂದೆಯ ಆಸೆಯಂತೆ ಪತ್ರಿಕೋದ್ಯಮ ಪದವಿ ಆಯ್ದುಕೊಂಡು ಅದರಲ್ಲಿ ಯಶಸ್ವಿಯಾಗಿದ್ದಾರೆ.