ಮಣ್ಣು–ನೀರಿನ ರಕ್ಷಣೆಗಾಗಿ 500 ಮೀ. ತಡೆಗೋಡೆ: ಗುಡ್ಡದ ಭೂಮಿಯಲ್ಲಿ ಸಮೃದ್ಧ ಬೆಳೆ

ಬಸವಾಪಟ್ಟಣ: ಕೇವಲ ಬಂಡೆಗಳಿಂದ ಆವರಿಸಿದ್ದ ಇಳಿಜಾರಿನ ಗುಡ್ಡದ ಬದಿಯ ನಾಲ್ಕು ಎಕರೆ ಭೂಮಿಯನ್ನು ಸಮತಟ್ಟು ಮಾಡಿ, ಮಣ್ಣು ನೀರು ವ್ಯರ್ಥ ಆಗದಂತೆ ತಡೆಗೋಡೆ ನಿರ್ಮಿಸಿ ಅಡಿಕೆ ತೋಟ ಮಾಡಿರುವ ದಾಗಿನಕಟ್ಟೆಯ ರೈತ ಕೆ.ಎಚ್‌.ನಿಂಗಪ್ಪ ಅವರ ಸಾಹಸದ ಕೃಷಿ ಕಾಯಕ ಇತರ ರೈತರಿಗೆ ಆದರ್ಶ ಪ್ರಾಯವಾಗಿದೆ.

‘ನಮ್ಮ ತಂದೆಯ ಕಾಲದಲ್ಲಿ ನನಗೆ ದೊರೆತ ನಾಲ್ಕು ಎಕರೆ ಭೂಮಿ ಗುಡ್ಡದ ಇಳಿಜಾರು ಪ್ರದೇಶದಲ್ಲಿದೆ. ಅದರ ತುಂಬಾ ದೊಡ್ಡ ಬಂಡೆಗಳೇ ತುಂಬಿದ್ದವು. ಯಾವ ರೀತಿಯಲ್ಲಿಯೂ ಹೊಲದ ಉಳುಮೆ ಸಾಧ್ಯವಿರಲಿಲ್ಲ. ಅಲ್ಲದೇ ಮಳೆ ಬಂದಾಗ ಹೊಲದಲ್ಲಿರುವ ಮಣ್ಣು ಸಂಪೂರ್ಣ ಕೊಚ್ಚಿಕೊಂಡು ಹೋಗಿ ಭೂ ಸವಕಳಿ ಉಂಟಾಗುತ್ತಿತ್ತು’ ಎಂದು ತಮ್ಮ ಜಮೀನಿನ ಸ್ಥಿತಿ ವಿವರಿಸುವರು ನಿಂಗಪ್ಪ.

‘ಹೊಲದಲ್ಲಿರುವ ಬಂಡೆಗಳನ್ನು ತೆರವುಗೊಳಿಸಿದರೆ ಭೂ ಸವೆತ ತಡೆಗಟ್ಟಬಹುದೆಂದು ಗ್ರಾಮದ ಹಿರಿಯರು ಸಲಹೆ ನೀಡಿದರು. ಆದರೆ ಮಧ್ಯಮ ವರ್ಗದ ರೈತನಾದ ನನಗೆ ಅದು ಸುಲಭದ ಕಾರ್ಯವಾಗಿರಲಿಲ್ಲ. ಆದರೂ ಹಿರಿಯರ ಮಾತಿನಲ್ಲಿ ನಂಬಿಕೆ ಇಟ್ಟು ಕಾರ್ಯಾರಂಭ ಮಾಡಿದೆ. ಜೆ.ಸಿ.ಬಿ. ಯಂತ್ರಗಳನ್ನು ಬಳಸಿ ಬಂಡೆಗಳನ್ನು ತೆರವುಗೊಳಿಸುವುದು. ಆ ಬಂಡೆಗಳನ್ನು ಒಡೆದು ಅದರಿಂದಲೇ ಹೊಲದ ಕೆಳಭಾಗದಲ್ಲಿ ಗೋಡೆ ನಿರ್ಮಿಸುವುದಕ್ಕೆ ಭಾರೀ ಪ್ರಮಾಣದ ಹಣದ ಅವಶ್ಯಕತೆ ಇತ್ತು’.

‘ಬ್ಯಾಂಕ್‌ಗಳು, ಸಹಕಾರ ಸಂಘಗಳು ಫಸಲು ಬೆಳೆಯಲು ಸಾಲ ನೀಡುತ್ತವೆ. ಹೊಲವನ್ನು ಸಮತಟ್ಟು ಮಾಡಲು ಸಾಲ ಕೊಡುವುದಿಲ್ಲ. ಆದರೂ ಹಿಡಿದ ಪ್ರಯತ್ನ ಬಿಡದೇ 2019– 20ರಲ್ಲಿ ₹ 24 ಲಕ್ಷ ವೆಚ್ಚದಲ್ಲಿ ಬಂಡೆಗಳನ್ನು ತೆರವುಗೊಳಿಸಿ, ಹೊಲವನ್ನು ಸಮತಟ್ಟು ಮಾಡಿ, 500 ಮೀಟರ್‌ ಉದ್ದ, ಐದು ಅಡಿ ಎತ್ತರ ಮತ್ತು ಒಂದು ಮೀಟರ್‌ ಅಗಲದ ಕಲ್ಲಿನ ಗೋಡೆ ನಿರ್ಮಿಸಿ, ಮಣ್ಣು ಮತ್ತು ನೀರು ಕೊಚ್ಚಿಹೋಗದಂತೆ ತಡೆದು ಹೊಲವನ್ನು ಸಿದ್ಧಪಡಿಸಿದೆ’ ಎಂದು ಆತ್ಮವಿಶ್ವಾಸದ ನಗೆ ಬೀರಿದರು.

‘ಹೊಲದ ಇನ್ನೊಂದು ಭಾಗದಲ್ಲಿ 18 ಅಡಿ ಎತ್ತರದ ಕಲ್ಲಿನ ಗೋಡೆ ಕಟ್ಟಿ ಮಣ್ಣು ನೀರನ್ನು ತಡೆಯುವ ಕೆಲಸ ಮಾಡಿದ್ದೇನೆ. ವಿದ್ಯುತ್‌ ಸಂಪರ್ಕ ಪಡೆದು ನೀರಿನ ಸರಬರಾಜು ಮಾಡಿದ್ದು, ನಂತರ ಅಡಿಕೆ ಸಸಿಗಳನ್ನು ನಾಟಿ ಮಾಡಿದ್ದೇನೆ. ಕೃಷಿ ಇಲಾಖೆಯ ನೆರವಿನಿಂದ ಕೃಷಿ ಹೊಂಡವನ್ನು ನಿರ್ಮಿಸಿಕೊಂಡಿದ್ದು, ಸತತವಾಗಿ ನೀರು ಹಾಯಿಸುತ್ತಿದ್ದೇನೆ. ಅಡಿಕೆ ಗಿಡಗಳು ಈಗ ಕಾಯಿ ಬಿಡಲಾರಂಭಿಸಿವೆ. ಅಡಿಕೆಯೊಂದಿಗೆ ತೋಟದ ಸುತ್ತಲೂ ತೆಂಗು, ಮಾವು, ಪೇರಲೆ, ತೇಗ ಮತ್ತು ಮಹಾಗನಿ ಗಿಡಗಳನ್ನು ಸಹ ಹಾಕಿದ್ದು, ಸ್ವಲ್ಪಭಾಗದಲ್ಲಿ ಏಲಕ್ಕಿ ಗಿಡಗಳನ್ನೂ ಬೆಳೆಸಿದ್ದೇನೆ. ಈ ಎಲ್ಲ ಗಿಡಗಳೂ ಚೆನ್ನಾಗಿ ಬೆಳೆಯುತ್ತಿವೆ. ಅಲ್ಲದೇ ಮೂರು ವರ್ಷಗಳ ಅಡಿಕೆ ಗಿಡಗಳ ಮಧ್ಯದಲ್ಲಿ ತೊಗರಿ ಬೆಳೆಯನ್ನೂ ಬೆಳೆದಿದ್ದೇನೆ’ ಎಂದು ಮಾಹಿತಿ ನೀಡಿದರು.