ಮಲೇಬೆನ್ನೂರು | ದೇವರ ಕೋಣ ವಿಚಾರಕ್ಕೆ ಗ್ರಾಮಸ್ಥರ ನಡುವೆ ಜಟಾಪಟಿ

ಮಲೇಬೆನ್ನೂರು: ಸಮೀಪದ ಕುಣಿಬೆಳಕೆರೆ ಹಾಗೂ ಹೊನ್ನಾಳಿ ತಾಲ್ಲೂಕಿನ ಕುಳಗಟ್ಟೆ ಗ್ರಾಮದ ಜನರ ನಡುವೆ ದೇವರ ಕೋಣದ ವಿಚಾರವಾಗಿ ಜಟಾಪಟಿ ನಡೆದಿದೆ.

5 ದಿನಗಳ ಹಿಂದೆ ದೇವರಬೆಳಕೆರೆ ಗ್ರಾಮದಲ್ಲಿ ಕೋಣವು ಮೇಯುತ್ತಿದ್ದಾಗ ಕುಳಗಟ್ಟೆ ಗ್ರಾಮಸ್ಥರು ಕಳೆದುಹೋಗಿದ್ದ ತಮ್ಮ ಗ್ರಾಮದ ದೇವರಕೋಣ ಸಿಕ್ಕಿತೆಂದು ಸೆರೆ ಹಿಡಿದು ಟ್ರ್ಯಾಕ್ಟರ್‌ ಮೂಲಕ ತಮ್ಮ ಗ್ರಾಮಕ್ಕೆ ಕರೆದುಕೊಂಡು ಹೋಗಿದ್ದರು. ಆದರೆ, ಕುಣಿಬೆಳಕೆರೆ ಗ್ರಾಮಸ್ಥರು ತಮ್ಮ ಕೋಣ ಸುಮಾರು 8 ವರ್ಷ ಪ್ರಾಯದ್ದು, ಕರಿಯಮ್ಮ ದೇವರಿಗೆ ಬಿಟ್ಟಿದ್ದೇವೆ ಎಂದು ಹೇಳಿದ್ದಾರೆ. 

ಇದಕ್ಕೆ ಪ್ರತಿಯಾಗಿ ಕುಳಗಟ್ಟೆ ಗ್ರಾಮಸ್ಥರು, ತಮ್ಮ ಕೋಣ 3-4 ವರ್ಷ ಪ್ರಾಯದ್ದು, ಗ್ರಾಮ ದೇವತೆಗೆ ಬಿಟ್ಟಿದ್ದೇವೆ ಎಂದು ಬಿಗಿಪಟ್ಟು ಹಿಡಿದಿದ್ದಾರೆ.

ಈ ಸಂಬಂಧ ಎರಡೂ ಗ್ರಾಮಗಳ ಜನರು ತಮ್ಮ ತಮ್ಮ ಠಾಣಾ ವ್ಯಾಪ್ತಿಯ ಮಲೇಬೆನ್ನೂರು ಹಾಗೂ ಹೊನ್ನಾಳಿ ಪೊಲೀಸರಿಗೆ ದೂರು ನೀಡಿದ್ದಾರೆ.

ಪಶುವೈದ್ಯ ಅರವಿಂದ ಅವರು ಹಲ್ಲಿನ ಪರೀಕ್ಷೆ ನಡೆಸಿ ಕೋಣ 6 ವರ್ಷ ಪ್ರಾಯ ಎಂದು ಅಂದಾಜು ಮಾಡಿದ್ದಾರೆ. ಕೋಣವನ್ನು ಸದ್ಯ ಶಿವಮೊಗ್ಗದ ಗೋಶಾಲೆಯಲ್ಲಿ ಇರಿಸಲಾಗಿದೆ. ವಿವಾದ ಇತ್ಯರ್ಥ ಸಂಬಂದ ಸೋಮವಾರ ಪೊಲೀಸರ ಸಮ್ಮುಖದಲ್ಲಿ ಸಭೆ ನಡೆಯಲಲಿದೆ ಎಂದು ‘ಪ್ರಜಾವಾಣಿʼಗೆ ಮೂಲಗಳು ತಿಳಿಸಿವೆ.