ಕಲಘಟಗಿ: ಮಂಗನ ಹಿಡಿಯಲು ಹರಸಾಹಸ

ಕಲಘಟಗಿ: ಪಟ್ಟಣದ ವಿದ್ಯಾಗಿರಿ ರಸ್ತೆಯಲ್ಲಿ ಮಂಗವೊಂದು ನಾಲ್ಕು ದಿನಗಳಿಂದ ಕೆಲವರ ಮೇಲೆ ದಾಳಿ ಮಾಡಿ ಗಾಯಗೊಳಿಸಿದ್ದು, ಅದನ್ನು ಹಿಡಿಯಲು ಅರಣ್ಯ ಇಲಾಖೆ ಸಿಬ್ಬಂದಿ ಹಾಗೂ ತಜ್ಞರು ಹರಸಾಹಸ ಪಡುತ್ತಿದ್ದಾರೆ.

ಕೆಲವು ಮಹಿಳೆಯರಿಗೆ ಮಂಗವು ಕೈ, ಕಾಲುಗಳಿಗೆ ಗಾಯಗೊಳಿಸಿದೆ. ಮನೆಯ ಒಳಗೂ ನುಗ್ಗುವುದರಿಂದ ಭಯದ ವಾತಾವರಣ ಉಂಟಾಗಿದೆ.

ಪಟ್ಟಣದ ಖಾನಹೊಂಡ, ಪಾಲ್ಕಾರಚಾಳ, ಜನತಾ ಇಂಗ್ಲಿಷ್ ಸ್ಕೂಲ್, ಮಾರುಕಟ್ಟೆ ಸೇರಿದಂತೆ ವಿವಿಧ ಕಡೆ ಮಂಗ ಓಡಾಡುತ್ತಿರುವುದರಿಂದ ಸೆರೆ ಹಿಡಿಯುವುದು ಕಷ್ಟವಾಗಿದೆ.

‘ಮಂಗನ ಹಿಡಿಯುವವರನ್ನು ಕರೆಸಲಾಗಿತ್ತು. ಬೆಳಿಗ್ಗೆಯಿಂದ ಸಂಜೆಯವರೆಗೆ ಕಾರ್ಯಚಾರಣೆ ಮಾಡಿದರೂ ಸಿಕ್ಕಿಲ್ಲ. ಅರಣ್ಯ ಇಲಾಖೆಯವರು ನಮ್ಮಲ್ಲಿ ಮಂಗ ಹಿಡಿಯುವ ಸಿಬ್ಬಂದಿ ಇಲ್ಲ ಎನ್ನುತ್ತಾರೆ. ಇನ್ನೊಮ್ಮೆ ಮಂಗ ಹಿಡಿಯುವವರ ಕರೆಯಿಸಲಾಗುವುದು’ ಎಂದು ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ಚಂದ್ರಶೇಖರ ಬಿ. ಹೇಳಿದರು.