ಧಾರವಾಡ ತೋಟದಲ್ಲಿ ಬೆಳೆದ ಈ ಮಿಯಾ ಜಾಕಿ ಮಾವಿನ ಹಣ್ಣಿನ ಬೆಲೆ ₹10 ಸಾವಿರ!

ಧಾರವಾಡ: ನಗರದಲ್ಲಿ ಆಯೋಜಿಸಿರುವ ಮಾವು ಮೇಳದಲ್ಲಿ ‘ಮಿಯಾ ಜಾಕಿ’ ಮಾವಿನ ಹಣ್ಣು ಪ್ರದರ್ಶಿಸಲಾಗಿದ್ದು, ಒಂದು ಹಣ್ಣಿನ ಬೆಲೆ ಬರೋಬ್ಬರಿ ₹ 10 ಸಾವಿರ.

ಕಡುಕೆಂಪು ಸೇಬಿನ ಬಣ್ಣದ ಈ ವಿದೇಶಿ ತಳಿಯ ಹಣ್ಣು ಮೇಳದ ಪ್ರಮುಖ ಆಕರ್ಷಣೆಯಾಗಿದೆ. ಬೆಳಗಾರ ಪ್ರಮೋದ ಗಾಂವ್ಕರ ಅವರು ಕಲಕೇರಿಯ ತೋಟದಲ್ಲಿ ಈ ಮಾವು ಬೆಳೆದಿದ್ಧಾರೆ.

‘ಮಿಯಾ ಜಾಕಿ ಮಾವು ಜಪಾನ್‌ನ ತಳಿ. 2012ರಲ್ಲಿ ಮಹಾರಾಷ್ಟ್ರದ ರತ್ನಗಿರಿಯ ನರ್ಸರಿಯಿಂದ ಎರಡು ಗಿಡ ತಂದು ಬೆಳೆಸಿದ್ದೇನೆ. ಈ ವರ್ಷ 25 ಮಾವಿನ ಕಾಯಿ ಫಸಲು ಇದೆ. ಕಾಯಿ ಚೆನ್ನಾಗಿ ಬಲಿಯಲು 150 ದಿನ ಹಿಡಿಯುತ್ತದೆ. ಹಣ್ಣು ಒಂದು ತಿಂಗಳವರೆಗೆ ಹಾಳಾಗಲ್ಲ’ ಎಂದು ಬೆಳೆಗಾರ ಪ್ರಮೋದ ಗಾಂವ್ಕರ ‘ಪ್ರಜಾವಾಣಿ‘ಗೆ ತಿಳಿಸಿದರು.

‘ಈ ಹಣ್ಣು ಬಹಳ ಸಿಹಿ ಮತ್ತು ತುಂಬಾ ರುಚಿಯಾಗಿರುತ್ತದೆ. ಮುಂಬೈ, ಪುಣೆ ಮೊದಲಾದ ಕಡೆಗಳ ಗ್ರಾಹಕರು ಆನ್‌ಲೈನ್‌ನಲ್ಲಿ ಬುಕ್‌ ಮಾಡಿ ಈ ಹಣ್ಣು ಖರೀದಿಸುತ್ತಾರೆ. ಧಾರವಾಡ ಭಾಗದ ಹವಾಗುಣಕ್ಕೆ ಈ ತಳಿಯ ಗಿಡಗಳು ಚೆನ್ನಾಗಿ ಬೆಳೆಯುತ್ತವೆ’ ಎಂದು ಅವರು ತಿಳಿಸಿದರು.