ರೋಣ: ಮಳೆಯ ಕೊರತೆ ಚಿಂತೆ ನಡುವೆ ರೈತರನ್ನು ಹೈರಾಣಾಗಿಸುತ್ತಿರುವ ಜಿಂಕೆಗಳು

ರೋಣ: ಪ್ರಸಕ್ತ ಸಾಲಿನಲ್ಲಿ ಪೂರ್ವ ಮುಂಗಾರು ಚೆನ್ನಾಗಿದ್ದು, ರೈತಾಪಿ ವರ್ಗದಲ್ಲಿ ಸಂತಸ ಉಂಟು ಮಾಡಿದೆ. ಪ್ರಮುಖ ಆಹಾರ ಬೆಳೆಗಳಾದ ಹೆಸರು, ಮೆಕ್ಕೆಜೋಳ ಬಿತ್ತನೆ ಕೂಡ ಪ್ರಾರಂಭವಾಗಿದೆ. ಆದರೆ, ತಾಲ್ಲೂಕಿನಾದ್ಯಂತ ಹೆಚ್ಚುತ್ತಿರುವ ಕೃಷ್ಣಮೃಗಗಳ ಹಾವಳಿಗೆ ರೈತರು ತೊಂದರೆಅನುಭವಿಸುತ್ತಿದ್ದಾರೆ.

ರೋಣ ತಾಲ್ಲೂಕು ಸೇರಿದಂತೆ ಸಮೀಪದಲ್ಲಿರುವ ಸವಡಿ ಚಿಕ್ಕಮಣ್ಣೂರು, ಜಕ್ಕಲಿ, ಹಿರೇಮಣ್ಣೂರು, ಕೊತಬಾಳ, ಮುಗಳಿ, ಜಿಗಳೂರು, ಹೊಸಳ್ಳಿ, ಕುರಟ್ಟಿ ಗ್ರಾಮಗಳ ಜಮೀನುಗಳಲ್ಲಿ ಹೆಸರು ಬೆಳೆ ಮೊಳಕೆಯೊಡೆದು, ಸಸಿ ಹಂತ ತಲುಪಿದೆ. ಈ ಮಧ್ಯೆ ಕೃಷ್ಣಮೃಗಗಳ ಹಾವಳಿಗೆ ರೈತರು ಕಂಗಾಲಾಗಿದ್ದಾರೆ.

ರೋಣ ಭಾಗದ ಪ್ರಮುಖ ಬೆಳೆಯಾದ ಹೆಸರು ರೈತರಿಗೆ ಆದಾಯ ತಂದುಕೊಡುತ್ತದೆ. ಕಳೆದ ಕೆಲವು ವರ್ಷಗಳಿಂದ ಕಡಿಮೆಯಾಗಿದ್ದ ಕೃಷ್ಣಮೃಗಗಳ ಹಾವಳಿ ಇತ್ತೀಚೆಗೆ ವ್ಯಾಪಕವಾಗಿದ್ದು, ಬೆಳಿಗ್ಗೆ ಮತ್ತು ಸಂಜೆ ಕೃಷ್ಣಮೃಗಗಳನ್ನು ಕಾಯುವುದೇ ರೈತರ ಕೆಲಸವಾಗಿದೆ.

ಕೃಷ್ಣಮೃಗಗಳ ನಿಯಂತ್ರಣಕ್ಕೆ ಕ್ರಮ ಕೈಗೊಳ್ಳಬೇಕಾದ ಅರಣ್ಯ ಇಲಾಖೆ ಮತ್ತು ಕೃಷಿ ಇಲಾಖೆಗಳು ಈ ಕುರಿತು ಮೌನವಹಿಸಿರುವುದು ರೈತರನ್ನು ಮತ್ತಷ್ಟು ಚಿಂತೆಗೀಡು ಮಾಡಿದೆ. ಕೃಷ್ಣಮೃಗಗಳ ಹಾವಳಿಗೆ ಕಡಿವಾಣ ಹಾಕಲು ಬೇಕಾದ ವೈಜ್ಞಾನಿಕ ಸಲಕರಣೆ ವಿತರಣೆಗೆ ಇಲಾಖೆಗಳು ಮುಂದಾಗಿಲ್ಲ. ಜತೆಗೆ ದುಬಾರಿ ಬೆಲೆ ತೆತ್ತು ಬಿತ್ತನೆ ಬೀಜ, ರಸಗೊಬ್ಬರ ಸೇರಿದಂತೆ ಈಗಾಗಲೇ ಸಾಕಷ್ಟು ಖರ್ಚು ಮಾಡಿರುವ ರೈತರನ್ನು ಒಂದು ಕಡೆ ಮಳೆಯ ಕೊರತೆಯ ಚಿಂತೆ ಕಾಡುತ್ತಿದ್ದರೆ; ಮತ್ತೊಂದೆಡೆ ಕೃಷ್ಣಮೃಗಗಳ ಹಾವಳಿ ರೈತರನ್ನು ಹೈರಾಣಾಗಿಸುತ್ತಿದೆ. ಕೂಡಲೇ ಕೃಷ್ಣ ಮೃಗಗಳ ಹಾವಳಿ ತಡೆಯಲು ಇಲಾಖೆಗಳು ಮುಂದಾಗಬೇಕು ಎಂದು ರೈತರು ಆಗ್ರಹಿಸಿದ್ದಾರೆ.