Yettinahole | ಅರಸೀಕೆರೆ ತಲುಪದ ಎತ್ತಿನಹೊಳೆ ನೀರು

ಹಾಸನ: ಬಯಲು ಸೀಮೆಯ ಜಿಲ್ಲೆಗಳಿಗೆ ಹರಿಸಲು ರೂಪಿಸಿರುವ ಎತ್ತಿನಹೊಳೆ ಯೋಜನೆಯ ನೀರು ಜಿಲ್ಲೆಯ ಅರಸೀಕೆರೆ ತಾಲ್ಲೂಕನ್ನೇ ತಲುಪಿಲ್ಲ. ತನಗೆ ಸೇರಿದ ಜಾಗದಲ್ಲಿ ಕಾಲುವೆ ನಿರ್ಮಿಸಲು ಅರಣ್ಯ ಇಲಾಖೆ ತಕರಾರು ಎತ್ತಿದ್ದು, ‘ಈ ಬಾರಿಯ ಮಳೆಗಾಲದಲ್ಲೂ ಯೋಜನೆಯ ನೀರು ವ್ಯರ್ಥವಾಗಿ ಹಳ್ಳ ಸೇರಲಿದೆ’ ಎಂಬ ಆತಂಕ ಮನೆ ಮಾಡಿದೆ.

ಸಕಲೇಶಪುರ ತಾಲ್ಲೂಕಿನ 8 ಕಡೆಗಳಲ್ಲಿ ವೀಯರ್‌ (ಚೆಕ್‌ಡ್ಯಾಂ)ಗಳನ್ನು ನಿರ್ಮಿಸಿ ನೀರು ಸಂಗ್ರಹಿಸಲಾಗುತ್ತಿದೆ. ಅದನ್ನು ಪೈಪ್‌ಲೈನ್‌ ಮೂಲಕ ಆಲೂರು, ಬೇಲೂರು, ಅರಸೀಕೆರೆ ತಾಲ್ಲೂಕುಗಳ ಮೂಲಕ ತುಮಕೂರು ಜಿಲ್ಲೆಗೆ ಹರಿಸಲಾಗುತ್ತಿದೆ. ಆದರೆ, ಬೇಲೂರು ತಾಲ್ಲೂಕಿನ ಐದಳ್ಳ ಕಾವಲು ಬಳಿ ಅರಣ್ಯ ಇಲಾಖೆಯ ಜಾಗದಲ್ಲಿ ಕಾಲುವೆ ನಿರ್ಮಾಣಕ್ಕೆ ತೊಂದರೆ ಎದುರಾಗಿದೆ.

ಕಳೆದ ಬಾರಿ ಯೋಜನೆಯ ಮೂಲಕ ಹರಿದ ನೀರು, ತೋಟಗಳಿಗೆ ನುಗ್ಗಿ, ರೈತರು ಆಕ್ರೋಶ ವ್ಯಕ್ತಪಡಿಸಿದ್ದರಿಂದ ನೀರು ಎತ್ತುವುದನ್ನು ನಿಲ್ಲಿಸಲಾಗಿತ್ತು. ಇದೀಗ ಮಳೆಗಾಲ ಆರಂಭವಾಗುತ್ತಿದ್ದು, ಕಾಲುವೆ ಕಾಮಗಾರಿ ಪೂರ್ಣಗೊಳ್ಳದಿರುವುದರಿಂದ ಈ ಬಾರಿಯೂ ನೀರು ವ್ಯರ್ಥವಾಗಿ ಹರಿಯಲಿದೆ.

ವಾಣಿ ವಿಲಾಸ ಸೇರದ ನೀರು: ಕಾಲುವೆ ಕಾಮಗಾರಿ ಅರ್ಧಕ್ಕೆ ನಿಂತಿರುವುದರಿಂದ ಯೋಜನೆಯ ನೀರನ್ನು ಸದ್ಯಕ್ಕೆ ವೇದಾವತಿ ವ್ಯಾಲಿಯ ಮೂಲಕ ಚಿತ್ರದುರ್ಗದ ವಾಣಿವಿಲಾಸ ಸಾಗರಕ್ಕೆ ಹರಿಸುವುದಾಗಿ ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಹೇಳಿದ್ದರು. ಆದರೆ, ಕಳೆದ ಬಾರಿ ಎತ್ತಿದ 1.5 ಟಿಎಂಸಿ ನೀರು ಸೇರಿದ್ದು ಮಾತ್ರ ರೈತರ ತೋಟಗಳು, ಕೆರೆಗಳಿಗೆ.

‘ಕೋಟ್ಯಂತರ ರೂಪಾಯಿ ವ್ಯಯಿಸಿ ವೀಯರ್‌ಗಳು, ವಿದ್ಯುತ್‌ ಕೇಂದ್ರ, ಪೈಪ್‌ಲೈನ್ ಅಳವಡಿಸಲಾಗಿದೆ. ಅವುಗಳನ್ನು ಉಪಯೋಗಿಸಿಕೊಳ್ಳದಿದ್ದರೆ ಹಾಳಾಗುತ್ತವೆ. ಹಾಗಾಗಿ ಈ ಬಾರಿಯೂ ಪೈಪ್‌ಲೈನ್‌ನಲ್ಲಿ ನೀರು ಹರಿಸಲಾಗುವುದು. ಆದರೆ, ಈ ನೀರು ವ್ಯರ್ಥವಾಗಲಿದೆ ಎನ್ನುವುದು ಅಷ್ಟೇ ಸತ್ಯ’ ಎಂದು ಹೆಸರು ಬಹಿರಂಗ ಪಡಿಸಲು ಇಚ್ಛಿಸದ ಯೋಜನೆಯ ಎಂಜಿನಿಯರ್‌ ತಿಳಿಸಿದರು.

ಸಾಕಾರದ ಬದಲು ವ್ಯರ್ಥ

‘ಎತ್ತಿನಹೊಳೆ ಯೋಜನೆಯಿಂದ ನೀರು ವ್ಯರ್ಥವಾಗುತ್ತಿದೆಯೇ ಹೊರತು ಸದುಪಯೋಗ ಆಗುತ್ತಿಲ್ಲ’ ಎನ್ನುವ ಮಾತುಗಳು ಪರಿಸರವಾದಿಗಳಿಂದ ಕೇಳಿ ಬರುತ್ತಿವೆ. ‘ಇದು ಅವೈಜ್ಞಾನಿಕ ಯೋಜನೆ ನದಿ ಮೂಲ ನಾಶವಾಗುತ್ತದೆ ಎಂದು ಪ್ರಾರಂಭದಲ್ಲಿಯೇ ಹೇಳಿದ್ದೆವು. ಕೇವಲ 5–6 ಟಿಎಂಸಿ ಮಾತ್ರ ಸಿಗಲಿದೆ. ಇದು ಸಾಕಾಗುವುದಿಲ್ಲ ಎಂದು ಶರಾವತಿ ನೀರು ಸೇರಿಸಲು ಹೊರಟಿದ್ದಾರೆ. ಯೋಜನೆ ವಿಸ್ತರಿಸಿ ಗಿರಿಹೊಳೆ ಅಡ್ಡಹೊಳೆ ಸೇರಿಸಲು ಮುಂದಾಗಿದ್ದಾರೆ. ಮತ್ತಷ್ಟು ಅರಣ್ಯ ನಾಶವಾಗಲಿದ್ದು ಆನೆ– ಮಾನವ ಸಂಘರ್ಷ ವಿಪರೀತವಾಗಲಿದೆ’ ಎಂದು ಮಲೆನಾಡು ಜನಪರ ಹೋರಾಟ ಸಮಿತಿ ಅಧ್ಯಕ್ಷ ಕಿಶೋರ್‌ಕುಮಾರ್ ಆತಂಕ ವ್ಯಕ್ತಪಡಿಸಿದ್ದಾರೆ.