ಕೆಸರಿನ ಹೆದ್ದಾರಿಯಲ್ಲಿ ಸಿಲುಕಿದ ಬಸ್‌

ಕಾಳಗಿ: ಕಾಳಗಿ ಮತ್ತು ಕೋಡ್ಲಿ ನಡುವಿನ ರಾಜ್ಯಹೆದ್ದಾರಿ-125 (ಫಿರೋಜಾಬಾದ್‌- ಕಮಲಾಪುರ) ಕಾಮಗಾರಿ ಬಹುದಿನಗಳಿಂದ ಅರ್ಧಕ್ಕೆ ನಿಂತು ನನೆಗುದಿಗೆ ಬಿದ್ದಿದೆ. ಪರಿಣಾಮ ಬುಧವಾರ ಸರ್ಕಾರಿ ಬಸ್ಸೊಂದು ಸಿಲುಕಿದ್ದು, ಪ್ರಯಾಣಿಕರು ಪರದಾಡುವಂತಾಯಿತು.

‘ಕಾಳಗಿಯಲ್ಲಿ ಲೋಕೋಪಯೋಗಿ ಇಲಾಖೆ ಉಪವಿಭಾಗ ಹೊಂದಿದ್ದರೂ ಈ ಕಾಮಗಾರಿಯ ಸಂಪೂರ್ಣ ನಿರ್ವಹಣೆಯನ್ನು ಬೀದರ್ ಜಿಲ್ಲೆಯ ಹುಮನಾಬಾದ್‌ ರಾಷ್ಟ್ರೀಯ ಹೆದ್ದಾರಿ ಉಪವಿಭಾಗಕ್ಕೆ ನೀಡಲಾಗಿದೆ’ ಎಂಬುದು ಸಾರ್ವಜನಿಕರ ಆರೋಪ.

ಕಾಳಗಿ-ಕೋಡ್ಲಿ ನಡುವೆ 5 ಕಿ.ಮೀ ಅಂತರವಿದೆ. ಚಿಂಚೋಳಿ-ಕಲಬುರಗಿ ಸಂಪರ್ಕ ಮಾರ್ಗ ಕೂಡ ಇದು. ಇಲ್ಲಿ ವಾಹನಗಳ ಸಂಚಾರ ಹೆಚ್ಚಿರುತ್ತದೆ. ಕೆಲ ತಿಂಗಳ ಹಿಂದೆ ಕಾಳಗಿಯಿಂದ ಲಕ್ಷ್ಮಣನಾಯಕ ತಾಂಡಾದವರೆಗೆ 2.5 ಕಿ.ಮೀ ಮಾತ್ರ ಹೆದ್ದಾರಿ ಕಾಮಗಾರಿ ಪೂರ್ಣಗೊಳಿಸಿ ಇನ್ನುಳಿದ ಅಲ್ಲಲ್ಲಿ 6-8 ಅಡಿ ಎತ್ತರದಲ್ಲಿ ತಗ್ಗು ತೋಡಿ ಹಾಗೆ ಬಿಡಲಾಗಿದೆ.

ಚಿಂಚೋಳಿ ತಾಲ್ಲೂಕಿನ ವಿವಿಧ ಇಲಾಖೆ ಅಧಿಕಾರಿಗಳು, ಜನಪ್ರತಿನಿಧಿಗಳು ನಿತ್ಯ ಈ ರಸ್ತೆ ಮಾರ್ಗದಲ್ಲೇ ಓಡಾಡುತ್ತಾರೆ. ಇನ್ನು ಬೀದರ್‌ ಜಿಲ್ಲೆಯ ಚಿಟಗುಪ್ಪ, ಹುಮನಾಬಾದ್‌ ತಾಲ್ಲೂಕುಗಳ ಪ್ರಯಾಣಿಕರಿಗೂ ಇದೇ ಮಾರ್ಗ ಅನುಕೂಲ. ಮಳೆ ಬಂದರೆ ಈ ಸ್ಥಳ ಸಂಪೂರ್ಣ ಕೆಸರು ಗದ್ದೆಯಾಗಿ ಮಾರ್ಪಟ್ಟು ವಾಹನಗಳ ಸಂಚಾರಕ್ಕೆ ತುಂಬಾ ತೊಂದರೆ ಉಂಟಾಗುತ್ತದೆ. ಹಗಲು ಹೊತ್ತಿನಲ್ಲಿ ಹೇಗಾದರೂ ಪ್ರಯಾಣಿಸುವ ಜನರು, ರಾತ್ರಿ ವೇಳೆ ಇಲ್ಲದ ತೊಂದರೆಗಳನ್ನು ಅನುಭವಿಸುತ್ತಾರೆ. ಈ ಪರಿಸ್ಥಿತಿ ತಲೆದೋರಿ ಆರು ತಿಂಗಳು ಉರುಳುತ್ತಿದ್ದರೂ ಕಾಮಗಾರಿ ಮಾತ್ರ ಪ್ರಗತಿ ಕಾಣದೆ ಪ್ರಯಾಣಿಕರು ಹೈರಾಣಾಗುತ್ತಿದ್ದಾರೆ.

ಇಷ್ಟಾದರೂ ಸಂಬಂಧಪಟ್ಟ ಅಧಿಕಾರಿಗಳಾಗಲಿ, ಜನಪ್ರತಿನಿಧಿಗಳಾಗಲಿ ಕ್ಯಾರೇ ಎನ್ನುತ್ತಿಲ್ಲ ಎಂದು ವಾಹನ ಸವಾರರು ದೂರಿದ್ದಾರೆ. ಆಗುವ ಅನಾಹುತಗಳಿಗೆ ಹೊಣೆ ಯಾರು? ಎಂದು ಪ್ರಶ್ನಿಸಿದ್ದಾರೆ.