ಕಲಬುರಗಿ: ಶಾಲೆಗಳಲ್ಲಿ ಮತ್ತೆ ಆರಂಭವಾದ ಚಿಣ್ಣರ ಕಲರವ

ಕಲಬುರಗಿ: ಜಿಲ್ಲೆಯ ಎಲ್ಲ 772 ಶಾಲೆಗಳಲ್ಲೂ 1ರಿಂದ 5ನೇ ತರಗತಿಗಳು ಸೋಮವಾರ ಆರಂಭವಾದವು. ಬಹುಪಾಲು ಶಾಲೆಗಳಲ್ಲಿ ಮೊದಲ ದಿನವೇ ಮಕ್ಕಳ ಉತ್ತಮ ಹಾಜರಾತಿ ಕಂಡುಬಂತು. ಎರಡು ವರ್ಷಗಳ ನಂತರ ಶಾಲೆಗಳಲ್ಲಿ ಚಿಣ್ಣರ ಕಲರವ ಕೇಳಿಸಿತು.

ಬೆಳಿಗ್ಗೆ 10ರ ಸುಮಾರಿಗೆ ಪಾಲಕರು ತಮ್ಮ ಮಕ್ಕಳನ್ನು ಶಾಲೆಗಳತ್ತ ಕರೆತಂದರು. ಆವರಣದಲ್ಲಿ ರಾಷ್ಟ್ರಗೀತೆ ಹಾಡಿದ ಬಳಿಕ ಮಕ್ಕಳು ತರಗತಿಗಳತ್ತ ಓಡಿದರು.

ಹಲವು ಕಡೆ ತಳಿರು ತೋರಣಗಳಿಂದ ಶಾಲೆಗಳನ್ನು ಅಲಂಕಾರ ಮಾಡಿ, ಶಿಕ್ಷಕರು ಮಕ್ಕಳಿಗೆ ಹೂ ನೀಡಿ ಸ್ವಾಗತಿಸಿದರು.

ನೋಡಿ:ರಾಜ್ಯದಾದ್ಯಂತ 1ರಿಂದ 5ನೇ ತರಗತಿ ಆರಂಭ: ಚಿತ್ರಗಳಲ್ಲಿ ನೋಡಿ

ಮತ್ತೆ ಕೆಲವು ಖಾಸಗಿ ಶಾಲೆಗಳಲ್ಲಿ ಪುಟಾಣಿಗಳಿಗೆ ಪುಷ್ಪಾರ್ಚನೆ ಮಾಡಿ, ಕೈಗಳಿಗೆ ಸ್ಯಾನಿಟೈಸರ್ ನೀಡಿ, ಥರ್ಮಲ್ ಸ್ಕ್ರೀನಿಂಗ್ ಮಾಡಿ ಒಳಗೆ ಬಿಡಲಾಯಿತು.

ಬಹಳ ದಿನಗಳ ನಂತರ ಗೆಳೆಯರೊಂದಿಗೆ ಬೆರೆತ ಪುಟಾಣಿಗಳು ಆಟವಾಡಿ ನಲಿದರು.