ತಡಕಲ: ಗ್ರಾ.ಪಂ ಸಾಮಾನ್ಯ ಸಭೆ ರದ್ದು

ಆಳಂದ: ತಾಲ್ಲೂಕಿನ ತಡಕಲ ಗ್ರಾಮ ಪಂಚಾಯಿತಿಯಲ್ಲಿ ಮಂಗಳವಾರ ಕರೆದಿದ್ದ ಸದಸ್ಯರ ಸಾಮಾನ್ಯ ಸಭೆ ರದ್ದಾಗಿದೆ.

ಪಿಡಿಒ ಅವರು ಮಂಗಳವಾರಕರೆದಿದ್ದ ಸಭೆಯಲ್ಲಿ ಅಧ್ಯಕ್ಷ ಸೇರಿ 13 ಜನ ಸದಸ್ಯರ ಗೈರಾಗಿದ್ದರಿಂದ ಸಭೆಯು ರದ್ದುಪಡಿಸಲಾಗಿದೆ. ಒಟ್ಟು 19 ಸದಸ್ಯ ಬಲದ ಪಂಚಾಯಿತಿಯಲ್ಲಿ ಇಂದಿನ ಸಭೆಗೆ 6 ಜನ ಸದಸ್ಯರು ಮಾತ್ರ ಹಾಜರಿದ್ದರು.

ಎಲ್ಲ ಸದಸ್ಯರಿಗೂ ನೋಟಿಸ್ ಕಳುಹಿಸಿ ಕೊಡಲಾಗಿತ್ತು. ಸಭೆಯಲ್ಲಿ 15ನೇ ಹಣಕಾಸು ಯೋಜನೆ ಕುರಿತು ಹಾಗೂ ಗ್ರಾಮ ಪಂಚಾಯಿತಿಯ ವಿವಿಧ ಅಭಿವೃದ್ಧಿ ಕಾರ್ಯಗಳ ಕುರಿತು ಚರ್ಚೆ ವಿಷಯಗಳಿದ್ದವು.

ಪಿಡಿಒ ಹಾಗೂ ಹಾಜರಿದ್ದ ಸದಸ್ಯರು, ಅಧ್ಯಕ್ಷೆ ಮತ್ತು ಉಪಾಧ್ಯಕ್ಷರು ಹಾಗೂ ಉಳಿದ ಸದಸ್ಯರಿಗಾಗಿ ಕಾದು ಕುಳಿತರು. ತಡವಾದರೂ ಸಭೆಗೆ ಹಾಜರಾಗಿದ್ದ ಕಾರಣ ಪಿಡಿಒ ಮೊಬೈಲ್ ಮೂಲಕ ಸಂಪರ್ಕಿಸಿದರೂ ಸಹ ಹಾಜರಾಗಲಿಲ್ಲ. ಅಂತಿಮವಾಗಿ ಪಿಡಿಒ ಪಾರ್ವತಿ ಅವರು ಕೋರಂ ಕೊರತೆ ಕಾರಣದಿಂದ ಸಭೆ ಮುಂದೂಡಿದರು.

ಸಭೆಯಲ್ಲಿ ಹಾಜರಿದ್ದ ಸದಸ್ಯರಾದ ನಾಗೇಂದ್ರ ತಾಂಬೆ, ಮಹಾನಂದ ತುಕಾಣೆ, ವಿಶ್ವನಾಥ ಪವಾಡಶೆಟ್ಟಿ, ಶರಣಪ್ಪ ಜಮದಾರಮ ಬಸವರಾಜ ಬೆಳಮಗಿ, ಪಾರ್ವತಿ ಎನ್ ತಾಂಬೆ ಅವರು ‘ಕಳೆದ ಒಂದು ವರ್ಷದಿಂದ ಸಾಮಾನ್ಯ ಸಭೆ ನಡೆಸುತ್ತಿಲ್ಲ, ಸಭೆ ಕರೆಯದೆ, ಅಭಿವೃದ್ಧಿ ಕಾರ್ಯಗಳ ಕುರಿತು ಚರ್ಚೆ ಕೈಗೊಳ್ಳದೆ ಪಂಚಾಯಿತಿ ಅನುದಾನ ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ’ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಪಂಚಾಯಿತಿಯಲ್ಲಿ ತಾರತಮ್ಯ ಮಾಡುತ್ತಿದ್ದ ಕೆಲ ಸದಸ್ಯರ ವಾರ್ಡ್‌ಗಳ ಸಮಸ್ಯೆಗೆ ಸ್ಪಂದಿಸುತ್ತಿಲ್ಲ, ಈ ಸಂಬಂಧ ಜಿ. ಪಂ ಸಿಇಒ ಅವರಿಗೆ ಮನವಿ ಸಲ್ಲಿಸಿ ತಡಕಲ ಗ್ರಾ.ಪಂ ಅಧ್ಯಕ್ಷ, ಉಪಾಧ್ಯಕ್ಷರು ಸತತ ಸಭೆಗೆ ಹಾಜರಾಗದೇ ಅಗೌರವ ತೋರಿಸುತ್ತಿದ್ದಾರೆ, ಇದರಿಂದ ಅಭಿವೃದ್ದಿ ಕಾರ್ಯಗಳಿಗೆ ಅಡ್ಡಿಯಾಗಿದೆ ಎಂದು ದೂರು ಸಲ್ಲಿಸಿ ಅಗತ್ಯ ಕ್ರಮಕ್ಕೆ ಒತ್ತಾಯಿಸಲಾಗುವುದು ಎಂದು ನಾಗೇಂದ್ರ ತಾಂಬೆ, ವಿಶ್ವನಾಥ ಪವಾಡಶೆಟ್ಟಿ
ತಿಳಿಸಿದರು.