ಹಾರಂಗಿ ಜಲಾಶಯದಿಂದ 4,827ಕ್ಯುಸೆಕ್‌ ನೀರು ನದಿಗೆ

ಕುಶಾಲನಗರ: ಕೊಡಗು ಜಲ್ಲೆಯ ಹಾರಂಗಿ ಜಲಾನಯನ ಪ್ರದೇಶದಲ್ಲಿ ಧಾರಾಕಾರವಾಗಿ ಮಳೆ ಸುರಿಯುತ್ತಿದ್ದು, ಜಲಾಶಯಕ್ಕೆ ಒಳಹರಿವಿನ ಪ್ರಮಾಣದಲ್ಲಿ ಗಣನೀಯವಾಗಿ ಏರಿಕೆ ಕಂಡು ಬಂದಿರುವ ಹಿನ್ನೆಲೆಯಲ್ಲಿ ಸೋಮವಾರ ಸಂಜೆ ಜಲಾಶಯದಿಂದ 4,827 ಕ್ಯುಸೆಕ್ ನೀರನ್ನು ನದಿಗೆ ಹರಿಬಿಡಲಾಗಿದೆ.

2,859 ಗರಿಷ್ಠ ಸಾಮರ್ಥ್ಯದ ಜಲಾಶಯದಲ್ಲಿ ಸೋಮವಾರ ಸಂಜೆ 2856.61 ಅಡಿ ನೀರು ಸಂಗ್ರಹಗೊಂಡಿತು. ಜಲಾಶಯಕ್ಕೆ 3,937 ಕ್ಯುಸೆಕ್ ಒಳಹರಿವು ಇತ್ತು. ಜಲಾಶಯ ನಾಲ್ಕು ಕ್ರಸ್ಟ್ ಗೇಟ್‌ಗಳ ಮೂಲಕ 3,827 ಕ್ಯುಸೆಕ್ ಹಾಗೂ ನಾಲೆಗಳ ಮೂಲಕ 1,000 ಕ್ಯುಸೆಕ್‌ ನೀರು ಹರಿಸಲಾಗುತ್ತಿದೆ ಎಂದು ಅಣೆಕಟ್ಟೆ ವಿಭಾಗದ ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ ಮಹೇಂದ್ರ ತಿಳಿಸಿದರು.