168 ವರ್ಷಗಳ ಸುದೀರ್ಘ ಇತಿಹಾಸ ಹೊಂದಿರುವ ಆನಂದಪುರದ ಐತಿಹಾಸಿಕ ಕಾಂತಿ ಚರ್ಚ್

ಸಿದ್ದಾಪುರ: ಮೊಂಗ್ಲಿಂಗ್, ಕಿಟ್ಟೆಲ್ ಸಾಧನೆಯ ತಾಣ ಆನಂದಪುರದ ಐತಿಹಾಸಿಕ ಕಾಂತಿ ಚರ್ಚ್.

ಸಿದ್ದಾಪುರ ಸಮೀಪದ ಆನಂದಪುರದ ಸುಮಾರು 168 ವರ್ಷಗಳ ಐತಿಹಾಸ ಇರುವ ಕಾಂತಿ ಚರ್ಚ್ ಕನ್ನಡದ ಮೊದಲ ಪತ್ರಿಕೆ ‘ಮಂಗಳೂರು ಸಮಾಚಾರ’ವನ್ನು ಹೊರತಂದ ಹರ್ಮನ್ ಮೋಗ್ಲಿಂಗ್ ಹಾಗೂ ಕನ್ನಡ ನಿಘಂಟು ತಜ್ಞ ಕಿಟ್ಟೆಲ್ ಅವರು ಇದ್ದಂತಹ ಐತಿಹಾಸಿಕ ತಾಣ.

ಸಿದ್ದಾಪುರ ಸಮೀಪದ ಈಗಿನ ಆನಂದಪುರದ ನಿವಾಸಿ ಆನಂದರಾವ್ ಕೌಂಡಿನ್ಯ ಎಂಬುವವರು ಮೊಂಗ್ಲಿಂಗ್ ಅವರ ಭಾಷಣದಿಂದ ಪ್ರಭಾವಿತರಾಗಿ 1857 ರಲ್ಲಿ ಅವರನ್ನು ಕೊಡಗಿಗೆ ಕರೆತಂದರು. ಆನಂದರಾವ್ ಅವರಿಗೆ ಸೇರಿದ 70 ಎಕರೆ ಜಾಗದಲ್ಲಿ ಚರ್ಚ್ ಒಂದನ್ನು ನಿರ್ಮಿಸಲು ಅನುವು ಮಾಡಿದ್ದು, ಆಲಮಂಡ ಕುಟುಂಬಸ್ಥರು ಸಹಕಾರ ನೀಡಿದ ಕಾರಣ ಚರ್ಚ್‌ಗೆ ಆಲಮಂಡ ಚರ್ಚ್ ಎಂಬ ಹೆಸರು ನೀಡಲಾಗಿತ್ತು.

ಕ್ರೈಸ್ತ ಧರ್ಮಕ್ಕೆ ಮತಾಂತರಗೊಂಡ ಆನಂದರಾವ್ ಕೌಂಡಿನ್ಯ, ಬಳಿಕ ಕ್ರೈಸ್ತ ಧರ್ಮಗುರುಗಳಾದರು. ಆನಂದರಾವ್ ಅವರು ತಮ್ಮ ಜಾಗವನ್ನು ಬಾಸಿಲ್ ಮಿಷಿನ್ ಅಡಿಯಲ್ಲಿದ್ದ ಈ ಚರ್ಚ್‌ಗೆ ನೀಡಿದ್ದು, ಅವರ ಹೆಸರನ್ನೇ ಆನಂದಪುರ ಎಂದು ಗ್ರಾಮಕ್ಕೆ ನೀಡಲಾಯಿತು. ಗ್ರಾಮದ ಇತರರನ್ನು ಕ್ರೈಸ್ತ ಧರ್ಮಕ್ಕೆ ಸೇರಿಸಿ, ಎಲ್ಲರಿಗೂ ಉಚಿತ ವಿದ್ಯಾಭ್ಯಾಸ ನೀಡಲಾಗುತ್ತಿತ್ತು. ಬಳಿಕ ಆನಂದರಾವ್ ಜರ್ಮನಿಗೆ ತೆರಳಿದರು. ಸ್ವಾತಂತ್ರ್ಯ ಪೂರ್ವದಲ್ಲೇ ಆನಂದಪುರದಲ್ಲಿ ವಸತಿ ನಿಲಯವನ್ನು ಸ್ಥಾಪಿಸಿ, ಬಡ ವಿದ್ಯಾರ್ಥಿಗಳಿಗೆ ಶಿಕ್ಷಣವನ್ನು ನೀಡಲಾಗುತ್ತಿದ್ದು, ಆಗಿನ ವಸತಿ ನಿಲಯ 2015ರಲ್ಲಿ ಮುಚ್ಚಿತು.

ಮೊಂಗ್ಲಿಂಗ್ ಅವರು ಆನಂದಪುರ, ಮಡಿಕೇರಿ ಹಾಗೂ ಪಾಲಿಬೆಟ್ಟದಲ್ಲಿ ಧರ್ಮ ಪ್ರಚಾರ ಮಾಡುತ್ತಿದ್ದರೆ, ಕಿಟ್ಟೆಲ್ ಅವರು ಆನಂದಪುರದಲ್ಲೇ ತಂಗಿದ್ದರು. ಧರ್ಮ ಪ್ರಚಾರಕ್ಕಿಂತ ನಿಘಂಟು ರಚಿಸುವ ಕೆಲಸದಲ್ಲೇ ಕಿಟ್ಟೆಲ್ ಮಗ್ನರಾಗಿದ್ದರು. ಭಾನುವಾರ ಪ್ರಾರ್ಥನೆ ವೇಳೆ ಕಿಟ್ಟೆಲ್ ಧಾರ್ಮಿಕ ಭಾಷಣ ಮಾಡುತ್ತಿದ್ದರು. ಮೊಂಗ್ಲಿಂಗ್ ಹಾಗೂ ಕಿಟ್ಟೆಲ್ ತಂಗಿದ್ದ ವಸತಿ ಗೃಹಗಳು ಈಗಲೂ ಇವೆ. ಆರಂಭದಲ್ಲಿ ಹುಲ್ಲಿನ ಹೊದಿಕೆಯ ಚರ್ಚ್ ಇದ್ದು, 2014ರಲ್ಲಿ ಚರ್ಚ್ ಅನ್ನು ನವೀಕರಿಸಲಾಗಿದೆ. ಬಳಿಕ ಚರ್ಚ್‌ಗೆ ಕಾಂತಿ ಚರ್ಚ್ ಎಂದು ಮರು ನಾಮಕರಣ ಮಾಡಲಾಗಿದೆ.

ಪ್ರಸ್ತುತ ಸುಮಾರು 104 ಕುಟುಂಬಗಳು ಚರ್ಚ್ ಅಡಿಯಲ್ಲಿದ್ದು, ಕ್ರಿಸ್ಮಸ್ ಅನ್ನು ಸಡಗರದಿಂದ ಆಚರಿಸುತ್ತಿದ್ದಾರೆ.