ಶ್ರದ್ಧಾಭಕ್ತಿಯ ಅಗ್ನಿ ಚಾಮುಂಡಿ ತೆರೆ ಮಹೋತ್ಸವ

ವಿರಾಜಪೇಟೆ: ಸಮೀಪದ ಬಾಳುಗೋಡುವಿನ ಅಗ್ನಿ ಚಾಮುಂಡಿ ದೇವಿ ವಾರ್ಷಿಕ ತೆರೆ ಮಹೋತ್ಸವವು ಈಚೆಗೆ ಶ್ರದ್ಧಾಭಕ್ತಿಯಿಂದ ನಡೆಯಿತು.

ಬಾಳುಗೋಡು ಪೆರುಂಬಾಡಿ ಗ್ರಾಮದ ಚಾಮುಂಡಿ ದೇವಿಯ 31ನೇ ವಾರ್ಷಿಕ ಮಹೋತ್ಸವದ ಅಂಗವಾಗಿ ಮೊದಲ ದಿನ ಬೆಳಿಗ್ಗೆ ಗಣಪತಿ ಹೋಮ ನಡೆಯಿತು.

ಬಳಿಕ ನವ ಕಳಶ ಆಶ್ಲೇಷ ಬಲಿ ನಡೆದು ತಕ್ಕರ ಮನೆಯಿಂದ ಭಂಡಾರ ತರಲಾಯಿತು. ಬಳಿಕ ನಾಗದೇವಿಗೆ ವಿಶೇಷ ಪೂಜೆ, ದೇವರದರ್ಶನ, ನಂತರ ಚಾಮುಂಡೇಶ್ವರಿಗೆ ಅಭಿಷೇಕ ನಡೆಯಿತು. ಸಂಜೆ 7ಕ್ಕೆ ಗ್ರಾಮಸ್ಥರ ನೆರವಿನಿಂದ ದೇವಾಲಯದ ಆವರಣದಲ್ಲಿ ಬೃಹತ್ ಅಗ್ನಿಕುಂಡ ನಿರ್ಮಿಸಲಾಯಿತು.

ಕುಟ್ಟಂದಿ ಕುತ್ತುನಾಡ್ ಗ್ರಾಮದ ಕಿಶನ್ ಪಣಿಕರ್ ನೇತೃತ್ವದಲ್ಲಿ ಕ್ರಮವಾಗಿ ವಿಷ್ಣುಮೂರ್ತಿ ತೋಟಂ, ಚಾಮುಂಡಿ ಅಮ್ಮ ತೋಟಂ, ಕುಟ್ಟಿಚಾತನ್ ತೆರೆ, ಭೈರವ ತೆರೆ, ಕರಿವಾಳ್ ಭಗವತಿ ಮತ್ತು ಉಚ್ಚುಟಮ್ಮ ತೆರೆಗಳು ಮುಂಜಾನೆಯವರೆಗೆ ನಡೆಯಿತು.

ಉತ್ಸವದ 2ನೇ ದಿನದಂದು ಬೆಳಿಗ್ಗೆ ಚಾಮುಂಡಿ ವಿಷ್ಣುಮೂರ್ತಿ ಕೋಲ ನಡೆಯಿತು. ಗುಳಿಗನ್ ತೆರೆ, ಚಾಮುಂಡಿ ಅಮ್ಮ ತೆರೆ ನಡೆಯಿತು. ಎರಡು ದಿನಗಳ ಕಾಲ ನಡೆದ ಉತ್ಸವದಲ್ಲಿ ದೇವಾಲಯದ ಆಡಳಿತ ಮಂಡಳಿಯಿಂದ ಅನ್ನಸಂತರ್ಪಣೆ ನಡೆಯಿತು.

ಈ ಸಂದರ್ಭ ದೇವಾಲಯದ ಕೊಕ್ಕಲೆಮಾಡ ಮಣಿ, ಕಾರ್ಯದರ್ಶಿ ಟಿ.ಜಿ. ಗಣೇಶ್ ಭಾಗವಹಿಸಿದ್ದರು.