ಸಿಎಂ, ಡಿಸಿಎಂ: ಯಾರನ್ನು ಬೆಂಬಲಿಸಲಿ ಶಿವನೇ?: ಗೊಂದಲದಲ್ಲಿ ಸಿಲುಕಿದ ಶಾಸಕರು

ಕೋಲಾರ: ಅಧಿಕಾರ ಹಸ್ತಾಂತರ ಚರ್ಚೆ ವಿವಿಧ ಸ್ವರೂಪ ಪಡೆದುಕೊಳ್ಳುತ್ತಿದ್ದು, ಮಹತ್ವದ ಬೆಳವಣಿಗೆಯೊಂದರಲ್ಲಿ ಜಿಲ್ಲೆಯ ಇಬ್ಬರು ಪ್ರಮುಖ ಶಾಸಕರು ಗುರುವಾರ ಬೆಂಗಳೂರಿನಲ್ಲಿ ಉಪಮುಖ್ಯಮಂತ್ರಿ ಹಾಗೂ ಮುಖ್ಯಮಂತ್ರಿ ಸ್ಥಾನದ ಮೇಲೆ ಕಣ್ಣಿಟ್ಟಿರುವ ಡಿ.ಕೆ.ಶಿವಕುಮಾರ್‌ ಅವರನ್ನು ಭೇಟಿ ಮಾಡಿ ಚರ್ಚಿಸಿರುವುದು ರಾಜಕೀಯ ವಲಯದಲ್ಲಿ ಹಲವಾರು ಲೆಕ್ಕಾಚಾರಗಳಿಗೆ ಕಾರಣವಾಗುತ್ತಿದೆ.

ಮಾಲೂರು ವಿಧಾನಸಭೆ ಕ್ಷೇತ್ರದ ಕೆ.ವೈ.ನಂಜೇಗೌಡ ಹಾಗೂ ಕೋಲಾರ ವಿಧಾನಸಭಾ ಕ್ಷೇತ್ರದ ಶಾಸಕ ಕೊತ್ತೂರು ಮಂಜುನಾಥ್‌ ಸದಾಶಿವನಗರದ ನಿವಾಸದಲ್ಲಿ ದಿಢೀರ್‌ ಭೇಟಿಯಾಗಿ ಚರ್ಚಿಸಿದ್ದಾರೆ. ಅವರ ಜೊತೆಗೆ ಮುಳಬಾಗಿಲು ಕಾಂಗ್ರೆಸ್‌ ಮುಖಂಡ ಆದಿನಾರಾಯಣ, ಕುಣಿಗಲ್‌ ಶಾಸಕ ಡಾ.ರಂಗನಾಥ್‌, ಮುಖಂಡ ಪ್ರೊ.ಎಂ.ವಿ.ರಾಜೀವ್‌ ಗೌಡ ಕೂಡ ಇದ್ದರು. ನಂತರ ಕೋಲಾರದ ಇಬ್ಬರು ಶಾಸಕರ ಜೊತೆ ಪ್ರತ್ಯೇಕವಾಗಿ ಸಮಾಲೋಚನೆ ನಡೆಸಿದ್ದಾರೆ.

ಶಾಸಕರ ಭೇಟಿ ಫೋಟೊವನ್ನು ಡಿ.ಕೆ.ಶಿವಕುಮಾರ್‌ ತಮ್ಮ ಫೇಸ್‌ಬುಕ್‌ ಖಾತೆಯಲ್ಲಿ ಪೋಸ್ಟ್‌ ಮಾಡಿಕೊಂಡಿದ್ದಾರೆ. ಅದಕ್ಕೆ ನೂರಾರು ಮಂದಿ ವಿವಿಧ ರೀತಿಯಲ್ಲಿ ಕಾಮೆಂಟ್‌ ಮಾಡಿದ್ದಾರೆ.

ವಿಶೇಷವೆಂದರೆ ಕೊತ್ತೂರು ಮಂಜುನಾಥ್‌ ಎರಡು ದಿನಗಳ ಹಿಂದೆಯಷ್ಟೇ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಭೇಟಿ ಮಾಡಿ ಚರ್ಚಿಸಿದ್ದರು. ಅಂದು ಕೆಜಿಎಫ್‌ ಶಾಸಕಿ ರೂಪಕಲಾ ಶಶಿಧರ್‌ ಕೂಡ ಭೇಟಿಯಾಗಿದ್ದರು. ಜಿಲ್ಲೆಯ ಕಾಂಗ್ರೆಸ್‌ ಶಾಸಕ ಬಂಗಾರಪೇಟೆಯ ಎಸ್‌.ಎನ್‌.ನಾರಾಯಣಸ್ವಾಮಿ ಮಾತ್ರ ಈವರೆಗೆ ಯಾರನ್ನೂ ಭೇಟಿಯಾದಂತಿಲ್ಲ.

ಈ ಎಲ್ಲಾ ಭೇಟಿಗಳಿಗೆ ಕಾರಣ ಏನಿರಬಹುದು, ಏನು ಮಾತುಕತೆ ನಡೆದಿರಬಹುದು ಎಂಬ ಕುತೂಹಲ ರಾಜಕೀಯ ವಲಯದಲ್ಲಿ ನೆಲೆಸಿದೆ. ಆದರೆ, ಶಾಸಕರು ಮಾತ್ರ ಗುಟ್ಟು ಬಿಡುಕೊಡುತ್ತಿಲ್ಲ.

ಜಿಲ್ಲೆಯಲ್ಲಿ ಕಾಂಗ್ರೆಸ್‌ನ ನಾಲ್ವರು ಶಾಸಕರಿದ್ದು, ಯಾರು ಯಾರ ಪರವಾಗಿ ಬ್ಯಾಟ್‌ ಮಾಡಬಹುದು ಎಂಬ ಚರ್ಚೆಗಳು ಮಾತ್ರ ಜೋರಾಗಿ ನಡೆಯುತ್ತಿವೆ.

ಭೇಟಿ ಮಾಡಿ ಹೊರಬಂದವರು ಕ್ಷೇತ್ರದ ಕೆಲಸ ನಿಮಿತ್ತ ಮಾತನಾಡಿದೆ ಎಂದು ಹೇಳುತ್ತಿದ್ದಾರೆ. ಮುಖ್ಯಮಂತ್ರಿ ಸ್ಥಾನಕ್ಕಾಗಿ ಸರ್ವ ಪ್ರಯತ್ನ ನಡೆಸುತ್ತಿರುವ ಡಿ.ಕೆ.ಶಿವಕುಮಾರ್‌ ಇಂಥ ಸಂದರ್ಭದಲ್ಲಿ ಕ್ಷೇತ್ರದ ಸಮಸ್ಯೆಗಳನ್ನು ಚರ್ಚೆ ಮಾಡುತ್ತಾರೆಯೇ ಎಂದು ಜನಸಾಮಾನ್ಯರು ಪ್ರಶ್ನೆ ಎತ್ತುತ್ತಿದ್ದಾರೆ. ಬೆಂಬಲಕ್ಕಾಗಿ ನಡೆಯುತ್ತಿರುವ ‘ತಲೆಗಳ’ ಲೆಕ್ಕಾಚಾರದ ಆಟವಿದು. ಅವರು ಇವರ ಪರವಂತೆ, ಇವರು ಅವರ ಪರವಂತೆ ಎಂಬ ಚರ್ಚೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ಜೋರಾಗಿ ನಡೆಯುತ್ತಿವೆ.

‘ಅವರು ಪರ ಇವರು ಪರ ಅಂತ ಏನೂ ಅಲ್ಲ. ಸಿದ್ರಾಮಣ್ಣ ಹಾಗೂ ಡಿ.ಕೆ. ಶಿವಕುಮಾರ್‌ ನೇತೃತ್ವದಲ್ಲಿ 2028ರ ವಿಧಾನಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್‌ ಪಕ್ಷ ಮತ್ತೆ ಗೆಲ್ಲಬೇಕು. ಅದು ನಮ್ಮ ಗುರಿ’ ಎಂದು ನಂಜೇಗೌಡ ಹೇಳಿರುವುದು ನಾನಾರ್ಥಕ್ಕೆ ಕಾರಣವಾಗಿದೆ.

ಈಗ ಸಿದ್ದರಾಮಯ್ಯ ಅಥವಾ ಡಿ.ಕೆ.ಶಿವಕುಮಾರ್‌ ಅವರನ್ನು ಬಹಿರಂಗವಾಗಿ ಬೆಂಬಲಿಸಿ ಹೇಳಿಕೆ ನೀಡಿದರೆ 2028ರ ಚುನಾವಣೆಯಲ್ಲಿ ಸಮುದಾಯದ ವೋಟ್‌ಗಳ ಮೇಲೆ ಪರಿಣಾಮ ಬೀರಿ ಸಮಸ್ಯೆ ಆಗಬಹುದು, ಈ ಮುಖಂಡರು ತಮ್ಮ ಬೆಂಬಲಕ್ಕೆ ನಿಲ್ಲದೇ ಇರಬಹುದು ಎಂಬ ಭಯ ಮತ್ತು ಆತಂಕ ಕೆಲ ಶಾಸಕರನ್ನು ಕಾಡುತ್ತಿದೆ.