ಕೊಪ್ಪಳ | ಕಾರು ಪಲ್ಟಿಯಾಗಿ ಬಯಲಾಯಿತು ಮದ್ಯ ಅಕ್ರಮ ಸಾಗಾಟ

ಕೊಪ್ಪಳ: ನಗರದಿಂದ ತಾಲ್ಲೂಕಿನ ಕವಲೂರು ಗ್ರಾಮಕ್ಕೆ ಮಂಗಳವಾರ ಅಕ್ರಮವಾಗಿ ಮದ್ಯ ಸಾಗಾಟ ಮಾಡುತ್ತಿದ್ದ ವ್ಯಕ್ತಿಯೊಬ್ಬನನ್ನು ನಗರ ಠಾಣೆ ಪೊಲೀಸರು ಬಂಧಿಸಿದ್ದು, ಮದ್ಯ ವಶಪಡಿಸಿಕೊಂಡಿದ್ದಾರೆ.

ಮದ್ಯ ತುಂಬಿಕೊಂಡು ಹೋಗುತ್ತಿದ್ದ ವಾಹನ ಪಲ್ಟಿಯಾಗಿದ್ದರಿಂದ ಘಟನೆ ಬೆಳಕಿಗೆ ಬಂದಿದೆ. ನಗರದ ದೇವಿ ಬಾರ್‌ನಿಂದ ಕವಲೂರಿನ ಶ್ರೀಕಾಂತ್‌ ಎನ್ನುವ ವ್ಯಕ್ತಿ 20 ಬಾಕ್ಸ್ ಮದ್ಯ ಹಾಗೂ ಎರಡು ಬಾಕ್ಸ್‌ ಬಿಯರ್‌ ತೆಗೆದುಕೊಂಡು ಹೋಗುತ್ತಿದ್ದ. ಇವುಗಳ ಒಟ್ಟು ಬೆಲೆ ₹75 ಸಾವಿರ ಎಂದು ಅಂದಾಜಿಸಲಾಗಿದೆ.

‘ಕಾರು ಅಪಘಾತವಾಗಿದೆ ಎಂದು ನಮಗೆ ಮಾಹಿತಿ ಬಂದಾಗ ಹೋಗಿ ಪರಿಶೀಲನೆ ನಡೆಸಿದೆವು. ಆಗ ಮದ್ಯ ಅಕ್ರಮ ಸಾಗಾಟ ಮಾಡುತ್ತಿದ್ದ ಪ್ರಕರಣ ಬೆಳಕಿಗೆ ಬಂದಿದೆ. ಕೊಪ್ಪಳದ ದೇವಿ ಬಾರ್‌ನಿಂದ ಮದ್ಯ ತೆಗೆದುಕೊಂಡು ಹೋಗುತ್ತಿದ್ದ. ಆರೋಪಿ ಶ್ರೀಕಾಂತ್‌ ವಿರುದ್ಧ ದೂರು ದಾಖಲಾಗಿದ್ದು, ನ್ಯಾಯಾಂಗ ಬಂಧನಕ್ಕೆ ಕಳುಹಿಸಲಾಗಿದೆ’ ಎಂದು ನಗರ ಠಾಣೆ ಪೊಲೀಸರು ತಿಳಿಸಿದ್ದಾರೆ.