ಗಂಗಾವತಿ: ಹನುಮಮಾಲೆ ಧರಿಸಿದ ಶಾಸಕ ಜಿ.ಜನಾರ್ದನ ರೆಡ್ಡಿ

ಗಂಗಾವತಿ: ಶಾಸಕ ಜಿ.ಜನಾರ್ದನರೆಡ್ಡಿ ಶನಿವಾರ ಹನುಮ ಭಕ್ತರ ಮತ್ತು ಪಕ್ಷದ ಕಾರ್ಯಕರ್ತರ ಸಮ್ಮುಖದಲ್ಲಿ ತಾಲ್ಲೂಕಿನ ಐತಿಹಾಸಿಕ ಕ್ಷೇತ್ರ ಪಂಪಾಸರೋವರದಲ್ಲಿ ಹನುಮಮಾಲೆ ಧರಿಸಿದರು.

ಪಂಪಾಸರೋವರದ ಜಯಲಕ್ಷ್ಮಿ ದೇವಸ್ಥಾನದ ಅರ್ಚಕರಿಂದ ಆಂಜನೇಯನ ಮೂರ್ತಿಗೆ ಪೂಜೆ ಸಲ್ಲಿಸಿದ ಶಾಸಕ, ನಂತರ ಮಾಲಾಧಾರಣೆ ಮಾಡಿ ವಿವಿಧ ಪೂಜಾ ವಿಧಾನಗಳು ನೆರವೇರಿಸಿದರು‌. ಐದು ದಿನಗಳ ಕಾಲ ಹನುಮ ವ್ರತ ಆಚರಿಸಲಿರುವ ಶಾಸಕ ಡಿ.3 ರಂದು ಅಂಜನಾದ್ರಿಯಲ್ಲಿ ಹನುಮಮಾಲೆ ವಿಸರ್ಜನೆ ಮಾಡಲಿದ್ದಾರೆ. 

ನಂತರ ಮಾತನಾಡಿ ಅವರು, ‘ಬಂಧನದಿಂದ ಮುಕ್ತವಾಗಿ ಬಂದ ಬಳಿಕ ಹನುಮಮಾಲೆ ಧರಿಸಿ, ಆಂಜನೇಯನಲ್ಲಿ ಬೇಡಿಕೊಂಡಿದ್ದು, ಆ ದೇವರು ಎಲ್ಲದನ್ನು ಒಳ್ಳೆಯದು ಮಾಡುತ್ತಲೆ ಬಂದಿದ್ದಾರೆ. ಇದೆ ಕ್ಷೇತ್ರದಿಂದಲೇ ರಾಜಕೀಯ ಪುನರ್ಜನ್ಮ ನೀಡಿದ್ದಾರೆ’ ಎಂದರು.

ಮುಂಬರುವ ಏಪ್ರೀಲ್ ತಿಂಗಳಿನ ಹನುಮ ಜಯಂತಿಯಲ್ಲಿ ನಿರಂತರ ಹನುಮಮಾನ್ ಚಾಲಿಸ್ ಪಠಣ ಸೇರಿ ಕೇಂದ್ರ ನಾಯಕರನ್ನು ಅಂಜನಾದ್ರಿಗೆ ಕರೆಯಿಸುವ ಸಂಕಲ್ಪ ಹೊಂದಿದ್ದೇನೆ’ ಎಂದರು.

ನಂತರ ಅಂಜನಾದ್ರಿ ಬೆಟ್ಟಕ್ಕೆ ಭೇಟಿ ನೀಡಿ, ಆಂಜನೇಯ ಪಾದಗಟ್ಟೆಗೆ ವಿಶೇಷ ಪೂಜೆ ಸಲ್ಲಿಸಿ, ದೇವರ ದರ್ಶನ ಪಡೆದರು.

ಮನೋಹರಗೌಡ ಹೇರೂರು, ಪಂಪಣ್ಣ ನಾಯಕ, ವಿರೇಶ ಬಲಕುಂದಿ, ಚಂದ್ರು ಹೀರೂರು ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.