ಗಂಗಾವತಿ: ‘ಮಣ್ಣು ಅಕ್ರಮ ಸಾಗಣೆಗೆ ನಿರ್ಬಂಧ ಹಾಕಿ’

ಗಂಗಾವತಿ: ಇಲ್ಲಿಯ ಸಾಯಿ ನಗರದ ಬಳಿಯ ಮಿನಿ ವಿಧಾನ ಸೌಧದ ಹಿಂಬದಿಯ ಜಮೀನಿನ ಪಕ್ಕದಲ್ಲಿ ಕೆಲವರು ಅಕ್ರಮವಾಗಿ ಮಣ್ಣು ಸಾಗಣೆ ಮಾಡುತ್ತಿದ್ದಾರೆ. ಕೂಡಲೇ ಇದಕ್ಕೆ ಕಡಿವಾಣ ಹಾಕಬೇಕು ಎಂದು ಒತ್ತಾಯಿಸಿ ಕರ್ನಾಟಕ ರಕ್ಷಣಾ ವೇದಿಕೆ ಪದಾಧಿಕಾರಿಗಳು ತಹಶೀಲ್ದಾರ್ ಕಚೇರಿ ಎದುರು ಪ್ರತಿಭಟನೆ ನಡೆಸಿದರು.

ಸಂಘಟನೆಯ ಜಿಲ್ಲಾಧ್ಯಕ್ಷ ಪಂಪಣ್ಣ ನಾಯಕ ಮಾತನಾಡಿ,‘ತಹಶೀಲ್ದಾರ್‌ ಕಚೇರಿ ಪಕ್ಕದಲ್ಲಿನ ಸರ್ವೆ ನಂ.53ರ ಭೂ ಮಾಲೀಕರು 10 ರಿಂದ 12 ಅಡಿಯಷ್ಟು ಮಣ್ಣು ಅಕ್ರಮವಾಗಿ ಅಗೆದು ಸಾಗಣೆ ಮಾಡಿ ಹಣ ಸಂಪಾದಿಸುತ್ತಿದ್ದಾರೆ. ನಿರಂತರವಾಗಿ ಮಣ್ಣು ಅಗೆಯುವುದರಿಂದ ಕುಡಿಯುವ ನೀರಿನ ಟ್ಯಾಂಕ್ ಕುಸಿದು ಬೀಳುವ ಅಪಾಯ ಇದೆ. ಕುಡಿಯುವ ನೀರಿನ ಸಮಸ್ಯೆ ಎದುರಾಗಲಿದೆ’ ಎಂದರು.

‘ಈಗಾಗಲೇ ತಹಶೀಲ್ದಾರ್, ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಅಧಿಕಾರಿಗಳಿಗೆ ಮನವಿ ಸಲ್ಲಿಸಲಾಗಿದೆ. ಕ್ರಮ ಕೈಗೊಳ್ಳುತ್ತಿಲ್ಲ’ ಎಂದು ಆರೋಪಿಸಿದರು.

ಬಳಿಕ ಗ್ರೇಡ್-2 ತಹಶೀಲ್ದಾರ್ ಮಹಾಂತೇಶಗೌಡ ಅವರಿಗೆ ಮನವಿ ಸಲ್ಲಿಸಲಾಯಿತು.

ಸಂಘಟನೆಯ ಶಂಕರ ಪೂಜಾರಿ, ಮುತ್ತಣ್ಣ, ಆಂಜನೇಯ ಪೂಜಾರಿ, ಈರಣ್ಣ, ರಾಘು, ಬಾಷಾ, ಬಸವರಾಜ, ವೆಂಕಟೇಶ ಭೋವಿ ಸೇರಿದಂತೆ ಸದಸ್ಯರು ಉಪಸ್ಥಿತರಿದ್ದರು.