ಕುಷ್ಟಗಿ: ಮಕ್ಕಳಿಲ್ಲದೆ ಭಣಗುಡುತ್ತಿವೆ ಸರ್ಕಾರಿ ಶಾಲೆಗಳು

ಕುಷ್ಟಗಿ: ಅಗತ್ಯ ಕೊಠಡಿಗಳು, ಆಟದ ಮೈದಾನ ಇದೆ. ಬಿಸಿಯೂಟ, ಸಮವಸ್ತ್ರ, ಪಠ್ಯಪುಸ್ತಕ ಎಲ್ಲವೂ ಉಚಿತವಾಗಿಯೇ ನೀಡಲಾಗುತ್ತಿದೆ. ಅನುಭವಿ ಶಿಕ್ಷಕರೂ ಇದ್ದಾರೆ. ಆದರೆ, ಮಕ್ಕಳ ಕಲರವ ಮಾತ್ರ ಇಲ್ಲ!

ಹೌದು, ಪಟ್ಟಣದ ಕೆಲ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಗಳು ಮಕ್ಕಳ ದಾಖಲಾತಿ ಕೊರತೆಯಿಂದ ಭಣಗುಡುತ್ತಿವೆ! ಆದರೆ ಇದಕ್ಕೆ ವ್ಯತಿರಿಕ್ತವಾಗಿ ಅಕ್ಕಪಕ್ಕದಲ್ಲೇ ಇರುವ ಖಾಸಗಿ ಶಾಲೆಗಳಲ್ಲಿ ಅಗತ್ಯಕ್ಕಿಂತಲೂ ಹೆಚ್ಚಿನ ಮಕ್ಕಳಿಂದ ಕೊಠಡಿಗಳು ತುಂಬಿ ತುಳುಕುತ್ತಿರುವುದು ವಿಪರ್ಯಾಸದ ಸಂಗತಿ.

ಸರ್ಕಾರಿ ಶಾಲೆಗೆ ಮಕ್ಕಳನ್ನು ಸೇರಿಸುವಂತೆ ಶಾಲಾ ಶಿಕ್ಷಣ ಇಲಾಖೆ ದಾಖಲಾತಿ ಆಂದೋಲನ ನಡೆಸುತ್ತಿದೆ. ಅಷ್ಟೇ ಏಕೆ ಪಾಲಕರ ಮನೆ ಬಾಗಿಲು ತಟ್ಟುತ್ತಿರುವ ಶಿಕ್ಷಕರು ‘ದಯವಿಟ್ಟು ಮಕ್ಕಳನ್ನು ನಮ್ಮ ಶಾಲೆಗೆ ಕಳಿಸಿ’ ಎಂದು ಮನವರಿಕೆ ಮಾಡಿ ಕೈಮುಗಿತ್ತಿದ್ದಾರೆ. ಇಷ್ಟಾದರೂ 1-5ನೇ ತರಗತಿ ಸರ್ಕಾರಿ ಶಾಲೆಗಳಿಗೆ ಮಕ್ಕಳನ್ನು ಸೇರಿಸಲು ಪಾಲಕರು ಅಷ್ಟಾಗಿ ಉತ್ಸಾಹ ತೋರುತ್ತಿಲ್ಲ. ಬಹುತೇಕ ಶಾಲೆಗಳಲ್ಲಿನ ಮಕ್ಕಳ ದಾಖಲಾತಿ ಸಂಖ್ಯೆ 50 ದಾಟಿಲ್ಲ ಎಂಬುದು ಗಮನಾರ್ಹ.

ಎಲ್ಲೆಲ್ಲಿ ಕಡಿಮೆ ಸಂಖ್ಯೆ?:

ಪಟ್ಟಣದ ಇಂದಿರಾ ನಗರದ ಶಾಲೆಗೆ ಬುಧವಾರ ಭೇಟಿ ನೀಡಿದಾಗ ಈ ವರ್ಷದ ದಾಖಲಾತಿ 30 ಇದ್ದರೆ ಮಕ್ಕಳ ಹಾಜರಾತಿ ಕೇವಲ 18 ಇತ್ತು. ಈ ಶಾಲೆಯಲ್ಲಿ ಕಳೆದ ಐದಾರು ವರ್ಷಗಳಿಂದಲೂ ಮಕ್ಕಳ ದಾಖಲಾಗಿ ಸಂಖ್ಯೆ 30ರ ಒಳಗೆ ಇದೆ.

‘1997ರಲ್ಲಿ ಆರಂಭವಾದ ಈ ಶಾಲೆಗೆ ಮಕ್ಕಳೇ ಬಾರದಿದ್ದರೆ ಈ ಶಾಲೆ ಮುನ್ನಡೆಸುವ ಅಗತ್ಯವಿದೆಯೆ ಎಂಬ ಪ್ರಶ್ನೆ ಶಿಕ್ಷಣ ಇಲಾಖೆಯ ಮುಂದಿದೆ. ಅದೇ ರೀತಿ ಹನುಮಸಾಗರ ರಸ್ತೆ ಆಶ್ರಯ ಬಡಾವಣೆಯ ಶಾಲೆಯಲ್ಲಿ 28, ಅನ್ನದಾನದೇಶ್ವರ ನಗರದ ಶಾಲೆಯಲ್ಲಿ 27, 12ನೇ ವಾರ್ಡ್‌ನ ತೆಗ್ಗಿನ ಓಣಿ ಶಾಲೆಯಲ್ಲಿ 40 ಹಾಗೂ ಮೂರು ಜನ ಶಿಕ್ಷಕರಿರುವ ಸಂದೀಪ್‌ ನಗರ ಆಶ್ರಯ ಕಾಲೊನಿ ಶಾಲೆಯಲ್ಲಿ 50 ಮಕ್ಕಳ ದಾಖಲಾತಿ ಇದ್ದರೂ, ಹಾಜರಾತಿ ಮಾತ್ರ ಅರ್ಧದಷ್ಟೇ ಇರುತ್ತದೆ’ ಎಂದು ಮೂಲಗಳು ತಿಳಿಸಿವೆ.

‘ಎಲ್ಲವೂ ಉಚಿತವಾಗಿರುವ ಸರ್ಕಾರಿ ಶಾಲೆಗಳ ಬದಲು ಪಾಲಕರು ತಮ್ಮ ಮಕ್ಕಳನ್ನು ದುಬಾರಿ ಶುಲ್ಕ ತೆತ್ತು ಮಕ್ಕಳನ್ನು ಸೇರಿಸಿಕೊಳ್ಳುವಂತೆ ಖಾಸಗಿ ಶಿಕ್ಷಣ ಸಂಸ್ಥೆಗಳಿಗೆ ದುಂಬಾಲು ಬೀಳುತ್ತಿದ್ದಾರೆ. ಸರ್ಕಾರಿ ಶಾಲೆಗಳಲ್ಲಿ ನುರಿತ ಶಿಕ್ಷಕರಿದ್ದಾರೆ. ಆದರೆ, ಬಹುತೇಕ ಖಾಸಗಿ ಶಾಲೆಗಳಲ್ಲಿ ಟಿಇಟಿ ತೇರ್ಗಡೆಯಾಗದ ಬೋಧಕರಿದ್ದಾರೆ. ಆದರೂ ಸರ್ಕಾರಿ ಶಾಲೆಗಳತ್ತ ಪಾಲಕರು ನಿರೀಕ್ಷೆಯಷ್ಟು ಸುಳಿಯುತ್ತಿಲ್ಲವೇಕೆ’ ಎಂಬ ಪ್ರಶ್ನೆ ಸಾರ್ವಜನಿಕರಿಂದ ಕೇಳಿಬರುತ್ತಿದೆ.

ಶಾಲೆ ಸುತ್ತ ಮದ್ಯ ಮಾಂಸ ತ್ಯಾಜ್ಯ

ಕುಷ್ಟಗಿ ಪಟ್ಟಣದ ಇಂದಿರಾ ನಗರ ಶಾಲೆಯ ಸುತ್ತಲಿನ ವಾತಾವರಣ ಮಲೀನಗೊಂಡಿದೆ. ಅಲ್ಲಿರುವ ಬಾರ್ ಮಾಂಸಾಹಾರ ಖಾನಾವಳಿಗಳ ಮಾಲೀಕರು ತ್ಯಾಜ್ಯ ತಂದು ಬೇಕಾಬಿಟ್ಟಿ ಬಿಸಾಡುತ್ತಿದ್ದಾರೆ. ಇದರಿಂದ ಶಾಲೆ ಪಕ್ಕದ ಪ್ರದೇಶ ಮಲೀನಗೊಂಡು ಶಾಲೆಯ ಮಕ್ಕಳು ಅನಾರೋಗ್ಯಕ್ಕೆ ಒಳಗಾಗುತ್ತಿದ್ದಾರೆ ಎಂಬ ಆರೋಪವಿದೆ. ಮದ್ಯದ ಖಾಲಿ ಪಾಕೆಟ್‌ಗಳು ಮಾಂಸದ ತ್ಯಾಜ್ಯ ಕೊಳೆತ ವಸ್ತುಗಳಿಂದಾಗಿ ಮೂಗುಮುಚ್ಚಿಕೊಂಡು ಓಡಾಡುವ ಸ್ಥಿತಿಯಿದೆ. ಪುರಸಭೆಯ ಕಸ ಸಂಗ್ರಹ ವಾಹನ ಇಲ್ಲಿ ಬರುವುದೇ ಇಲ್ಲ ಎಂದು ಸ್ಥಳೀಯ ನಿವಾಸಿಗಳು ದೂರುತ್ತಾರೆ.