ಕೃಷಿಯಲ್ಲಿ ತಂತ್ರಜ್ಞಾನ ಬಳಕೆಯಿಂದ ಲಾಭ: ಉದ್ಯಮಿ ಕೆ.ಜಗದೀಶ್‌

ಮೈಸೂರು: ‘ತಂತ್ರಜ್ಞಾನ ಅಳವಡಿಸಿಕೊಂಡಾಗ ವ್ಯವಸಾಯ ಪದ್ಧತಿಯಲ್ಲಿ ಬದಲಾವಣೆ ಹಾಗೂ ಲಾಭ ಪಡೆಯಲು ಸಾಧ್ಯ’ ಎಂದು ಕನಕಪುರ ತಾಲ್ಲೂಕಿನ ಕೀರನಗೆರೆ ಚಾಕಿ ಸಾಕಾಣಿಕಾ ಕೇಂದ್ರದ ಉದ್ಯಮಿ ಕೆ.ಜಗದೀಶ್‌ ತಿಳಿಸಿದರು. 

ಇಲ್ಲಿನ ಮಾನಸಗಂಗೋತ್ರಿಯ ಮೈಸೂರು ವಿಶ್ವವಿದ್ಯಾಲಯದ ರೇಷ್ಮೆ ಕೃಷಿ ವಿಜ್ಞಾನ ಅಧ್ಯಯನ ವಿಭಾಗ ಮತ್ತು ಮಾಳವೀಯ ಮಿಷನ್‌ ಶಿಕ್ಷಕರ ತರಬೇತಿ ಕೇಂದ್ರವು ‘ರೇಷ್ಮೆ ಕೃಷಿಯಲ್ಲಿ ಉದ್ಯಮಶೀಲತಾ ಅವಕಾಶಗಳ ಕುರಿತು ಶುಕ್ರವಾರ ಹಮ್ಮಿಕೊಂಡಿದ್ದ ರಾಷ್ಟ್ರೀಯ ವಿಚಾರಸಂಕಿರಣ ಉದ್ಘಾಟಿಸಿ ಮಾತನಾಡಿದರು.

‘1980ರ ಕಾಲದಲ್ಲಿ ಅನೇಕರು ಮೂಢನಂಬಿಕೆ ಆಧರಿಸಿ ರೇಷ್ಮೆ ಬೆಲೆ ಆರಂಭಿಸಿದ್ದರು. ವರ್ಷಕ್ಕೆ ಮೂರು ಬೆಳೆಯಷ್ಟೆ ಮಾಡುತ್ತಿದ್ದರು. ಅಂದಿನ ಅಧಿಕಾರಿಗಳಿಗೂ ತಂತ್ರಜ್ಞಾನ ಗೊತ್ತಿರಲಿಲ್ಲ. ಇದರಿಂದಾಗಿ ನಷ್ಟ ಅನುಭವಿಸುವಂತಾಯಿತು. ಆದರೆ, ನಾವು ವಿದೇಶಿ ತಳಿಗಳಿಗೆ ಬೇಕಾದ ವಾತಾವರಣ ಸೃಷ್ಟಿಸಿದೆವು. ಇದರಿಂದ ಈ ಉದ್ಯಮ ಕೈಹಿಡಿಯಿತು’ ಎಂದು ಹೇಳಿದರು.

‘ರೇಷ್ಮೆ ಕೃಷಿಯ ವಿಚಾರಗಳನ್ನು ತಿಳಿದುಕೊಳ್ಳದವರು ಪ್ರಾಯೋಗಿಕವಾಗಿ ಬೆಳೆಯಲಾರರು. ರೈತರ ಮನೆಯ ಹವಾಮಾನ ವೈಪರೀತ್ಯ, ತಂತ್ರಜ್ಞಾನದ ಮಾಹಿತಿ ಕೊರತೆ, ಅದನ್ನು ಪಾಲಿಸಲು ಸಾಧ್ಯವಾಗದಿರುವುದು ರೇಷ್ಮೆ ಕೃಷಿಯ ಹಿನ್ನಡೆಗೆ ಕಾರಣ. ಇವುಗಳನ್ನು ತಿಳಿಸುವ ಕೌಶಲ ಅಧಿಕಾರಿಗಳಲ್ಲಿ ಇರಬೇಕು’ ಎಂದು ಅಭಿಪ್ರಾಯಪಟ್ಟರು. 

‘ಶೈಕ್ಷಣಿಕ ಸಮಯದಲ್ಲಿ ಪ್ರಾಯೋಗಿಕ ಅವಕಾಶ ದೊರೆತರೆ, ಆ ಅನುಭವ ಕೃಷಿ ಭೂಮಿಯಲ್ಲಿ ಸಹಾಯ ಮಾಡುತ್ತದೆ. ಕೃಷಿಯಲ್ಲಿ ‌ಮಣ್ಣಿನ ಪರೀಕ್ಷೆ ಮುಂತಾದ ವೈಜ್ಞಾನಿಕತೆ ಅಳವಡಿಕೆ ಮಾಡಬೇಕು’ ಎಂದು ತಿಳಿಸಿದರು.

ಮಾಳವೀಯ ಮಿಷನ್‌ ಶಿಕ್ಷಕರ ತರಬೇತಿ ಕೇಂದ್ರದ ನಿರ್ದೇಶಕಿ ಪ್ರೊ.ಎಚ್‌.ಪಿ.ಜ್ಯೋತಿ, ರೇಷ್ಮೆ ಕೃಷಿ ಅಧ್ಯಯನ ವಿಭಾಗದ ಅಧ್ಯಕ್ಷ ಪ್ರೊ.ಬಿ.ಸಣ್ಣಪ್ಪ, ಕಾರ್ಯಕ್ರಮದ ಸಂಚಾಲಕ ಪ್ರೊ.ಎಂ.ಎನ್‌. ಅನಿಲ್‌ ಕುಮಾರ್‌ ಇದ್ದರು.