ಪಿಂಚಣಿ ನಿಧಿ | ಉದ್ಯೋಗಿಗಳಿಗೆ ಜೀವನ ಭದ್ರತೆ: ವಿನೀತ್ ಕುಮಾರ್

ಮೈಸೂರು: ‘ಪಿಂಚಣಿ ನಿಧಿಯು (ಪಿಎಫ್‌) ಪ‍್ರತಿಯೊಬ್ಬ ನೌಕರನಿಗೂ ಜೀವನ ಭದ್ರತೆ ನೀಡುತ್ತದೆ. ಉದ್ಯೋಗ ಸೃಷ್ಟಿಸುವ ಮಾಲೀಕರು ಹಾಗೂ ಕಾರ್ಮಿಕರು ಇದರ ಪ್ರಯೋಜನ ಪಡೆಯಬೇಕು’ ಎಂದು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್‌ಒ) ಪ್ರಾದೇಶಿಕ ಆಯುಕ್ತ ವಿನೀತ್ ಕುಮಾರ್ ಸಲಹೆ ನೀಡಿದರು. 

ಕೃಷ್ಣಮೂರ್ತಿಪುರಂನ ಹೋಟೆಲ್‌ ಮಾಲೀಕರ ಸಂಘದ ಸಭಾಂಗಣದಲ್ಲಿ ಶುಕ್ರವಾರ ಸಂಘವು ಆಯೋಜಿಸಿದ್ದ ‘ಪ್ರಧಾನ ಮಂತ್ರಿ ವಿಕಸಿತ್ ಭಾರತ್ ರೋಜಗಾರ್‌ ಯೋಜನೆ; ಉದ್ಯೋಗದಾತರಿಗೆ ಬೆಂಬಲ ಕುರಿತು ಜಾಗೃತಿ ಮತ್ತು ಸಂವಾದ’ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು. 

‘ಇಪಿಎಫ್‌ ಕಾಯ್ದೆಯು ಕಾರ್ಮಿಕರ ಭವಿಷ್ಯಕ್ಕೆ ಆಧಾರ ಒದಗಿಸಿದೆ. ನೋಂದಣಿಯು ಸುಲಭವಾಗಿದೆ. ಪಿಎಂ ವಿಕಸಿತ್ ಭಾರತ್‌ ರೋಜಗಾರ್ ಯೋಜನೆಯಡಿ 20ಕ್ಕೆ ಹೆಚ್ಚು ಉದ್ಯೋಗಿಗಳನ್ನು ಹೊಂದಿರುವ ಖಾಸಗಿ ವಲಯದ ಕಂಪನಿ ಹಾಗೂ ಸಂಸ್ಥೆಗಳು ಪಿಎಫ್‌ ನೀಡಲು ನೋಂದಾಯಿಸಿಕೊಳ್ಳಬಹುದು’ ಎಂದು ವಿವರಿಸಿದರು. 

ಇಪಿಎಫ್‌ಒ ಅನುಷ್ಠಾನ ಅಧಿಕಾರಿ ಬಿ.ಎಸ್‌.ಶ್ರುತಿ ಮಾತನಾಡಿ, ‘ಮಾಲೀಕರು ಹಾಗೂ ನೌಕರರು ಇಬ್ಬರಿಗೂ ಪ್ರಯೋಜನ ಕಲ್ಪಿಸುವ ಗುರಿ ಹೊಂದಿರುವ ಇಪಿಎಫ್‌ಒ, ರೋಜ್‌ಗಾರ್ ಯೋಜನೆಯಡಿ ಎರಡು ವಿಭಾಗಗಳನ್ನು ನೀಡಿದೆ. ಭಾಗ- ‘ಎ’ದಲ್ಲಿ ಮೊದಲ ಬಾರಿ ನೌಕರಿ ಪಡೆದವರು, ಭಾಗ- ‘ಬಿ’ದಲ್ಲಿ ಉದ್ಯೋಗದಾತರ ಮೇಲೆ ಕಾಳಜಿ ವಹಿಸಿದೆ’ ಎಂದು ವಿವರಿಸಿದರು. 

‘ಖಾಸಗಿ ಸಂಸ್ಥೆಗಳಲ್ಲಿ ಮೊದಲ ಬಾರಿ ಉದ್ಯೋಗ ಪಡೆದ ವಾರ್ಷಿಕ ₹ 1 ಲಕ್ಷ ಸಂಬಳ ಪಡೆಯುವವರು ಇದರ ಪ್ರಯೋಜನ ಪಡೆಯಬಹುದು. ಅವರಿಗೆ ₹ 15 ಸಾವಿರ ಪ್ರೋತ್ಸಾಹ ಧನವು ಸಿಗುತ್ತದೆ. ಮೊದಲ 6 ತಿಂಗಳ ಅವಧಿಯ ನಂತರ ಮೊದಲ ಕಂತು ಹಾಗೂ ವರ್ಷದ ನಂತರ 2ನೇ ಕಂತಿನಲ್ಲಿ ಪಿಎಫ್‌ ಖಾತೆಗೆ ಸಂದಾಯ ಮಾಡಲಾಗುತ್ತದೆ’ ಎಂದು ವಿವರಿಸಿದರು. 

‘ಹೆಚ್ಚು ಉದ್ಯೋಗಿಗಳ ನೇಮಕ ಮಾಡಿಕೊಳ್ಳಲು ಪ್ರೋತ್ಸಾಹಿಸಲು ಉದ್ಯೋಗ ನೀಡುವವರಿಗೆ ಮಾಸಿಕ ₹ 3 ಸಾವಿರ ಪ್ರೋತ್ಸಾಹಧನವನ್ನು ಕೇಂದ್ರ ಸರ್ಕಾರ ನೀಡುತ್ತಿದೆ. ಇದು ಉದ್ಯೋಗ ಸೃಷ್ಟಿಸಲು ಸಹಾಯ ಮಾಡಿದೆ. ಸಾಮಾಜಿಕ ಭದ್ರತೆಯನ್ನು ನೀಡಿದೆ’ ಎಂದರು.   

ಪಿಎಫ್‌ ಖಾತೆ ಅಧಿಕಾರಿ ಪ್ರಫುಲ್ ಇಟ್ಟಿ, ಹೋಟೆಲ್‌ ಮಾಲೀಕರ ಸಂಘದ ಅಧ್ಯಕ್ಷ ಸಿ.ನಾರಾಯಣ ಗೌಡ, ಕಾರ್ಯದರ್ಶಿ ಆರ್.ರವೀಂದ್ರ ಭಟ್ಟ, ಹೋಟೆಲ್‌ ಮಾಲೀಕರ ಧರ್ಮದತ್ತಿ ಅಧ್ಯಕ್ಷ ರವಿಶಾಸ್ತ್ರಿ, ಕಾರ್ಯದರ್ಶಿ ಸುಬ್ರಹ್ಮಣ್ಯ ಆರ್.ತಂತ್ರಿ ಪಾಲ್ಗೊಂಡಿದ್ದರು.