ಗೌಡನಕಟ್ಟೆ | 10 ವರ್ಷದ ಹೆಣ್ಣು ಹುಲಿ ಸೆರೆ: 4 ಮರಿಗಳಿಗಾಗಿ ಮುಂದುವರಿದ ಶೋಧ

ಹುಣಸೂರು: ಹುಣಸೂರು ತಾಲ್ಲೂಕಿನ ಗುರುಪುರ ಪಂಚಾಯಿತಿ ವ್ಯಾಪ್ತಿಯ ಗೌಡನಕಟ್ಟೆ, ವಾರಂಚಿ, ನಲ್ಲೂರು ಪಾಲ, ಎಚ್.ಡಿ.ಕೋಟೆ ಮತ್ತು ಹುಣಸೂರು ಗಡಿಪ್ರದೇಶದಲ್ಲಿ ಆಗ್ಗಿಂದಾಗೆ ಕಾಣಿಸಿಕೊಳ್ಳುತ್ತಿದ್ದ ಹೆಣ್ಣು ಹುಲಿ ಸೆರೆ ಹಿಡಿಯುವ ಕಾರ್ಯಾಚರಣೆ ಯಶಸ್ವಿಯಾಗಿದೆ. ಉಳಿದ ನಾಲ್ಕು ಮರಿಗಳನ್ನು ಸೆರೆ ಹಿಡಿಯಲು ಅರಣ್ಯ ಇಲಾಖೆ ಸಿಬ್ಬಂದಿ ಕಾರ್ಯಾಚರಣೆ ಮುಂದುವರಿಸಿದ್ದಾರೆ.

ಹುಲಿ ಸೆರೆ ಹಿಡಿಯಲು ಅರಣ್ಯ ಇಲಾಖೆ ಗುರುವಾರ ಆರಂಭಿಸಿದ ಕಾರ್ಯಾಚರಣೆ ತಡ ರಾತ್ರಿವರೆಗೂ ನಡೆದಿತ್ತು. ಶುಕ್ರವಾರ ನಸುಕಿನ 1 ಗಂಟೆ ಆಸುಪಾಸಿನಲ್ಲಿ ಅರಣ್ಯ ಇಲಾಖೆ ಪಶುವೈದ್ಯಾಧಿಕಾರಿ ಡಾ.ವಾಸಿಂ ಮತ್ತು ಆದರ್ಶ ಅವರು 9 ರಿಂದ 10 ವರ್ಷದ ಹೆಣ್ಣು ಹುಲಿಗೆ ಅರಿವಳಿಕೆಯನ್ನು ಯಶಸ್ವಿಯಾಗಿ ಸಿಡಿಸಿದರು. ನಂತರ ಹುಲಿಯನ್ನು ಸುರಕ್ಷಿತವಾಗಿ ಸೆರೆ ಹಿಡಿಯಲಾಯಿತು ಎಂದು ನಾಗರಹೊಳೆ ಹುಲಿ ಯೋಜನೆ ಎಸಿಎಫ್‌ ಲಕ್ಷ್ಮಿಕಾಂತ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

ಸೆರೆ ಸಿಕ್ಕ ಹುಲಿಗೆ ಸ್ಥಳದಲ್ಲಿ ಆರೈಕೆ ಮಾಡಲಾಗಿದ್ದು, ಹುಲಿ ಮರಿಗಳು ಸೆರೆ ಸಿಕ್ಕ ಬಳಿಕ ಸೆರೆ ಸಿಕ್ಕಿರುವ ಹುಲಿ ಯಾವ ಸ್ಥಳಕ್ಕೆ ಬಿಡಬೇಕು ಎಂಬ ಬಗ್ಗೆ ತೀರ್ಮಾನಕ್ಕೆ ಬರಲಿದ್ದೇವೆ. ಈ ಕ್ಷಣಕ್ಕೆ ಇಲವಾಲ ಸಮಿಪದಲ್ಲಿರುವ ವನ್ಯಪ್ರಾಣಿ ಪುನರ್ವಸತಿ ಕೇಂದ್ರಕ್ಕೆ ಹೆಣ್ಣು ಹುಲಿ ಸ್ಥಳಾಂತರಿಸಿ ಯೋಗಕ್ಷೇಮ ನಿರ್ವಹಣೆಗೆ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದರು.

ಕೊಂಬಿಂಗ್‌ : ನಾಲ್ಕು ಹುಲಿ ಮರಿಗಳನ್ನು ಸೆರೆ ಹಿಡಿಯುವ ಕೊಂಬಿಂಗ್‌ ಕಾರ್ಯಾಚರಣೆ ಇಲಾಖೆ ಮುಂದುವರೆಸಿದ್ದು, ಕೊಂಬಿಂಗ್‌ ನಲ್ಲಿ ಆನೆಚೌಕೂರು ಆನೆ ಕ್ಯಾಂಪ್‌ ನಿಂದ ಸುಗ್ರೀವ, ಪ್ರಶಾಂತ್‌, ಹರ್ಷ ಮತ್ತು ಅಜೇಯ ಆನೆಗಳನ್ನು ಬಳಸಿಕೊಳ್ಳಲಾಗಿದೆ.

ಮುಕ್ಕಾಂ: ಗುರುಪುರ ಮತ್ತು ಸುತ್ತಮುತ್ತಲಿನ ರೈತರು ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ದಿಗ್ಬಂಧನ ಹಾಕಿ ಸ್ಥಳದಲ್ಲೆ ಉಳಿದು ಹುಲಿ ಸೆರೆ ಹಿಡಿಯುವಂತೆ ಒತ್ತಡ ಹಾಕಿದ್ದರು. ಇದಕ್ಕೆ ಸ್ಪಂದಿಸಿದ ಪ್ರಾದೇಶಿಕ ಅರಣ್ಯ ಇಲಾಖೆ ಡಿಸಿಎಫ್‌ ಮೊಹಮ್ಮದ್‌ ಫಯಾಜ್‌ ಮತ್ತು ತಂಡ ಗುರುವಾರ ಕಾರ್ಯಾಚರಣೆ ಆರಂಭಿಸಿತು. ಇವರೊಂದಿಗೆ ಇಲಾಖೆಯ ಉನ್ನತಾಧಿಕಾರಿ ಕೆ.ಪರಮೇಶ್‌, ಡಾ.ಪ್ರಭುಗೌಡ, ಎಸಿಎಫ್‌ ಮಹದೇವ್‌, ವಲಯ ಅರಣ್ಯಾಧಿಕಾರಿ ನಂದಕುಮಾರ್‌ ಒಳಗೊಂಡಂತೆ ಇಲಾಖೆ ಸಿಬ್ಬಂದಿ ಬೀಡು ಬಿಟ್ಟಿದ್ದಾರೆ.

ಆತಂಕ: ನಾಗರಹೊಳೆ ಅರಣ್ಯದಂಚಿನ ಗ್ರಾಮದ ರೈತರು ಹೊಲಗದ್ದೆ ಬಯಲಿಗೆ ಹೋಗಲು ಆತಂಕಪಡುವಂತಾಗಿತ್ತು. ಕಳೆದ ಒಂದು ತಿಂಗಳಿಂದ ಹುಲಿ ಮತ್ತು ಮರಿಗಳು ಗೋಚರಿಸಿ ಸ್ಥಳೀಯರಲ್ಲಿ ಆತಂಕ ಸೃಷ್ಟಿಯಾಗಿತ್ತು. ಇಲಾಖೆಗೆ ಹಲವು ಬಾರಿ ಮನವಿ ಮಾಡಿದ್ದರೂ ಗಂಭೀರವಾಗಿ ಪರಿಗಣಿಸದ ಕಾರಣ ಗುರುವಾರ ಅಧಿಕಾರಿಗೆ ದಿಗ್ಬಂಧನ ಹಾಕಿದ್ದರು. ಇದರಿಂದಾಗಿ ಇಲಾಖೆ ಅಧಿಕಾರಿಗಳು ತ್ವರಿತಗತಿಯಲ್ಲಿ ಸ್ಪಂದಿಸಿ, ಕಾರ್ಯಾಚರಣೆ ನಡೆಸಿ ಹುಲಿ ಸೆರೆ ಹಿಡಿದಿದ್ದಾರೆ.