Sky Gold Robbery: 5 ನಿಮಿಷದಲ್ಲಿ ₹10 ಕೋಟಿ ಚಿನ್ನಾಭರಣ ದರೋಡೆ! ಸಿಗದ ಸುಳಿವು

ಹುಣಸೂರು; ನಗರದ ರಾಷ್ಟ್ರೀಯ ಹೆದ್ದಾರಿ 275 ರಲ್ಲಿನ ಸ್ಕೈ ಗೋಲ್ಡ್‌ ಅಂಡ್‌ ಡೈಮಂಡ್ಸ್‌ನಲ್ಲಿ ಡಿ.28ರ ಮಧ್ಯಾಹ್ನ ನಡೆದ ದರೋಡೆಯಲ್ಲಿ ಒಟ್ಟು₹ 10 ಕೋಟಿ ಮೌಲ್ಯದ 450 ಚಿನ್ನಾಭರಣಗಳನ್ನು ದರೋಡೆ ಮಾಡಲಾಗಿದೆ ಎಂದು ಅಂಗಡಿ ಮಾಲಿಕ ಕೇರಳ ರಾಜ್ಯದ ವೈನಾಡು ನಿವಾಸಿ ಜಂಷಿದ್‌ ಪಿ.ಎ. ದೂರಿನಲ್ಲಿ ತಿಳಿಸಿದ್ದಾರೆ ಎಂದು ಪೊಲೀಸ್‌ ಮಾಹಿತಿ ನೀಡಿದ್ದಾರೆ.

ಭಾನುವಾರ ಮಧ್ಯಾಹ್ನ 2ರಿಂದ 2 ಗಂಟೆ 5 ನಿಮಿಷದೊಳಗೆ 5 ಜನರು ದ್ವಿಚಕ್ರ ವಾಹನದಲ್ಲಿ ಬಂದೂಕಿನೊಂದಿಗೆ ದಾಳಿ ನಡೆಸಿದ್ದು, ಆ ಸಮಯದಲ್ಲಿ ಅಂಗಡಿಯ ವ್ಯವಸ್ಥಾಪಕ ಊಟಕ್ಕೆ ತೆರಳಿದ್ದರು. ಮುಸುಕುಧಾರಿಗಳು ಬಂದೂಕು ತೋರಿಸಿ ಅಂಗಡಿಯಲ್ಲಿದ್ದ 12 ಲಾಕೆಟ್‌, 8 ಬ್ರೇಸ್‌ಲೆಟ್‌, 64 ಬಳೆ, 150 ನೆಕ್ಲೆಸ್‌, 65 ಚೈನು, 12 ಕಾಲು ಚೈನ್‌, 70 ಉಂಗುರ, 19 ಕರಿಮಣಿ ಸರ, 17 ಕಿವಿ ಡ್ರಾಪ್ಸ್‌, 13 ಡೈಮಂಡ್ಸ್‌ ರಿಂಗ್‌ ದರೋಡೆ ಮಾಡಿದ್ದಾರೆ ಎಂದು ತಿಳಿಸಿದ್ದಾರೆ.

ಮಾಹಿತಿ ಇಲ್ಲ: ದರೋಡೆ ನಡೆಸಿದ ಆರೋಪಿಗಳ ಸುಳಿವು ನಾಲ್ಕು ದಿನ ಕಳೆದರೂ ಪೊಲೀಸರಿಗೆ ಸುಳಿವು ಸಿಕ್ಕಿಲ್ಲ. ಈ ಪ್ರಕರಣವನ್ನು ಭೇದಿಸಲು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ವಿಷ್ಣುವರ್ಧನ್‌, ಡಿವೈಎಸ್‌ಪಿ ರವಿ ಸೇರಿದಂತೆ 100 ಪೊಲೀಸರನ್ನು ಒಳಗೊಂಡ 5 ತಂಡ ರಚಿಸಲಾಗಿದೆ.