ನಾಗರಹೊಳೆ ಅಭಯಾರಣ್ಯದಲ್ಲಿ ಉತ್ತಮ ಮಳೆ

ಹುಣಸೂರು: ಬೇಸಿಗೆ ಝಳದಿಂದ ತತ್ತರಿಸಿದ ನಾಗರಹೊಳೆ ಅಭಯಾರಣ್ಯಕ್ಕೆ ಎರಡು ದಿನ ಮಳೆಯಾಗಿ ಪ್ರಾಣಿಗಳ ನೀರಿನ ದಾಹ ನೀಗಿಸಿದೆ.

‘ನಾಗರಹೊಳೆಯ 8 ವಲಯದಲ್ಲೂ ಮಾರ್ಚ್‌ 16 ಮತ್ತು 17ರ ರಾತ್ರಿ ಭಾರಿ ಮಳೆಯಾಗಿದ್ದು ಅರಣ್ಯದಲ್ಲಿ ಅಲ್ಲಲ್ಲಿ ನೀರು ನಿಂತು ವನ್ಯಪ್ರಾಣಿಗಳಿಗೆ ಪೂರಕವಾಗಿದೆ’ ಎಂದು ನಾಗರಹೊಳೆ ಎಸಿಎಫ್ ಲಕ್ಷ್ಮಿಕಾಂತ್ ತಿಳಿಸಿದ್ದಾರೆ.

ಬೇಸಿಗೆ ಬಿಸಿಲು ಆರಂಭವಾಗುತ್ತಿದ್ದಂತೆ ಅರಣ್ಯದ ಹಳ್ಳಗಳಲ್ಲಿ ನೀರು ಬತ್ತಿದ್ದು, ಈ ಮಳೆಯಿಂದಾಗಿ ಸಸ್ಯ ಪ್ರಾಣಿಗಳಿಗೆ ಮೇವು ಸಿಗಲಿದೆ. ಬೇಸಿಗೆ ಬಿಸಿಲಿಗೆ ಅರಣ್ಯ ಒಣಗಿದ್ದು ಬೆಂಕಿ ಆತಂಕ ಇತ್ತು, ಈಗ ಅದು ಅಲ್ಪ ಪ್ರಮಾಣದಲ್ಲಿ ತಪ್ಪಿದೆ ಎಂದು ಹೇಳಿದರು.

‘ಮುಂದಿನ ದಿನಗಳಲ್ಲಿ ಮುಂಗಾರು ಮುಂದುವರಿದಲ್ಲಿ ವನ್ಯಪ್ರಾಣಿಗಳು ನೀರಿನ ಕೊರತೆಯಿಂದ ಮುಕ್ತವಾಗಲಿದೆ. ಅರಣ್ಯದಲ್ಲಿನ ಸೋಲಾರ್ ಪಂಪ್ ದಿನದ 24 ಗಂಟೆ ಕೆಲಸ ನಿರ್ವಹಿಸುತ್ತಿದ್ದು ಕೆಲವೊಂದು ಕೆರೆಗಳಿಗೆ ನೀರು ಸೇರಿಸುವ ಕೆಲಸ ನಿರಂತರವಾಗಿದೆ’ ಎಂದು ತಿಳಿಸಿದರು.