ಮಂಟೇಸ್ವಾಮಿ ಪ್ರಾಧಿಕಾರ: ಯದುವೀರ್ ವಿರೋಧ

ಮೈಸೂರು: ಚಾಮರಾಜನಗರ ಜಿಲ್ಲೆ ಕೊಳ್ಳೇಗಾಲ ತಾಲ್ಲೂಕಿನ ಚಿಕ್ಕಲ್ಲೂರು ಕ್ಷೇತ್ರದಲ್ಲಿ ಮಂಟೇಸ್ವಾಮಿ, ರಾಚಪ್ಪಾಜಿ ಮತ್ತು ಸಿದ್ದಪ್ಪಾಜಿ ಕ್ಷೇತ್ರಗಳ ಅಭಿವೃದ್ಧಿ ಪ್ರಾಧಿಕಾರ ರಚಿಸಲು ರಾಜ್ಯ ಸರ್ಕಾರ ನಿರ್ಧರಿಸಿರುವುದಕ್ಕೆ ಸಂಸದ, ರಾಜವಂಶಸ್ಥ ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ವಿರೋಧ ವ್ಯಕ್ತಪಡಿಸಿದ್ದಾರೆ.

‘ಮುಖ್ಯಮಂತ್ರಿ ಸಿದ್ದರಾಮಯ್ಯ ನೇತೃತ್ವದ ಈ ಕಮ್ಯುನಿಸ್ಟ್ ನಿಯಂತ್ರಿತ ಇಸ್ಲಾಮಿಕ್‌ ಓಲೈಕೆ ಸರ್ಕಾರವು ಪ್ರಾಚೀನ ಹಿಂದೂ ಸಂಪ್ರದಾಯಕ್ಕೆ ಸೇರಿದ, ಅದರಲ್ಲೂ ಹಿಂದುಳಿದ ವರ್ಗಗಳ, ತಳ ಸಮುದಾಯಗಳ ಹಾಗೂ ಜಾತ್ಯತೀತ ನಿಲುವುಗಳನ್ನು ಒಳಗೊಂಡಿರುವ ಮಂಟೇಸ್ವಾಮಿ ಮಠವನ್ನು ಸ್ವಾಧೀನಪಡಿಸಿಕೊಳ್ಳುವ ಈ ಘೋಷಣೆಯು ಹಿಂದೂ ನಂಬಿಕೆಯ ವ್ಯವಸ್ಥೆಯ ಮೇಲೆ ಹಿಡಿತ ಸಾಧಿಸುವ ನೇರ ಪ್ರಯತ್ನವಾಗಿದೆ’ ಎಂದು ದೂರಿದ್ದಾರೆ.

‘ಇದು ಅತ್ಯಂತ ಖಂಡನೀಯ ಕೃತ್ಯವಾಗಿದೆ. ಇಂತಹ ಪ್ರಯತ್ನವನ್ನು ಎಲ್ಲ ಹಂತಗಳಲ್ಲೂ ಬಹಿರಂಗಪಡಿಸಬೇಕಾಗಿದೆ. ಸರ್ಕಾರ ಈ ನಿಲುವಿನಿಂದ ಹಿಂದೆ ಸರಿದು ನಮ್ಮ ನೀಲಗಾರ ಪರಂಪರೆಯ ನಂಬಿಕೆ, ಆಚರಣೆ, ಜಾನಪದ ಪರಂಪರೆಯನ್ನು ಉಳಿಸಬೇಕು’ ಎಂದು ಆಗ್ರಹಿಸಿದ್ದಾರೆ.

‘ಮಂಟೇಸ್ವಾಮಿ ಮಠವು ನೀಲಗಾರ/ ಸಿದ್ಧ ಪರಂಪರೆಯ ಅಡಿಯಲ್ಲಿ ಬರುವ ಜಾತ್ಯತೀತ ಹಿಂದೂ ಧಾರ್ಮಿಕ ಮಠವಾಗಿದೆ. ಹಳೆಯ ಮೈಸೂರು ಭಾಗದ ಬಹುಪಾಲು ಹಿಂದೂ ಪಂಗಡಗಳು ಅತಿ ಹೆಚ್ಚಾಗಿ ಹಿಂದುಳಿದ ವರ್ಗ ಮತ್ತು ತಳ ಸಮುದಾಯಗಳ ಜನರು ಈ ಗುರುಪೀಠದ ಅನುಯಾಯಿಗಳಾಗಿದ್ದಾರೆ. ತಮಿಳುನಾಡಿನ ಕೆಲವು ಭಾಗಗಳ ಭಕ್ತರೂ ಇದ್ದಾರೆ. ಅರಸು ಸಮುದಾಯದವರು 500 ವರ್ಷಗಳಿಗಿಂತಲೂ ಹೆಚ್ಚು ಕಾಲದಿಂದ ಪೀಠಾಧಿಪತಿಗಳಾಗಿದ್ದಾರೆ. ಮಠವನ್ನು ಇತರ ಅನೇಕ ಹಿಂದೂ ಸಮುದಾಯಗಳ ಸಹಕಾರ ಮತ್ತು ಸಮನ್ವಯದಿಂದ ಸಾಮೂಹಿಕವಾಗಿ ನಡೆಸಲಾಗುತ್ತಿದೆ. ಇದಕ್ಕೆ ಧಕ್ಕೆಯಾಗದಂತೆ ನೋಡಿಕೊಳ್ಳಬೇಕು’ ಎಂದು ಒತ್ತಾಯಿಸಿದ್ದಾರೆ.