ಯಾದಗಿರಿ ಪಿಎಸ್‍ಐ ಪರಶುರಾಮ ಸಾವಿನ ಪ್ರಕರಣ ಸಿಬಿಐಗೆ ವಹಿಸಲು ಆಗ್ರಹ

ಲಿಂಗಸುಗೂರು: ಯಾದಗಿರಿ ಪಿಎಸ್‍ಐ ಪರಶುರಾಮ ಸಾವಿನ ವಾಸ್ತವ ಸತ್ಯ ಬಯಲುಗೊಳಿಸಲು ಪ್ರಕರಣ ಸಿಬಿಐಗೆ ವಹಿಸಬೇಕು ಎಂದು ಕರ್ನಾಟಕ ದಲಿತ ಸಂಘರ್ಷ ಸಮಿತಿ (ಭೀಮವಾದ) ಆಗ್ರಹಿಸಿದೆ.

ಗುರುವಾರ ಉಪ ವಿಭಾಗಾಧಿಕಾರಿ ಕಚೇರಿ ಅಧಿಕಾರಿ ಗದ್ದೆಪ್ಪ ಕಲಬುರ್ಗಿ ಮೂಲಕ ಮನವಿ ಸಲ್ಲಿಸಿ, ಶಾಸಕ ಮತ್ತು ಪುತ್ರರ ಮಾನಸಿಕ ಕಿರುಕುಳ ತಾಳದೆ ಮೃತಪಟ್ಟಿರುವುದು ಬಹಿರಂಗವಾಗಿದೆ. ಈ ಕುರಿತು ವಾಸ್ತವ ತನಿಖೆ ನಡೆಸುವ ಜೊತೆಗೆ ತಕ್ಷಣವೇ ಆರೋಪಿತರನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಬೇಕು’ ಎಂದು ಒತ್ತಾಯಿಸಿದರು.

‘ಸಿಐಡಿ ತನಿಖೆ ಮೇಲೆ ಸಂಶಯ ಹುಟ್ಟಿಕೊಂಡಿದೆ. ಕಾರಣ ಸಿಬಿಐಗೆ ತನಿಖೆಗೆ ಒಳಪಡಿಸಿ, ಪರಶುರಾಮ ಪತ್ನಿಗೆ ಸರ್ಕಾರಿ ಕೆಲಸ ನೀಡಬೇಕು. ಕುಟುಂಬಸ್ಥರಿಗೆ ₹2 ಕೋಟಿ ಪರಿಹಾರ ಘೋಷಿಸಬೇಕು. ಆರೋಪಿತರಿಗೆ ಕಠಿಣ ಶಿಕ್ಷೆ ವಿಧಿಸಬೇಕು’ ಎಂದು ಮನವಿಯಲ್ಲಿ ತಿಳಿಸಿದರು.

ತಾಲ್ಲೂಕು ಸಂಚಾಲಕ ಯಮನಪ್ಪ ಚಲುವಾದಿ, ಮುಖಂಡರಾದ ಯಂಕಪ್ಪ ಚಲುವಾದಿ, ನಾಗರಾಜ ಹಾಲಭಾವಿ, ಮೌನೇಶ ಗುಡದನಾಳ, ಶಿವಕುಮಾರ ಸಂತೆಕೆಲ್ಲೂರು, ದುರುಗಪ್ಪ ಸಂತೆಕೆಲ್ಲೂರು, ಸೋಮಣ್ಣ ಚಿತ್ತಾಪುರ, ಚಿಂತಾಮಣಿ ಚಿತ್ತಾಪುರ ಹಾಜರಿದ್ದರು.