ಎಲೆ ಬಿಚ್ಚಾಲಿ: ತುಂಗಭದ್ರ ನದಿ ಸುಳಿಗೆ ಸಿಲುಕಿ ಇಬ್ಬರು ಸಾವು

ರಾಯಚೂರು: ಬೆಂಗಳೂರಿನಿಂದ ರಾಯರ ದರ್ಶನಕ್ಕೆ ಆಗಮಿಸಿದ ಭಕ್ತರು ಎಲೆಬಿಚ್ಚಾಲಿಯ ರಾಯರ ತಪೋ ಕಟ್ಟೆ ದರ್ಶನಕ್ಕೆ ಬಂದ ಸಂದರ್ಭದಲ್ಲಿ ಗುರುವಾರ ಸಂಜೆ ತುಂಗಭದ್ರ ನದಿಯಲ್ಲಿ ಈಜಲು ಹೋಗಿ ನೀರಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ.

ಒಟ್ಟು 15 ಜನ ಭಕ್ತರು ಬೆಂಗಳೂರಿನಿಂದ ಆಗಮಿಸಿದ್ದರು. ರಾಯರ ದರ್ಶನದ ನಂತರ ಗಾಣದಾಳಕ್ಕೆ ತೆರಳಿ ಪಂಚಮುಖಿಯ ದರ್ಶನ ಪಡೆದು ನಂತರ, ರಾಯರ ತಪುಕಟ್ಟೆ ಎಂದೇ ಖ್ಯಾತಿ ಹೊಂದಿದ ಎಲೆ ಬಿಚ್ಚಾಲಿ ಗ್ರಾಮಕ್ಕೆ ಬಂದಿದ್ದರು. ಕೆಲವರು ನೀರಿಗಿಳಿದು ಈಜುತ್ತಿದ್ದರು. ಇಬ್ಬರೂ ಈಜುತ್ತಾ ನದಿಯ ಒಳಭಾಗಕ್ಕೆ ತೆರಳಿ ನದಿ ನೀರಿನ ಸೆಳವಿಗೆ ಸಿಲುಕಿ ಮೃತಪಟ್ಟಿದ್ದಾರೆ. ಮೃತರನ್ನು ಮುತ್ತುರಾಜ್ ಹಾಗೂ ಮದನ್ ಎಂದು ಗುರುತಿಸಲಾಗಿದೆ.

ಮೃತ ದೇಹ ಹೊರ ತೆಗೆದು ಮರಣೋತ್ತರ ಪರೀಕ್ಷೆ ನಡೆಸಿ ಸಂಬಂಧಿಕರಿಗೆ ಒಪ್ಪಿಸಲಾಗಿದೆ. ಸಂಬಂದಿಕರು ಶವಗಳನ್ನು ಬೆಂಗಳೂರಿಗೆ ಒಯ್ದಿದ್ದಾರೆ. ಯಾಪಲದಿನ್ನಿ ಠಾಣೆಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.