ತುಮಕೂರು | ಜೀವ ಹಿಂಡುತ್ತಿದೆ ಅಕ್ಕಿ ಗಿರಣಿ ದೂಳು: ಕಾರ್ಮಿಕರ ಆರೋಗ್ಯ ಹಾಳು
ಕೈಗಾರಿಕಾ ಪ್ರದೇಶದಲ್ಲಿ ಕಾಲಿಟ್ಟಲೆಲ್ಲ ಬರೀ ದೂಳು; ಕಾರ್ಮಿಕರ ಆರೋಗ್ಯ ಹಾಳು
ತುಮಕೂರು: ನಗರಕ್ಕೆ ಹೊಂದಿಕೊಂಡಂತಿರುವ ಅಂತರಸನಹಳ್ಳಿ ಕೈಗಾರಿಕಾ ಪ್ರದೇಶದ ಅಕ್ಕಿ ಗಿರಣಿಗಳು ಹೊರಸೂಸುವ ಹಾನಿಕಾರಕ ಹೊಗೆ ಮಿಶ್ರಿತ ಕಪ್ಪಾದ ದೂಳು ಜನರ ಜೀವಕ್ಕೆ ಕುತ್ತು ತರುತ್ತಿದೆ.
ದೂಳು ಗಾಳಿಯಲ್ಲಿ ಸೇರಿಕೊಂಡು ಕಿಲೊ ಮೀಟರ್‌ ಗಟ‌್ಟಲೆ ಹರಡುತ್ತಿದೆ. ಸುತ್ತಮುತ್ತಲಿನ ಕೈಗಾರಿಕೆಗಳ ಸಿಬ್ಬಂದಿ ಪ್ರಾಣ ಪಣಕ್ಕಿಟ್ಟು ಕೆಲಸ ಮಾಡುತ್ತಿದ್ದಾರೆ. ಸ್ಥಳೀಯರು ಹಾಗೂ ನಗರದ ಜನರು ಪ್ರತಿನಿತ್ಯ ಇಂತಹ ದೂಳು ಸೇವಿಸಿ ಬದುಕುತ್ತಿದ್ದಾರೆ.
ಅಂತರಸನಹಳ್ಳಿ ಕೈಗಾರಿಕೆ ಸುತ್ತಮುತ್ತಲಿನ ಪ್ರದೇಶದಲ್ಲಿ 43 ಅಕ್ಕಿ ಗಿರಣಿಗಳಿವೆ. ಬಹುತೇಕ ಕಡೆ ಹೊಗೆ ಹರಡುವಿಕೆ ತಡೆಗೆ ಕ್ರಮ ವಹಿಸುತ್ತಿಲ್ಲ. ಮಾಲಿನ್ಯ ನಿಯಂತ್ರಣ ಮಂಡಳಿ ಕಚೇರಿಯ ಅನತಿ ದೂರದಲ್ಲಿಯೇ ಶುದ್ಧ ಗಾಳಿಗೆ ಯುದ್ಧ ಮಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ರಸ್ತೆಗಳಲ್ಲಿ ಕಣ್ಣಾಡಿಸಿದರೆ ದೂಳು ಗೋಚರಿಸುತ್ತದೆ. ಇಲ್ಲಿ ಕೆಲಸಕ್ಕೆ ಹೋಗುವವರ ಪಾಡು ಹೇಳತೀರದಾಗಿದೆ.
ಅಕ್ಕಿ ಗಿರಣಿಗಳು ಪ್ರತಿ ದಿನ ಸದ್ದು ಮಾಡುತ್ತಿರುತ್ತವೆ. ಈಗ ಭತ್ತ ಕಟಾವು ಕಾರ್ಯ ಶುರುವಾಗಿದ್ದು, ಗಿರಣಿಗಳಲ್ಲಿ ಕೆಲಸ ಹೆಚ್ಚಾಗಿದೆ. ರಾತ್ರಿ ಸಮಯದಲ್ಲೂ ಅಕ್ಕಿ ಮೂಟೆ ಸರಬರಾಜು ಕಾರ್ಯ ನಡೆಯುತ್ತಿದೆ. ಜಿಲ್ಲೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಭತ್ತ ಬೆಳೆಯುವುದಿಲ್ಲ. ಆದರೂ ಜಿಲ್ಲೆ ಅಕ್ಕಿ ಗಿರಣಿಗಳಿಗೆ ಹೆಸರು ವಾಸಿ. ಅಕ್ಕಪಕ್ಕದ ರಾಜ್ಯಗಳಿಗೂ ಇಲ್ಲಿಂದ ಅಕ್ಕಿ ಪೂರೈಕೆಯಾಗುತ್ತದೆ. ಬಳ್ಳಾರಿ, ಕೊಪ್ಪಳ, ರಾಯಚೂರು, ಗಂಗಾವತಿ ಭಾಗದಿಂದ ಭತ್ತ ತಂದು ಗಿರಣಿಯಲ್ಲಿ ಅಕ್ಕಿ ಸಿದ್ಧಪಡಿಸಿ, ಮಾರಾಟಕ್ಕೆ ಹೊರಗಡೆಗೆ ಕಳುಹಿಸಲಾಗುತ್ತದೆ.
ಗಿರಣಿಗಳು ಸಮರ್ಪಕ ಹಾಗೂ ಪೂರಕವಾದ ಪರಿಕರ ಬಳಸುತ್ತಿಲ್ಲ. ಇದರಿಂದಾಗಿ ದೂಳು ಎಲ್ಲೆಡೆ ಹರಡುತ್ತಿದೆ. ನಿರ್ವಹಣಾ ಕಾರ್ಯ ಸರಿಯಾಗಿ ಆಗುತ್ತಿಲ್ಲ. ಗಿರಣಿ ಸುತ್ತಮುತ್ತಲಿನ ನಿವಾಸಿಗಳು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಕಲುಷಿತ ಗಾಳಿಯಿಂದ ಜನರ ಆರೋಗ್ಯ ಹದಗೆಡುತ್ತಿದೆ. ಶ್ವಾಸಕೋಶ ಕಟ್ಟಿಕೊಳ್ಳುತ್ತಿದೆ. ಕಣ್ಣಿನಲ್ಲಿ ದೂಳು ಬಿದ್ದು, ಆಸ್ಪತ್ರೆಗೆ ಅಲೆಯುವುದೇ ನಿತ್ಯದ ಕಾಯಕವಾಗುತ್ತಿದೆ.
ಹೊಗೆ ಮಿಶ್ರಿತ ದೂಳು ಅಕ್ಕಪಕ್ಕದ ಕಟ್ಟಡಗಳ ಮೇಲಿನ ಸೋಲಾರ್‌ ಘಟಕಗಳನ್ನು ಆವರಿಸಿಕೊಳ್ಳುತ್ತಿದೆ. ಹೀಗಾಗಿ ಅಗತ್ಯ ಪ್ರಮಾಣದಲ್ಲಿ ವಿದ್ಯುತ್‌ ಉತ್ಪಾದನೆಯಾಗುತ್ತಿಲ್ಲ. ಪ್ರಮುಖ ಕಂಪನಿಗಳಲ್ಲಿ ಸೋಲಾರ್‌ ಘಟಕ ಸ್ವಚ್ಛತೆಗಾಗಿ ಸಿಬ್ಬಂದಿ ನಿಯೋಜಿಸುತ್ತಿದ್ದಾರೆ. ಪ್ರತಿ ದಿನ ನೀರಿನಿಂದ ಘಟಕ ಸ್ವಚ್ಛಗೊಳಿಸಲಾಗುತ್ತಿದೆ. ಇಲ್ಲದಿದ್ದರೆ ಕನಿಷ್ಠ ಪ್ರಮಾಣದ ವಿದ್ಯುತ್‌ ಸಹ ಸಿಗುವುದಿಲ್ಲ.
ಪರಿಸರದ ಮೇಲೂ ದೂಳು ಪ್ರಭಾವ ಬೀರುತ್ತಿದೆ. ಕೈಗಾರಿಕಾ ಪ್ರದೇಶದ ವ್ಯಾಪ್ತಿಯಲ್ಲಿ ಗಿಡಗಳ ಬೆಳವಣಿಗೆ ಕುಂಠಿತವಾಗಿದೆ. ಹಸಿರಿನಿಂದ ಕಂಗೊಳಿಸಬೇಕಿದ್ದ ಗಿಡಗಳು ಕಪ್ಪು ಬಣ್ಣಕ್ಕೆ ತಿರುಗುತ್ತಿವೆ. ಗಿಡದ ರಕ್ಷಣೆಗೆ ಯಾವುದೇ ಕ್ರಮ ಕೈಗೊಂಡರೂ ಫಲ ಕೊಡುತ್ತಿಲ್ಲ. ಇಲ್ಲಿನ ವಾತಾವರಣದಿಂದ ನೆಟ್ಟ ಸಸಿ ಕೂಡ ಉಳಿಯುತ್ತಿಲ್ಲ.
‘ಅಕ್ಕಿ ಗಿರಣಿ ಸಮಸ್ಯೆ ಇಂದು, ನಿನ್ನೆಯದಲ್ಲ. ಹಲವು ವರ್ಷಗಳ ಹಳೆಯದು. ಅಧಿಕಾರಿಗಳು ಕೇವಲ ನಾಮಕಾವಸ್ತೆ ಎಂಬಂತೆ ಬಂದು ಹೋಗುತ್ತಾರೆ. ಜನರ ಬದುಕಿನ ಬಗ್ಗೆ ಕನಿಷ್ಠ ಕಾಳಜಿ ವಹಿಸುತ್ತಿಲ್ಲ’ ಎಂದು ಕಂಪೆನಿಯೊಂದರ ಕಾರ್ಮಿಕರೊಬ್ಬರು ಪ್ರತಿಕ್ರಿಯಿಸಿದರು.
ಅಗತ್ಯ ಮುಂಜಾಗ್ರತಾ ಕ್ರಮ ವಹಿಸದ ಅಕ್ಕಿ ಗಿರಣಿ ಮಾಲೀಕರಿಗೆ ನೋಟಿಸ್ ಜಾರಿ ಮಾಡಲಾಗಿದೆ. ಹಾನಿಕಾರಕ ಹೊಗೆ ಹೊರ ಬರದಂತೆ ಕ್ರಮ ಕೈಗೊಳ್ಳಲು ಸೂಚಿಸಲಾಗಿದೆರವಿಚಂದ್ರ ಪರಿಸರ ಅಧಿಕಾರಿ ವಾಯು ಮಾಲಿನ್ಯ ನಿಯಂತ್ರಣ ಮಂಡಳಿ
ಕಣ್ಣಿಗೆ ಸಮಸ್ಯೆ
ಕಣ್ಣಿಗೆ ದೂಳು ಬಿದ್ದು ತುಂಬಾ ಸಮಸ್ಯೆಯಾಗುತ್ತಿದೆ. ಕಣ್ಣು ತೆರೆಯಲು ಆಗುತ್ತಿಲ್ಲ. ಕೆಲಸಕ್ಕೆ ರಜೆ ಹಾಕಿ ಆಸ್ಪತ್ರೆಗೆ ಅಲೆಯುತ್ತಿದ್ದೇನೆ. ಹಲವು ವರ್ಷಗಳಿಂದ ಇದೇ ರೀತಿಯಾಗುತ್ತಿದೆ. ಇದಕ್ಕೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಯಾವುದೇ ಕಾರ್ಯ ಕೈಗೊಂಡಿಲ್ಲ.
ಎಚ್‌.ಎಸ್.ಬಸವರಾಜು, ಕಾರ್ಮಿಕ
ಗಾಳಿ ಗುಣಮಟ್ಟ ಕುಸಿತ
ಕೈಗಾರಿಕಾ ಪ್ರದೇಶದಲ್ಲಿನ ಗಾಳಿಯ ಗುಣಮಟ್ಟ ಪ್ರತಿ ವರ್ಷ ಕುಸಿಯುತ್ತಿದೆ. ನಗರದ ಇತರೆ ಪ್ರದೇಶಗಳಿಗೆ ಹೋಲಿಸಿದರೆ ಅತ್ಯಂತ ಕೆಟ್ಟ ಪರಿಸ್ಥಿತಿ ಇದೆ. ಇಲ್ಲಿನ ಅಕ್ಕಿ ಗಿರಣಿ, ಕೆಮಿಕಲ್‌ ಕಾರ್ಖಾನೆ, ಹೆದ್ದಾರಿ ಕಾಮಗಾರಿಗಳಿಂದ ಗಾಳಿಯ ಗುಣಮಟ್ಟ ಕಡಿಮೆಯಾಗಿದೆ. ರಸ್ತೆಗಳು ಅಧ್ವಾನ ಆಗಿದ್ದು, ಕೆಐಎಡಿಬಿ ಅಧಿಕಾರಿಗಳು ಕ್ರಮಕೈಗೊಳ್ಳುತ್ತಿಲ್ಲ.
ಎಸ್.ಹನುಮಂತರಾಯಪ್ಪ, ಮಾನವ ಸಂಪನ್ಮೂಲ ವಿಭಾಗದ ಮುಖ್ಯಸ್ಥ, ವಿಪ್ರೊ ಎಂಟರ್‌ಪ್ರೈಸಸ್‌
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.