ಭಟ್ಕಳ: ಎಸ್‌ಟಿಪಿ ಸ್ಥಾಪನೆಗೆ ಸ್ಥಳೀಯರ ವಿರೋಧ

ಭಟ್ಕಳ: ಪಟ್ಟಣದಲ್ಲಿ ತ್ಯಾಜ್ಯನೀರು ಶುದ್ಧಿಕರಿಸಲು ಸುಧಾರಿತ ತಂತ್ರಜ್ಞಾನದ ಘಟಕ ನಿರ್ಮಿಸಲು ನಗರ ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ ನಿರ್ಧರಿಸಿದ್ದರೂ, ಈ ಹಿಂದಿನ ಘಟಕಗಳ ಅಧ್ವಾನದ ಕಾರಣದಿಂದ ಸ್ಥಳೀಯರು ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ.

ಗೌಸಿಯಾ ಸ್ಟ್ರೀಟ್‌ನಲ್ಲಿ ನಿತ್ಯ 25 ಲಕ್ಷ ಲೀಟರ್ ತ್ಯಾಜ್ಯನೀರು ಶುದ್ಧೀಕರಣದ ಸಾಮರ್ಥ್ಯ ಹೊಂದಿರುವ ತ್ಯಾಜ್ಯನೀರು ಸಂಸ್ಕರಣಾ ಘಟಕ (ಎಸ್‌ಟಿಪಿ) ನಿರ್ಮಿಸಲು ಮಂಡಳಿ ಯೋಜನೆ ರೂಪಿಸಿದೆ. ಘಟಕ ನಿರ್ಮಿಸಿದರೆ ಸದ್ಯ ಇರುವ ಒಳಚರಂಡಿ ಸೋರಿಕೆ ಸಮಸ್ಯೆ ಪರಿಹಾರ ಆಗಲಿದೆ ಎಂಬುದು ಮಂಡಳಿಯ ಅಧಿಕಾರಿಗಳ ವಾದ.

‘20 ವರ್ಷಗಳ ಹಿಂದೆ ನಿರ್ಮಿಸಿದ ಪಂಪಿಂಗ್ ಘಟಕದಿಂದ ನಾವು ನರಕ ಯಾತನೆ ಅನುಭವಿಸುತ್ತಿದ್ದೇವೆ. ಇನ್ನೊಂದು ಘಟಕ ನಿರ್ಮಿಸಿದರೆ ಸಮಸ್ಯೆ ಬಿಗಡಾಯಿಸಬಹುದು. ಹೀಗಾಗಿ, ಘಟಕ ನಿರ್ಮಾಣಕ್ಕೆ ಒಪ್ಪಿಗೆ ಸೂಚಿಸುವುದಿಲ್ಲ’ ಎಂಬುದು ಗೌಸಿಯಾ ಸ್ಟ್ರೀಟ್ ನಿವಾಸಿಗಳ ಅಭಿಪ್ರಾಯ.

‘ವೆಂಕಟಾಪುರದಲ್ಲಿರುವ ಎಸ್‌ಟಿಪಿ ಘಟಕ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದೆ. ಅದೇ ಮಾದರಿಯ ಸುಧಾರಿತ ಘಟಕ ಗೌಸಿಯಾ ಸ್ಟ್ರೀಟ್‌ ಬಳಿ ನಿರ್ಮಿಸಿ, ಇಲ್ಲಿಂದ ಶುದ್ಧೀಕರಣಗೊಂಡ ನೀರನ್ನು ಶರಾಬಿ ನದಿಯ ಮೂಲಕ ಸಮುದ್ರಕ್ಕೆ ಬೀಡುವ ಯೋಜನೆ ರೂಪಿಸಲಾಗಿದೆ. ಘಟಕ ನಿರ್ಮಾಣವಾದರೆ ಸಮಸ್ಯೆಗೆ ಒಂದು ಹಂತದ ಪರಿಹಾರ ಸಿಗಲಿದೆ’ ಎನ್ನುತ್ತಾರೆ ನಗರ ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ ಕಾರ್ಯಪಾಲಕ ಎಂಜಿನಿಯರ್ ಶಿವರಾಮ ನಾಯ್ಕ.

‘ಪಟ್ಟಣದಲ್ಲಿ 800ಕ್ಕೂ ಅಧಿಕ ಚೇಂಬರ್‌ಗಳಿದ್ದು, ಅದರ ನಿರ್ವಹಣೆ ಮಾಡುವುದೆ ಪುರಸಭೆಗೆ ಹೊರೆಯಾಗಿದೆ. ಸಿಬ್ಬಂದಿ ಕೊರತೆ, ಅಧುನಿಕ ಯಂತ್ರೋಪಕರಗಳ ಅಲಭ್ಯತೆ ಒಳಚರಂಡಿ ನಿರ್ವಹಣೆ ದುಬಾರಿಯಾಗುತ್ತಿದೆ’ ಎಂಬುದಾಗಿ ಪುರಸಭೆ ಅಧಿಕಾರಿಗಳು ಹೇಳುತ್ತಿದ್ದಾರೆ.