ಚೆಸ್‌ ಪಾರ್ಕ್ ಸದ್ಬಳಕೆ ಮಾಡಿಕೊಳ್ಳಿ: ಅಶ್ಫಾಕ್ ಶೇಖ

ದಾಂಡೇಲಿ: ‘ಚದುರಂಗ ಆಟವು ವಿದ್ಯಾರ್ಥಿಗಳ ಏಕಾಗ್ರತೆಗೆ ಮುಖ್ಯವಾದ ಕ್ರೀಡೆಯಾಗಿದೆ. ಮಾನಸಿಕ ಸಾಮರ್ಥ್ಯ, ಬೌದ್ಧಿಕ ಚಿಂತನೆ, ತಾರ್ಕಿಕ ಆಲೋಚನೆ ಶಕ್ತಿಯನ್ನು ನೀಡುವ ಅತ್ಯುತ್ತಮ ಕ್ರೀಡೆಯಾಗಿದೆ.ನಗರದಲ್ಲಿರುವ ಚೆಸ್ ಪಾರ್ಕ್‌ ಸದ್ಬಳಕೆ ಮಾಡಿಕೊಳ್ಳಿ ಎಂದು  ನಗರಸಭೆ ಅಧ್ಯಕ್ಷ ಅಶ್ಫಾಕ್ ಶೇಖ ಹೇಳಿದರು.

ಜಿಲ್ಲಾಡಳಿತ, ಜಿಲ್ಲಾ ಪಂಚಾಯಿತಿ, ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಸಹಯೋಗದಲ್ಲಿ ಜನತಾ ವಿದ್ಯಾಲಯದ ಸಭಾಂಗಣದಲ್ಲಿ ಶನಿವಾರ ನಡೆದ ದಾಂಡೇಲಿ ತಾಲ್ಲೂಕಿನ ಪ್ರಾಥಮಿಕ ಹಾಗೂ ಪ್ರೌಢಶಾಲೆಗಳ ವಿದ್ಯಾರ್ಥಿಗಳಿಗೆ ತಾಲ್ಲೂಕು ಮಟ್ಟದ ಚದುರಂಗ ಸ್ಪರ್ಧೆ ಉದ್ಘಾಟಿಸಿ ಅವರು ಮಾತನಾಡಿದರು.

ಜನತಾ ವಿದ್ಯಾಲಯದ ಪ್ರೌಢಶಾಲೆ ವಿಭಾಗದ ಮುಖ್ಯಶಿಕ್ಷಕ ಎಂ.ಬಿ.ಅರವಳ್ಳಿ, ಇಂಗ್ಲಿಷ್‌ ಮಾಧ್ಯಮ ಶಾಲೆಯ ಮುಖ್ಯ ಶಿಕ್ಷಕ ನಾರಾಯಣ ನಾಯ್ಕ, ಸಿಆರ್‌ವಿ ಗಳಾದ ಲಲಿತಾ ಪುಟ್ಟುಗೌಡ ಮಾತನಾಡಿದರು.

ರಾಮಕೃಷ್ಣ ಪ್ರಭು, ರೋಹನ್ ಪ್ರಭು ತೀರ್ಪುಗಾರರಾಗಿ ಕಾರ್ಯನಿರ್ವಹಿಸಿದರು. 30 ಶಾಲಾ ತಂಡಗಳಿಂದ 70 ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಹಳಿಯಾಳದ ತುಕಾರಾಮ ಗೌಡಾ ಸ್ಪರ್ಧೆ ಸಂಯೋಜಿಸಿ ,ಯಶಸ್ವಿಗೆ ಸಹಕರಿಸಿದರು.

ಬಾಲಕರ ಪ್ರಾಥಮಿಕ ಶಾಲಾ ವಿಭಾಗದಲ್ಲಿ ಸುಧಾಂಶು ಹೆಗಡೆ– ಪ್ರಥಮ, ಮುತ್ತಪ್ಪ ಚಂಚಲಿ– ದ್ವಿತೀಯ, ತಸತ್ವಿ ಉಪಾಧ್ಯ– ತೃತೀಯ, ಬಾಲಕಿಯರ ವಿಭಾಗದಲ್ಲಿ ಕೃಷಾ– ಪ್ರಥಮ, ಜಾಹ್ನವಿ ಗ್ರಾಮ ಜೋಶಿ– ದ್ವಿತೀಯ, ಸಮೃದ್ಧಿ ರೇವಣಕರ– ತೃತೀಯ.

ಬಾಲಕರ ಪ್ರೌಢಶಾಲಾ ವಿಭಾಗದಲ್ಲಿ ಆಯುಷ್ ನಾಯಕ್– ಪ್ರಥಮ, ಶಿವಾನಂದ ಪನಿಗಟ್ಟಿ– ದ್ವಿತೀಯ, ಅನ್ವಿತ್ ಗೋಟೆ– ತೃತೀಯ, ಪ್ರೌಢಶಾಲಾ ಬಾಲಕಿಯರ ವಿಭಾಗದಲ್ಲಿ ಕೋಮಲ ಸಾಲಿ– ಪ್ರಥಮ, ಸಿಪಾ ರಫೀಕ್ ಖಾನ್– ದ್ವಿತೀಯ, ಕಾವ್ಯ ಬೆಳಗಾಂಕರ– ತೃತೀಯ ಸ್ಥಾನ ಪಡೆದರು.