ಕಬ್ಬಿಣದ ಅದಿರು ನಾಪತ್ತೆ ಪ್ರಕರಣ: ಸೈಲ್ ಮನೆಯಿಂದ ದಾಖಲೆ ವಶಕ್ಕೆ ಪಡೆದ ಇ.ಡಿ

ಕಾರವಾರ: ಇಲ್ಲಿನ ಶಾಸಕ ಸತೀಶ ಸೈಲ್ ನಿವಾಸದಲ್ಲಿ ಗುರುವಾರ ನಸುಕಿನ 4 ಗಂಟೆಯವರೆಗೂ ಪರಿಶೀಲನೆ ನಡೆಸಿ ಜಾರಿ ನಿರ್ದೇಶನಾಲಯದ (ಇ.ಡಿ) ಅಧಿಕಾರಿಗಳ ತಂಡವು ಹಲವು ದಾಖಲೆಗಳನ್ನು ವಶಕ್ಕೆ ಪಡೆಯಿತು.

‘24 ಮಂದಿ ಅಧಿಕಾರಿಗಳು ಮತ್ತು ಸಿಬ್ಬಂದಿ, ಶಾಸಕರ ಮನೆಯಿಂದ ಗುರುವಾರ ನಸುಕಿನವರೆಗೆ ಹಂತಹಂತವಾಗಿ ನಿರ್ಗಮಿಸಿದರು. ದಾಖಲೆಗಳನ್ನು 4 ಪೆಟ್ಟಿಗೆಗಳಲ್ಲಿ ಒಯ್ದರು’ ಎಂದು ಮೂಲಗಳು ತಿಳಿಸಿವೆ.

‘ಬೇಲೆಕೇರಿ ಬಂದರಿನಿಂದ ಕಬ್ಬಿಣದ ಅದಿರು ನಾಪತ್ತೆ ಪ್ರಕರಣದಲ್ಲಿ ಅಪರಾಧಿ ಆಗಿರುವ ಶಾಸಕ ಸತೀಶ ಸೈಲ್ ಈ ಹಿಂದೆ ನಡೆಸಿದ ಹಣಕಾಸು ವಹಿವಾಟಿಗೆ ಸಂಬಂಧಿಸಿದಂತೆ ಇ.ಡಿ ಅಧಿಕಾರಿಗಳು ಪರಿಶೀಲಿಸಿರಬಹುದು. ಸೈಲ್ ಮನೆಯಲ್ಲಿ ಇರದ ಕಾರಣಕ್ಕೆ ಅವರನ್ನು ಕರೆಯಿಸಲು ಅಧಿಕಾರಿಗಳು ಸಾಕಷ್ಟು ಪ್ರಯತ್ನ ನಡೆಸಿದರು. ಇದಕ್ಕಾಗಿ ಅವರ ಅಂಗರಕ್ಷಕ, ಆಪ್ತ ವಲಯದ ಒಂದಿಬ್ಬರನ್ನು ವಿಚಾರಣೆ ನಡೆಸಿದರು’ ಎಂದೂ ಮೂಲಗಳು ತಿಳಿಸಿವೆ.