ಮುಂಡಗೋಡ: ಕೋಡಿ ಬಿದ್ದು ಹರಿಯುತ್ತಿರುವ ‘ಧರ್ಮಾ‌’

ಮುಂಡಗೋಡ: ತಾಲ್ಲೂಕಿನ ಮಳಗಿ ಸಮೀಪದ ಧರ್ಮಾ ಜಲಾಶಯ ಭಾನುವಾರ ಮಧ್ಯಾಹ್ನ ಕೋಡಿ ಬಿದ್ದಿದೆ. ಸತತವಾಗಿ ನಾಲ್ಕು ವರ್ಷಗಳಿಂದ ಆಗಸ್ಟ್ ತಿಂಗಳಲ್ಲಿಯೇ ಭರ್ತಿಯಾಗುತ್ತಿದೆ. ಕೋಡಿ ಬಿದ್ದಿರುವ ದೃಶ್ಯವನ್ನು ಕಣ್ತುಂಬಿಕೊಳ್ಳಲು ಸ್ಥಳೀಯ ರೈತರು ಹಾಗೂ ಸುತ್ತಲಿನ ಗ್ರಾಮಸ್ಥರು ಜಲಾಶಯಕ್ಕೆ ಭೇಟಿ ನೀಡುತ್ತಿದ್ದಾರೆ.

ಈ ಜಲಾಶಯಯದ ಬಹುಪಾಲು ನೀರು ಹಾನಗಲ್ ತಾಲ್ಲೂಕಿನ ರೈತರಿಗೆ ಉಪಯೋಗವಾಗುತ್ತದೆ. ಎಡಭಾಗದಲ್ಲಿ ಕೋಡಿ ಬೀಳುವ ನೀರು, ಕಾಲುವೆ ಮೂಲಕ ಹರಿದು ಪಕ್ಕದ ತಾಲ್ಲೂಕಿನ ಕೆರೆಕಟ್ಟೆಗಳನ್ನು ತುಂಬಿಸುತ್ತಿದೆ. ಮುಂಡಗೋಡ ತಾಲ್ಲೂಕಿನ ಐದಾರು ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿ ಶಾಶ್ವತ ಕುಡಿಯುವ ನೀರಿನ ಯೋಜನೆಗೂ ಇದೇ ಜಲಾಶಯದ ನೀರು ಬಳಕೆಯಾಗುತ್ತಿದೆ.

‘ಧರ್ಮಾ ಜಲಾಶಯ ಕೋಡಿ ಬೀಳುವುದನ್ನು ಕಣ್ತುಂಬಿಕೊಳ್ಳುವ ರೈತರು, ಟ್ರ್ಯಾಕ್ಟರ್ ಇನ್ನಿತರ ವಾಹನಗಳಲ್ಲಿ ಬಂದು ದಡದಲ್ಲಿ ನಿಂತು ಪೂಜೆ ಸಲ್ಲಿಸುತ್ತಾರೆ. ರಜಾದಿನಗಳಲ್ಲಿ ಪ್ರವಾಸಿಗರು ಜಲಾಶಯದ ಕೋಡಿ ಬೀಳುವು ದೃಶ್ಯವನ್ನು ನೋಡಲು ಹೆಚ್ಚಿನ ಸಂಖ್ಯೆಯಲ್ಲಿ ಬರುತ್ತಾರೆ. ಉಬ್ಬು ಹರಿದು ಹೋಗುವ ಸ್ಥಳದಲ್ಲಿ ಯುವಕರು ಈಜಾಡುತ್ತ ಸಂತಸ ಪಡುತ್ತಾರೆ’ ಎನ್ನುತ್ತಾರೆ ಸ್ಥಳೀಯ ರೈತ ಹನಮಂತಪ್ಪ.

‘ಎರಡು ದಿನಗಳ ಹಿಂದೆ ನೋಡಿದಾಗ ಕೋಡಿ ಹರಿಯಲು ಎರಡೂವರೆ ಅಡಿಗಳಷ್ಟು ನೀರು ಬೇಕಾಗಿತ್ತು. ಭಾನುವಾರ ಮಧ್ಯಾಹ್ನದ ನಂತರ ಸಣ್ಣ ಪ್ರಮಾಣದಲ್ಲಿ ಕೋಡಿ ಬೀಳುತ್ತ, ಸಂಜೆಯ ವೇಳೆಗೆ ಹೆಚ್ಚಾಗಿದೆ’ ಎಂದು ಸ್ಥಳೀಯ ನಿವಾಸಿ ರಾಜೇಂದ್ರ ನಾಯ್ಕ ಹೇಳಿದರು.