ಮಗುವಿನ ಉತ್ತಮ ಆರೋಗ್ಯಕ್ಕೆ ಎದೆಹಾಲು ಸಹಕಾರಿ: ಸ್ತ್ರೀರೋಗ ತಜ್ಞೆ ಶಾರದಾ

ಸಿಂದಗಿ: ‘ಸ್ತನ್ಯಪಾನವು ಶಿಶುಗಳನ್ನು ರಕ್ಷಿಸುತ್ತದೆ, ತಾಯಂದಿರನ್ನು ಸದೃಢಗೊಳಿಸುತ್ತದೆ ಹಾಗೂ ಕ್ಯಾನ್ಸರ್ ತಡೆಯುತ್ತದೆ’ ಎಂದು ಸ್ತ್ರೀರೋಗ ತಜ್ಞೆ ಶಾರದಾ ನಾಡಗೌಡ ಹೇಳಿದರು.

ಇಲ್ಲಿನ ಮೊಗಲಾಯಿ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆಯಲ್ಲಿ ಭಾರತೀಯ ಮಕ್ಕಳ ತಜ್ಞರ ಸಂಘ, ತಾಲ್ಲೂಕು ಆರೋಗ್ಯ ಇಲಾಖೆ ಸಹಯೋಗದಲ್ಲಿ ಮಂಗಳವಾರ ಹಮ್ಮಿಕೊಂಡಿದ್ದ ವಿಶ್ವ ಸ್ತನ್ಯಪಾನ ಸಪ್ತಾಹ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

‘ಶಿಶು ಜನನದ ಒಂದು ಗಂಟೆಯಿಂದ ಎರಡು ವರ್ಷಗಳವರೆಗೆ ತಾಯಿ ಎದೆಹಾಲು ಮಾತ್ರ ನೀಡಬೇಕು. ಜೇನುತುಪ್ಪ ನೆಕ್ಕಿಸುವುದು, ನೀರು ಕುಡಿಸುವುದು ಮಾಡಬಾರದು’ ಎಂದು ತಿಳಿಸಿದರು.

ಡಾ. ಶ್ರುತಿ ಸಜ್ಜನ ಮಾತನಾಡಿ, ‘ಎದೆಹಾಲು ಅಮೃತಕ್ಕೆ ಸಮಾನ. ಹೀಗಾಗಿ ತಾಯಂದಿರು ಮಕ್ಕಳಿಗೆ ಎದೆಹಾಲು ಕುಡಿಸಬೇಕು. ಅನೇಕ ಸಾಂಕ್ರಾಮಿಕ ರೋಗಗಳು ಬಾರದಂತೆ ತಡೆಯುವ ಶಕ್ತಿ ಎದೆಹಾಲಿನಲ್ಲಿದೆ’ ಎಂದು ಸಲಹೆ ನೀಡಿದರು.

ಭಾರತೀಯ ಮಕ್ಕಳ ತಜ್ಞರ ಸಂಘ ರಾಜ್ಯ ಘಟಕದ ಅಧ್ಯಕ್ಷ ಡಾ. ಎಸ್.ವಿ.ಪಾಟೀಲ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ‘ಎದೆಹಾಲು ಮಕ್ಕಳ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ. ಮಕ್ಕಳ ಸರ್ವಾಂಗೀಣ ಬೆಳವಣಿಗೆಯಲ್ಲಿ ಎದೆಹಾಲಿನಲ್ಲಿರುವ ಕೊಲೆಸ್ಟ್ರಾಮ್ ಅಂಶ ಸಹಕಾರಿಯಾಗಿದೆ’ ಎಂದು ತಿಳಿಸಿದರು.

ಡಾ. ಸೀಮಾ ವಾರದ, ಹಿರಿಯ ಆರೋಗ್ಯ ನಿರೀಕ್ಷಣಾಧಿಕಾರಿ ಪಿ.ವೈ.ಚೌಡಕಿ, ತಾಲ್ಲೂಕು ಆರೋಗ್ಯ ಶಿಕ್ಷಣಾಧಿಕಾರಿ ಎಸ್.ಡಿ.ಕುಲಕರ್ಣಿ ಮಾತನಾಡಿದರು.

ತಾಲ್ಲೂಕು ಆರೋಗ್ಯಾಧಿಕಾರಿ ಎ.ಎ.ಮಾಗಿ, ಜಿಲ್ಲೆಯ ಹಿರಿಯ ಮಕ್ಕಳ ತಜ್ಞರಾದ ಡಾ. ಸಿ.ಎಸ್.ಹಿರೇಗೌಡರ, ಡಾ. ಎಸ್.ಎಸ್.ಕಲ್ಯಾಣಶೆಟ್ಟಿ, ಡಾ.ಇಸ್ಮಾಯಿಲ್ ಮೊಗಲಾಯಿ, ವೈದ್ಯರಾದ ಸರೋಜಿನಿ ದಾನಗೊಂಡ, ನೂರಾನಿ ಮೊಗಲಾಯಿ, ಸುನಿತಾ ಹಿರೇಗೌಡರ, ಅಜೇಯ ದೇಸಾಯಿ, ತೌಷೀಫ್ ನಾಗರಳ್ಳಿ ಇದ್ದರು.