ಕನ್ನಡ ಅವನತಿ ತಡೆಗೆ ಎಚ್ಚರ ಅಗತ್ಯ: ಪುರುಷೋತ್ತಮ ಬಿಳಿಮಲೆ

ವಿಜಯಪುರ: ‘ಭಾರತೀಯ ಪ್ರಾದೇಶಿಕ ಭಾಷೆಗಳ ಬೆಳವಣಿಗೆ ವೇಗ ಪ್ರಸಕ್ತ ಶೇ 11ರಿಂದ 12ರಷ್ಟಿದೆ. ಆದರೆ, ಕನ್ನಡ ಭಾಷೆಯ ಬೆಳವಣಿಗೆ ವೇಗ ಶೇ 3.76 ರಷ್ಟಿದೆ. ಕನ್ನಡಿಗರು ಇತರೆ ಭಾಷೆಗಳ ಬಗ್ಗೆ ಗೌರವ ಇಟ್ಟುಕೊಳ್ಳಬೇಕು. ಆದರೆ, ನಮ್ಮ ಭಾಷೆ ಪಥನವಾಗದಂತೆ ಎಚ್ಚರ ವಹಿಸಬೇಕು’ ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ.ಪುರುಷೋತ್ತಮ ಬಿಳಿಮಲೆ ಹೇಳಿದರು.

ನಗರದ ಚಾಣಕ್ಯ ಕಲಾ ಮತ್ತು ವಾಣಿಜ್ಯ ಮಹಾವಿದ್ಯಾಲಯದಲ್ಲಿ ಕನ್ನಡ ಅಭಿವೃದ್ಧಿ ಪ್ರಾಧಿಕಾರ, ಕಮಲಾದೇವಿ ಪಾಟೀಲ ಮೆಮೋರಿಯಲ್ ಎಜ್ಯುಕೇಶನಲ್ ಅಸೋಸಿಯೇಶನ್ ಸಹಯೋಗದಲ್ಲಿ ಗುರುವಾರ ಆಯೋಜಿಸಲಾಗಿದ್ದ ‘ವಿಜಯಪುರ ಜಿಲ್ಲೆ- ನಾಡು ನುಡಿ ಚಿಂತನ’ ಕುರಿತು ವಿಚಾರ ಕಮ್ಮಟ ಉದ್ಘಾಟಿಸಿ ಅವರು ಮಾತನಾಡಿದರು.

‘ಶಾಲೆಗಳಲ್ಲಿ ಕನ್ನಡ ನೆಲೆ ತಪ್ಪಿದೆ. ಮುಂದಿನ 10 ವರ್ಷಗಳಲ್ಲಿ ಕನ್ನಡ ತೀವ್ರ ಹಿನ್ನಡೆ ಸಾಧಿಸಲಿದೆ. ಕನ್ನಡದಲ್ಲೇ ಪರಿಪಕ್ವವಾದ ಪದಗಳು ಇರುವಾಗ ಬೇರೆ ಭಾಷೆಯ ಪದಗಳನ್ನು ಬಳಸುವುದು ಯೋಗ್ಯವಲ್ಲ. ಈ ಬಗ್ಗೆ ಅರಿವು ಮೂಡಿಸಬೇಕಿದೆ’ ಎಂದರು.  

‘ರಾಜ್ಯದಲ್ಲಿ ಹೋಟೆಲ್‌ ಉದ್ಯಮ ಬಹುತೇಕ ಕನ್ನಡೇತರರ ಪಾಲಾಗಿದೆ. ಬಹುಪಾಲು ಕೈಗಾರಿಕೋದ್ಯಮಗಳಲ್ಲಿ ಅನ್ಯ ರಾಜ್ಯಗಳ ಹೊರಗುತ್ತಿಗೆದಾರರು ಹೆಚ್ಚಾಗಿದ್ದಾರೆ. ಇದರಿಂದ ಕನ್ನಡಿಗರ ಉದ್ಯೋಗಕ್ಕೆ ಕುತ್ತಾಗಿದೆ’ ಎಂದು ಬೇಸರ ವ್ಯಕ್ತಪಡಿಸಿದರು.

‘ಒಂದು ಕಾಲದಲ್ಲಿ ಪ್ರಭುತ್ವವನ್ನು ಪ್ರಶ್ನಿಸುವ ಶಕ್ತಿ ಕನ್ನಡಕ್ಕೆ ಇತ್ತು. ಆದರೆ, ಇಂದು ಆ ಆತ್ಮವಿಶ್ವಾಸವನ್ನೇ ಕನ್ನಡಿಗರು ಕಳೆದುಕೊಂಡಿದ್ದೇವೆ. ಕನ್ನಡ ನಾಡು ರೂಪುಗೊಂಡ ಬಗೆಯನ್ನು ವೈಚಾರಿಕವಾಗಿ ಮತ್ತು ವಿಸ್ತಾರವಾಗಿ ತಿಳಿದು, ಹೊಸ ಬಗೆಯಲ್ಲಿ ಕನ್ನಡ ನಾಡು ಕಟ್ಟಲು ಹೆಜ್ಜೆ ಇಡಬೇಕು’ ಎಂದರು.

ಬೆಂಗಳೂರಿನ ನೇಗಿಲಯೋಗಿ ಟ್ರಸ್ಟಿನ ಅಧ್ಯಕ್ಷ ಡಾ.ಎಚ್.ಆರ್.ಸ್ವಾಮಿ ಮಾತನಾಡಿ, ‘ದೇಶದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಏನನ್ನೂ ಪ್ರಶ್ನಿಸುವ ಪರಿಸ್ಥಿತಿ ಇಲ್ಲವಾಗಿದೆ. ಪ್ರಶ್ನಿಸಿದರೆ ಬದುಕಲು ಸಾಧ್ಯವಿಲ್ಲದಂತಾಗಿದೆ’ ಎಂದು ಬೇಸರ ವ್ಯಕ್ತಪಡಿಸಿದರು.

‘ಮನೆ, ಶಾಲೆಗಳಲ್ಲಿ ಮಕ್ಕಳಿಗೆ ಓದುವ ಸಂಸ್ಕೃತಿಯನ್ನು ಬೆಳೆಸಬೇಕಿದೆ. ಶಾಲಾ ಗ್ರಂಥಾಲಯದಲ್ಲಿರುವ ಪುಸ್ತಕಗಳು ಮಕ್ಕಳ ಕೈಗೆ ಪ್ರತಿದಿನ ಸಿಗುವಂತೆ ಮಾಡಬೇಕಿದೆ’ ಎಂದರು.

‘ಆದಿಲ್ ಶಾಹಿ ಸಾಹಿತ್ಯ - ಕನ್ನಡ ಅನುವಾದಗಳು’ ವಿಷಯವಾಗಿ ವಿಶೇಷ ಉಪನ್ಯಾಸ ನೀಡಿದ ಕಲಬುರಗಿ ಸಾರಿಗೆ ಇಲಾಖೆಯ ವಿಶ್ರಾಂತ ಅಧೀಕ್ಷಕ  ರಿಯಾಜ್ ಅಹ್ಮದ ಬೋಡೆ, ವಿಜಯಪುರ ಆದಿಲ್‌ಶಾಹಿಗಳು ಸಾಹಿತ್ಯ, ಸಂಗೀತ, ಕಲೆಗಳಿಗೆ, ಹಲವು ಭಾಷೆ, ಧರ್ಮ, ಸಂಸ್ಕೃತಿಗೆ ರಾಜಾಶ್ರಯ ನೀಡಿದ್ದರು. ಸ್ವತಃ ರಾಜ, ರಾಣಿಯರೇ ಸಾಹಿತ್ಯ ರಚಿಸಿದ್ದಾರೆ ಎಂದು ಹೇಳಿದರು.

ಆದಿಲ್‌ಶಾಹಿಗಳು ವಿಜಯಪುರದಲ್ಲಿ 197 ವರ್ಷ ಆಡಳಿತ ನಡೆಸಿದರೂ ಒಂದೇ ಒಂದು ಹಿಂದು–ಮುಸ್ಲಿಂ ಗಲಾಟೆಗಳು ನಡೆದಿಲ್ಲ. 350 ಪರ್ಷಿಯನ್‌, ದಖ್ಖನಿ ಹಸ್ತಪ್ರತಿಗಳು ಸಿಕ್ಕಿವೆ. 300 ಪುಸ್ತಕಗಳನ್ನು ಸೂಫಿಗಳು ರಚಿಸಿದ್ದಾರೆ. ಪ್ರತಿ ಗ್ರಂಥಗಳ ಹೆಸರುಗಳು ಸೌಹಾರ್ದತೆಗೆ ಪ್ರತೀಕವಾಗಿದ್ದವು ಎಂದರು.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ನಾಮ ನಿರ್ದೇಶಿತ ಸದಸ್ಯೆ ದಾಕ್ಷಾಯಿಣಿ ಹುಡೇದ, ಬನಶ್ರೀ ಹತ್ತಿ, ಡಾ.ಮದಗೊಂಡ ಬಿರಾದಾರ, ಪ್ರೊ.ವಿ.ಎಂ.ಸುರಪುರ, ಡಾ.ಎಂ.ಎಂ ಪಡಶೆಟ್ಟಿ, ದಾಕ್ಷಾಯಿಣಿ ಬಿರಾದಾರ, ರೇಣುಕಾ ವೈ. ಕೊಣ್ಣೂರ, ಡಾ.ಎಸ್.ಟಿ ಮೇರವಾಡೆ ಇದ್ದರು.