ಸುರಪುರ: ಭೂಮಿ ಮಂಜೂರಾತಿ ಆದೇಶ ಪ್ರತಿ ವಿತರಣೆ

ಸುರಪುರ: ನಗರದ ಅಂಬೇಡ್ಕರ್ ವೃತ್ತದಲ್ಲಿ ಕಳೆದ 192 ದಿನಗಳಿಂದ ಭೂಮಿ ಮಂಜೂರಾತಿಗೆ ಒತ್ತಾಯಿಸಿ ಪ್ರತಿಭಟನೆ ಮಾಡುತ್ತಿದ್ದ ಹೋರಾಟ ಸಮಿತಿ ಮತ್ತು ದಲಿತ ಪರ ಸಂಘಟನೆಗಳ ಒಕ್ಕೂಟದವರಿಗೆ ಶುಕ್ರವಾರ ಜಿಲ್ಲಾಧಿಕಾರಿ ಹರ್ಷಲ್ ಭೋಯರ್ ಅವರು ಭೂಮಿ ಮಂಜೂರಾತಿ ಆದೇಶ ಪ್ರತಿ ನೀಡಿದರು.

ಪ್ರತಿಭಟನಕಾರರನ್ನು ಉದ್ದೇಶಿಸಿ ಮಾತನಾಡಿದ ಅವರು, ‘ಭೂಮಿ ಮಂಜೂರಾತಿಗೆ ಒತ್ತಾಯಿಸಿ ಕೆಲ ತಿಂಗಳಿಂದ ಪ್ರತಿಭಟನೆ ನಡೆದಿತ್ತು. ಈ ಕುರಿತು ತಾಲ್ಲೂಕಾಡಳಿತದೊಂದಿಗೆ ಸುದೀರ್ಘವಾಗಿ ಚರ್ಚಿಸಿ, ಸರ್ಕಾರಿ ಭೂಮಿಯನ್ನು ಅಳೆತೆ ಮಾಡಿ ಗ್ರಂಥಾಲಯ ಮತ್ತು ಅಂಬೇಡ್ಕರ್ ಉದ್ಯಾನ ನಿರ್ಮಾಣಕ್ಕೆ ಸಮಾಜ ಕಲ್ಯಾಣ ಇಲಾಖೆಗೆ 10 ಗುಂಟೆ 8 ಆಣೆ ಜಮೀನು ಮಂಜೂರು ಮಾಡಲಾಗಿದೆ’ ಎಂದು ತಿಳಿಸಿದರು.

ಧರಣಿಯನ್ನು ಹಿಂಪಡೆಯಬೇಕು ಜತೆಗೆ ಮೈದಾನದಲ್ಲಿ ಹಾಕಿದ ಧ್ವಜಗಳನ್ನು ತೆರವುಗೊಳಿಸಬೇಕು ಎಂದು ಸೂಚಿಸಿದಾಗ ಹೋರಾಟಗಾರರು ಸಮ್ಮತಿ ಸೂಚಿಸಿದರು.

ಸಾಮೂಹಿಕ ಸಂಘಟನೆಗಳು ಭೂಮಿ ಮಂಜೂರಿ ಆದೇಶ ರದ್ದುಪಡಿಸಬೇಕೆಂದು ಆಗ್ರಹಿಸಿ ಗಾಂಧಿವೃತ್ತದಲ್ಲಿ ನಡೆಸುತ್ತಿದ್ದ ಧರಣಿ ಸ್ಥಳಕ್ಕೂ ಆಗಮಿಸಿದ ಜಿಲ್ಲಾಧಿಕಾರಿ ಪ್ರತಿಭಟನೆ ಕೈಬಿಡುವಂತೆ ತಿಳಿಸಿದರು. ಸ್ವಲ್ಪ ಹೊತ್ತು ವಾಗ್ವಾದ ನಡೆಸಿದ ಮುಖಂಡರು ನಂತರ ಧರಣಿ ವಾಪಾಸಾತಿಗೆ ಸಮ್ಮತಿಸಿದರು.

ಪೊಲೀಸ್ ವರಿಷ್ಠಾಧಿಕಾರಿ ಪೃಥ್ವಿಕ್ ಶಂಕರ್, ತಹಶೀಲ್ದಾರ್ ಎಚ್.ಎ. ಸರಕಾವಸ್, ಡಿವೈಎಸ್‍ಪಿ ಜಾವೇದ್ ಇನಾಮದಾರ್, ನಗರಸಭೆ ಪೌರಾಯುಕ್ತ ಬಸವರಾಜ ಟಣಕೆದಾರ್, ಪಿಐ ಉಮೇಶ ನಾಯಕ ಉಪಸ್ಥಿತರಿದ್ದರು.

ಘಟನೆ ಹಿನ್ನೆಲೆ: 7 ತಿಂಗಳ ಹಿಂದೆ ದಲಿತ ಸಂಘಟನೆಗಳು ಅಂಬೇಡ್ಕರ್ ವೃತ್ತದ ಹಿಂದಿ ಜಾಗದಲ್ಲಿ ನೀಲಿ ಧ್ವಜ ಹಾಕಿದ್ದರು. ಅಲ್ಲಿ ಅಂಬೇಡ್ಕರ್ ಗ್ರಂಥಾಲಯ ಮತ್ತು ಉದ್ಯಾನಕ್ಕೆ ಜಾಗ ಮಂಜೂರು ಮಾಡುವಂತೆ ಆಗ್ರಹಿಸಿದ್ದರು.

ಪ್ರಭು ಕಾಲೇಜಿನವರು ತಮ್ಮ ಸ್ಥಳದಲ್ಲಿ ಧ್ವಜ ಹಾಕಲಾಗಿದೆ ಎಂದು ತೆರವು ಗೊಳಿಸಿದಾಗ ವಿವಾದ ಆರಂಭವಾಯಿತು. ಮತ್ತೆ ನೀಲಿ ಧ್ವಜ ಹಾಕಿ ಭೂಮಿ ಮಂಜೂರಿಗೆ 192 ದಿನಗಳಿಂದ ನಿರಂತರ ಧರಣಿ ನಡೆಸಿದರು.

ವಾಲ್ಮೀಕಿ ಸಂಘಟನೆಯವರು ನೀಲಿ ಧ್ವಜದ ಅನತಿ ದೂರದಲ್ಲಿ ಕೇಸರಿ ಧ್ವಜ ಹಾಕಿ ನಮಗೂ ನಾಲ್ವಡಿ ರಾಜಾ ವೆಂಕಟಪ್ಪನಾಯಕ ಹೆಸರಿನಲ್ಲಿ ಉದ್ಯಾನ ನಿರ್ಮಿಸಲು ಸ್ಥಳ ಮಂಜೂರು ಮಾಡುವಂತೆ ಹೋರಾಟ ನಡೆಸಿದ್ದರು.

ಪ್ರಭು ಕಾಲೇಜಿನ ಮೈದಾನದ ಪಕ್ಕ ಸರ್ಕಾರಿ ಜಾಗವಿದೆಯೆಂದು ತಾಲ್ಲೂಕು ಆಡಳಿತ ಸರ್ವೆ ಮಾಡಿ ಗುರುತಿಸಲಾಯಿತು. ಕೆಲ ದಿನಗಳ ಹಿಂದೆ ಜಿಲ್ಲಾಧಿಕಾರಿ ಎರಡು ಬಣಗಳಿಗೆ ತಲಾ 10 ಗುಂಟೆ 8 ಆಣೆ ಭೂಮಿ ಮಂಜೂರು ಆದೇಶ ನೀಡಿದರು.

ಆದರೆ ಸಾಮೂಹಿಕ ಸಂಘಟನೆಗಳು ಎರಡು ಬಣಗಳಿಗೆ ನೀಡಿದ ಭೂಮಿ ಮಂಜೂರು ಆದೇಶ ರದ್ದು ಪಡಿಸಬೇಕು. ಧ್ವಜ ತೆರವುಗೊಳಿಸಬೇಕು. ದಲಿತ ಸಂಘಟನೆಯವರು ಧರಣಿಗಾಗಿ ಹಾಕಿದ ಟೆಂಟ್ ತೆರವುಗೊಳಿಸಬೇಕೆಂದು ಮೂರು ದಿನಗಳಿಂದ ಗಾಂಧಿ ವೃತ್ತದಲ್ಲಿ ನಿರಂತರ ಧರಣಿ ನಡೆಸಿದ್ದರು.