ರಾಹುಲ್‌ ಗಾಂಧಿ ನಾಮಪತ್ರ ಕ್ರಮಬದ್ಧ

ಅಮೇಠಿ: ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರು ಅಮೇಠಿ ಲೋಕಸಭಾ ಕ್ಷೇತ್ರದಿಂದ ಸ್ಪರ್ಧಿಸಲು ಸಲ್ಲಿಸಿರುವ ನಾಮಪತ್ರ ಕ್ರಮಬದ್ಧವಾಗಿದೆ ಎಂದು ಅಲ್ಲಿನ ಚುನಾವಣಾಧಿಕಾರಿ ರಾಮ್‌ಮನೋಹರ್ ಮಿಶ್ರಾ ಹೇಳಿದ್ದಾರೆ.

ಪೌರತ್ವ ಮತ್ತು ಇತರ ವಿಚಾರಗಳಲ್ಲಿ ರಾಹುಲ್‌ ಅವರು ಸಲ್ಲಿಸಿರುವ ನಾಮಪತ್ರದ ವಿವರಗಳು ತಾಳೆಯಾಗುವುದಿಲ್ಲ ಎಂದು ಪಕ್ಷೇತರ ಅಭ್ಯರ್ಥಿ ಧ್ರುವಲಾಲ್‌ ಎತ್ತಿರುವ ಆಕ್ಷೇಪಗಳನ್ನು ಚುನಾವಣಾಧಿಕಾರಿ ತಳ್ಳಿ ಹಾಕಿದ್ದಾರೆ.

ರಾಹುಲ್‌ ಅವರು ಹೂಡಿಕೆ ಮಾಡಿರುವ ಬ್ರಿಟನ್‌ ಕಂಪನಿಯಲ್ಲಿ ಅವರು ಬ್ರಿಟನ್‌ ಪ್ರಜೆ ಎಂದು ಉಲ್ಲೇಖಿಸಲಾಗಿದೆ ಎಂದು ಧ್ರುವಲಾಲ್‌ ಮತ್ತು ಇತರ ಮೂವರು ದೂರು ಸಲ್ಲಿಸಿದ್ದರು. ಅವರ ವಿದ್ಯಾರ್ಹತೆ ಬಗೆಗಿನ ಮಾಹಿತಿಯೂ ಸರಿಯಾಗಿಲ್ಲ ಎಂದು ದೂರಿನಲ್ಲಿ ಹೇಳಲಾಗಿತ್ತು. ಈ ಬಗ್ಗೆ ವಿವರಣೆ ನೀಡುವಂತೆ ರಾಹುಲ್‌ ಅವರಿಗೆ ಸೂಚಿಸಲಾಗಿತ್ತು.