ಯಾವ ನಿಯಮ ಉಲ್ಲಂಘಿಸಿದ್ದಕ್ಕೆ ‘ಲಾಕ್‌’ ಶಿಕ್ಷೆ: ಎಕ್ಸ್‌ಗೆ ನಟ ಅನುಪಮ್ ಖೇರ್

ಮುಂಬೈ: ತಮ್ಮ ಎಕ್ಸ್‌ ಖಾತೆಯನ್ನು ತಾತ್ಕಾಲಿಕವಾಗಿ ಅಮಾನತುಗೊಳಿಸಿದ್ದ ಬಗ್ಗೆ ಬಾಲಿವುಡ್ ನಟ ಅನುಪಮ್ ಖೇರ್‌ ಅವರು ಅಸಮಾಧಾನ ವ್ಯಕ್ತಪಡಿಸಿದ್ದು, ನನ್ನ ಯಾವ ಪೋಸ್ಟ್ ನಿಮ್ಮ(ಎಕ್ಸ್‌) ನಿಯಮವನ್ನು ಉಲ್ಲಂಘಿಸಿದೆ ತಿಳಿಸಿ ಎಂದು ‘ಎಕ್ಸ್‌’ನಲ್ಲಿಯೇ ಕೇಳಿದ್ದಾರೆ.

ನನ್ನ ಖಾತೆ ಲಾಕ್‌ ಆಗಿರುವ ಬಗ್ಗೆ ಸೂಚನೆ ಬಂದಿರುವುದು ಕಂಡು ಆಶ್ಚರ್ಯವಾಯಿತು ಎಂದಿರುವ ಅವರು, ಯಾವಾಗಿನಿಂದ ಹೀಗಾಯಿತು ಎಂಬ ಬಗ್ಗೆ ಸ್ಪಷ್ಟತೆಯಿಲ್ಲ ಎಂದು ಹೇಳಿದ್ದಾರೆ.

‘ಈಗ ನನ್ನ ಖಾತೆಯನ್ನು ಮರುಸ್ಥಾಪಿಸಲಾಗಿದ್ದರೂ ‘ಲಾಕ್‌’ ಆಗಿರುವ ಬಗ್ಗೆ ನನಗೆ ಉತ್ತರಬೇಕಿದೆ. 2007ರಿಂದ ನಾನು ಎಕ್ಸ್‌ ಖಾತೆ ಬಳಸುತ್ತಿದ್ದೇನೆ. ಆಗಿನಿಂದ ಸಾಮಾಜಿಕ ಮಾಧ್ಯಮ ವೇದಿಕೆಯ ನಿಯಮಗಳು ಮತ್ತು ಹಕ್ಕುಸ್ವಾಮ್ಯದ ಬಗ್ಗೆ ಎಚ್ಚರ ವಹಿಸುತ್ತಾ ಬಂದಿದ್ದೇನೆ. ನನ್ನ ಯಾವ ಪೋಸ್ಟ್ ನಿಮ್ಮ ನಿಯಮವನ್ನು ಉಲ್ಲಂಘಿಸಿದೆ ಎಂದು ತಿಳಿದುಕೊಳ್ಳುವ ಇಂಗಿತವಿದೆ’ ಎಂದು ಅನುಪಮ್ ಖೇರ್ ಅವರು ‘ಎಕ್ಸ್‌’ ಒಡೆಯ ಎಲಾನ್‌ ಮಸ್ಕ್‌ ಅವರನ್ನು ಟ್ಯಾಗ್ ಮಾಡಿದ್ದಾರೆ.

ಪೋಸ್ಟ್ ಜೊತೆಗೆ ಖಾತೆ ಲಾಕ್‌ ಆಗಿದೆ ಎಂದು ಹೇಳುವ ಸಂದೇಶದ ಸ್ಕ್ರೀನ್‌ ಶಾಟ್‌ ಫೋಟೋವನ್ನು ಲಗತ್ತಿಸಿದ್ದಾರೆ.