ಮದುವೆಗೆ ಸಜ್ಜಾದ ದೀಪಿಕಾ ಪಡುಕೋಣೆ ಸಹೋದರಿ ಅನಿಶಾ: ವರ ಯಾರು?

ಮುಂಬೈ: ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಅವರ ಸಹೋದರಿ ಅನಿಶಾ ಪಡುಕೋಣೆ ಅವರು ಸದ್ಯದಲ್ಲಿಯೇ ದುಬೈ ಮೂಲದ ಉದ್ಯಮಿ ರೋಹನ್ ಆಚಾರ್ಯ ಅವರನ್ನು ವಿವಾಹವಾಗಲಿದ್ದಾರೆ ಎಂದು ಸುದ್ದಿಸಂಸ್ಥೆ ‘ಡೆಕ್ಕನ್‌ ಕ್ರಾನಿಕಲ್’ ವರದಿ ಮಾಡಿದೆ.

ರೋಹನ್‌ ಆಚಾರ್ಯ ಅವರ ಕುಟುಂಬವು ದೇವಲ್‌ ಕುಟುಂಬದೊಂದಿಗೆ ಸಂಪರ್ಕ ಹೊಂದಿದ್ದು, ರೋಹನ್‌ ಸಹೋದರಿ ದಿಶಾ ಅವರು ಸನ್ನಿ ದೇವಲ್‌ ಅವರ ಮಗ ಕರಣ್‌ ದೇವಲ್‌ ಅವರನ್ನು ವಿವಾಹವಾಗಿದ್ದಾರೆ. ಈ ವಿವಾಹವು ಪಡುಕೋಣೆ ಮತ್ತು ದೇವಲ್‌ ಕುಟುಂಬವನ್ನು ಬೆಸೆಯಲಿದೆ.

ಹಲವು ವರ್ಷಗಳಿಂದ ಸ್ನೇಹಿತರಾಗಿರುವ ಅನಿಶಾ ಮತ್ತು ರೋಹನ್ ಅವರು ತಮ್ಮ ಖಾಸಗಿ ಜೀವನದ ಬಗ್ಗೆ ಗೋಪ್ಯತೆ ಕಾಪಾಡಿಕೊಂಡಿದ್ದಾರೆ. ದೀಪಿಕಾ ಮತ್ತು ರಣವೀರ್ ಸಿಂಗ್ ಅವರಿಗೂ ರೋಹನ್‌ ಆತ್ಮೀಯರಾಗಿದ್ದು, ಇನ್‌ಸ್ಟಾಗ್ರಾಂನಲ್ಲಿ ಒಬ್ಬರನ್ನೊಬ್ಬರು ಫಾಲೊ ಮಾಡುತ್ತಿದ್ದಾರೆ.

ಸದ್ಯದಲ್ಲಿಯೇ ಪಡುಕೋಣೆ ಕುಟುಂಬ ಈ ವಿಷಯವನ್ನು ಬಹಿರಂಗಗೊಳಿಸುವ ಸಾಧ್ಯತೆಯಿದೆ ಎಂದು ವರದಿ ತಿಳಿಸಿದೆ.

ಟಿಎಲ್‌ಎಲ್‌ಎಲ್‌(ದ ಲೈವ್ ಲವ್ ಲಾಫ್‌ ಫೌಂಡೇಶನ್‌) ಸಂಸ್ಥೆಯಲ್ಲಿ ಸಿಇಒ ಆಗಿರುವ ಅನಿಶಾ ಅವರು ಮಾನಸಿಕ ಆರೋಗ್ಯದ ಬಗ್ಗೆ ಜಾಗೃತಿ ಮೂಡಿಸುವ ಕೆಲಸ ಮಾಡುತ್ತಿದ್ದಾರೆ.