‘ತಾಯಿಗೆ ತಕ್ಕ ಮಗ’ ಸೆಲ್ಫಿ ಸ್ಪರ್ಧೆ

ನಟ ಅಜಯ್ ರಾವ್ ಅಭಿನಯದ ‘ತಾಯಿಗೆ ತಕ್ಕ ಮಗ’ ಸಿನಿಮಾ ತೆರೆಗೆ ಬರಲು ಸಜ್ಜಾಗಿದ್ದು, ಈಗಾಗಲೇ ಬಿಡುಗಡೆಗೊಂಡಿರುವ ಅದರ ಹಾಡುಗಳು ಜನರ ಬಾಯಲ್ಲಿ ಪದೇ ಪದೇ ಗುನುಗುತ್ತಿವೆ.

ತಾಯಿ ಮಗನ ಸೆಂಟಿಮೆಂಟ್ ಕಥಾಹಂದರವುಳ್ಳ ಈ ಸಿನಿಮಾದ ಪ್ರಚಾರ ಕಾರ್ಯ ಈಗಾಗಲೇ ಶುರು ಮಾಡಿರುವ ಚಿತ್ರತಂಡ, ‘ತಾಯಿಗೆ ತಕ್ಕ ಮಗ ಸೆಲ್ಫಿ’ ಸ್ಪರ್ಧೆ ಆಯೋಜಿಸಿದೆ. ತಮ್ಮ ತಾಯಿಯೊಂದಿಗೆ ಸೆಲ್ಪಿ ತೆಗೆದುಕೊಂಡ ಫೋಟೊವನ್ನು ಸಾರ್ವಜನಿಕರು ವಾಟ್ಸ್‌ಆ್ಯಪ್‌ ಮೂಲಕ ಚಿತ್ರತಂಡಕ್ಕೆ ಕಳುಹಿಸಿಕೊಡಬೇಕು.

ಅಂದಹಾಗೇ ಈ ಸೆಲ್ಫಿ ಸ್ಪರ್ಧೆಯಲ್ಲಿ ನಾಲ್ಕು ಬಹುಮಾನಗಳಿದ್ದು, ಮೊದಲ ಬಹುಮಾನ ₹ 50 ಸಾವಿರ, ಎರಡನೆಯ ಬಹುಮಾನ ₹ 25 ಸಾವಿರ, ಮೂರನೇ ಬಹುಮಾನ ₹ 15 ಸಾವಿರ ಹಾಗೂ ನಾಲ್ಕನೆಯ ಬಹುಮಾನ ₹ 10 ಸಾವಿರ. ನವೆಂಬರ್ 2ರ ಒಳಗೆ ಸೆಲ್ಫಿ ಫೋಟೊಗಳನ್ನು ಸಾರ್ವಜನಿಕರು ಕಳುಹಿಸಿಕೊಡಬೇಕು.

ಸಿನಿಮಾದ ನಿರ್ದೇಶಕ ಶಶಾಂಕ್, ‘ಸೆಲ್ಫಿ ಕಾಂಟೆಸ್ಟ್! ಅಮ್ಮನಿಗೆ ಕೊಡಿ ₹ 50 ಸಾವಿರ ಗಿಫ್ಟ್. ನಿಮ್ಮ ಅಮ್ಮನ ಜೊತೆ ಸೆಲ್ಫಿ ತೆಗೆದು7338259619ಗೆ ವಾಟ್ಸ್‌ಆ್ಯಪ್ ಮಾಡಿ’ ಎಂದು ಟ್ವಿಟರ್‌ನಲ್ಲಿ ಬರೆದುಕೊಂಡಿದ್ದಾರೆ. ಚಿತ್ರದಲ್ಲಿ ಅಜಯ್ ರಾವ್‌ಗೆ ಜೋಡಿಯಾಗಿ ಅಶಿಕಾ ರಂಗನಾಥ್ ನಟಿಸಿದ್ದು, ಅಜಯ್ ತಾಯಿಯ ಪಾತ್ರದಲ್ಲಿ ಸುಮಲತಾ ಅಂಬರೀಷ್ ಬಣ್ಣ ಹಚ್ಚಿದ್ದಾರೆ. ಅಜಯ್‌ಗೆ ಇದು 25ನೇ ಸಿನಿಮಾ.