ಮಾವಿನ ಹಣ್ಣಿನ ಕ್ಯಾಪಚಿನೊ

ಬೇಸಿಗೆಕಾಲ ಬಂತೆಂದರೆ ಮಾವಿನಹಣ್ಣಿನ ಸುಗ್ಗಿ ಆರಂಭವಾಗುತ್ತದೆ. ಈ ಸಮಯದಲ್ಲಿ ಮಾರುಕಟ್ಟೆಯಲ್ಲಿ ಎಲ್ಲಿ ನೋಡಿದರೂ ಮಾವಿನಹಣ್ಣಿನದ್ದೇ ಕಾರುಬಾರು.

ಮಾವಿನಹಣ್ಣಿನಲ್ಲಿ ಅನೇಕ ಬಗೆಯ ಖಾದ್ಯಗಳನ್ನು ತಯಾರಿಸಬಹುದು. ಮಾವಿನ ಜ್ಯೂಸ್‌, ರಸಾಯನದ ಜೊತೆಗೆ ಕ್ಯಾಪಚಿನೊ ಕೂಡ ಇಂದಿನ ಟ್ರೆಂಡ್‌. ಮಾವಿನಹಣ್ಣಿನ ಕ್ಯಾಪಿಚಿನೊವನ್ನು ಮನೆಯಲ್ಲೂ ತಯಾರಿಸಿ ಸವಿಯಬಹುದು.

ಬೇಕಾಗುವ ಸಾಮಗ್ರಿಗಳು

ಕಳಿತ ಮಾವಿನಹಣ್ಣು – 2
ತೆಂಗಿನಹಾಲು – 50 ಮಿಲಿ ಲೀಟರ್‌
ಮೆಣಸು – 1
ಕಂದು ಸಕ್ಕರೆ – 50ಗ್ರಾಂ
ಕಂದು ಉಪ್ಪು – 20 ಗ್ರಾಂ
ನಿಂಬೆರಸ – 4 ಚಮಚ
ಜೀರಿಗೆಪುಡಿ – 10 ಗ್ರಾಂ
ಐಸ್ ತುಂಡುಗಳು – 3 ರಿಂದ 4
ಪುದಿನ ಸೊಪ್ಪು – ಅಲಂಕರಿಸಲು

ತಯಾರಿಸುವ ವಿಧಾನ: ಮಾವಿನಹಣ್ಣನ್ನು ಸಿಪ್ಪೆ ತೆಗೆದು ಚಿಕ್ಕದಾಗಿ ಕತ್ತರಿಸಿಕೊಳ್ಳಿ. (ಒಂದಿಷ್ಟು ತುಂಡುಗಳನ್ನು ಅಲಂಕರಿಸಲು ತೆಗೆದಿಡಿ). ಉಳಿದ ತುಂಡುಗಳನ್ನು ತೆಂಗಿನಹಾಲು, ಮೆಣಸಿನಕಾಯಿ, ಕಂದು ಸಕ್ಕರೆ, ಉಪ್ಪು ಹಾಗೂ ಐಸ್‌ ತುಂಡುಗಳನ್ನು ಸೇರಿಸಿ ರುಬ್ಬಿಕೊಳ್ಳಿ. ಆ ಮಿಶ್ರಣಕ್ಕೆ ನಿಂಬೆರಸ ಹಾಗೂ ಜೀರಿಗೆಪುಡಿ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಒಂದು ಗ್ಲಾಸ್ ತೆಗೆದುಕೊಂಡು ಮುಕ್ಕಾಲು ಗ್ಲಾಸ್ ಮಾವಿನರಸ ಸುರಿಯಿರಿ. ಅದರ ಮೇಲೆ ತೆಂಗಿನಹಾಲು ಸುರಿಯಿರಿ. ನಂತರ ಮಾವಿನಹಣ್ಣಿನ ತುಂಡು ಹಾಗೂ ಪುದಿನಸೊಪ್ಪಿನಿಂದ ಅಲಂಕರಿಸಿದರೆ ಮಾವಿನಹಣ್ಣಿನ ಕ್ಯಾ‍ಪಚಿನೊ ಸವಿಯಲು ರೆಡಿ.