ಸಕ್ಕರೆ ಕಾಯಿಲೆಯ ಆರಂಭಿಕ ಲಕ್ಷಣಗಳು: ಗಂಭೀರವಾಗುವ ಮುನ್ನ ಎಚ್ಚೆತ್ತುಕೊಳ್ಳಿ
ರಕ್ತದಲ್ಲಿ ಸಕ್ಕರೆ ಅಂದರೆ ‘ಮಧುಮೇಹ’ದ ಮಟ್ಟ ಹೆಚ್ಚಾಗುವ ತಿಂಗಳಿಗೂ ಮುನ್ನ ಅಥವಾ ವರ್ಷಗಳಿಗೂ ಮೊದಲೇ ದೇಹ ಹಲವು ಸೂಚನೆಗಳನ್ನು ಕೊಡುತ್ತದೆ. ಈ ಸಂಕೇತಗಳನ್ನು ಸರಿಯಾಗಿ ಅರ್ಥ ಮಾಡಿಕೊಂಡರೆ ತಡವಾಗುವ ಮೊದಲು ಮಧುಮೇಹ ಪತ್ತೆ ಹಚ್ಚಿ ಜೀವನಶೈಲಿ ಬದಲಿಸಿಕೊಳ್ಳಬಹುದು.
ಹೆಚ್ಚು ದಾಹವಾಗುವುದು: ಮಧುಮೇಹದ ಪ್ರಾಥಮಿಕ ಸೂಚನೆಗಳಲ್ಲಿ ನಿರಂತರ ದಾಹ ಮೊದಲನೆಯದು. ಸಾಕಷ್ಟು ನೀರು ಕುಡಿದರೂ ಬಾಯಾರಿಕೆ ತೀರದು. ಗಂಟಲು ಒಣಗಿದಂತೆ ಭಾಸವಾಗುತ್ತದೆ. ರಕ್ತದಲ್ಲಿನ ಸಕ್ಕರೆ ಮಟ್ಟ ಏರಲು ಶುರುವಾದಾಗ ಮೂತ್ರಪಿಂಡ ಹೆಚ್ಚು ಕೆಲಸ ಮಾಡುತ್ತದೆ. ಇದು ಮೂತ್ರದ ಮೂಲಕ ಹೆಚ್ಚುವರಿ ಸಕ್ಕರೆಯನ್ನು ಹೊರಹಾಕಲು ಪ್ರಯತ್ನಿಸುತ್ತದೆ. ಈ ಕಾರಣಕ್ಕಾಗಿ ಹೆಚ್ಚು ಹೆಚ್ಚು ದಾಹವಾಗುತ್ತದೆ.
ಹೆಚ್ಚು ಬಾರಿ ಮಲಮೂತ್ರಕ್ಕೆ ಹೋಗುವುದು: ಸಾಮಾನ್ಯಕ್ಕಿಂತ ಹೆಚ್ಚು ಬಾರಿ ಶೌಚಾಲಯಕ್ಕೆ ಹೋಗಬೇಕಾಗುತ್ತದೆ. ವಿಶೇಷವಾಗಿ ರಾತ್ರಿ 2 ರಿಂದ 4 ಬಾರಿ ಮೂತ್ರ ವಿಸರ್ಜನೆ ಮಾಡುತ್ತಿದ್ದರೆ ಇದು ಪ್ರಮುಖ ಸೂಚನೆ.
ಹಠಾತ್ ಹಸಿವು: ಹೆಚ್ಚಿನ ಪ್ರಮಾಣದಲ್ಲಿ ಹಸಿವಾಗುವುದು. ಊಟ ಮುಗಿಸಿದ ತಕ್ಷಣ ಮತ್ತೆ ಏನಾದರೂ ತಿನ್ನಬೇಕು ಅನಿಸುವುದು ಅನಿಸುವುದು
ತೂಕ ಇಳಿಕೆ: ಮಧುಮೇಹಕ್ಕೆ ಮುಂಚೆ ಎಲ್ಲರೂ ತೂಕ ಹೆಚ್ಚಿಸಿಕೊಳ್ಳುವುದಿಲ್ಲ. ಕೆಲವರು ವಿಪರೀತವಾಗಿ ತೂಕ ಇಳಿಕೆಯಾಗಬಹುದು. ವಿಶೇಷ ಡಯಟ್ ಅಥವಾ ವ್ಯಾಯಾಮ ಮಾಡದೆ ಇದ್ದರೂ, ತೂಕ ಕಡಿಮೆಯಾಗುತ್ತದೆ.
ಚರ್ಮದ ಮೇಲೆ ಕಪ್ಪು ಚುಕ್ಕೆಗಳು: ಕುತ್ತಿಗೆ ಭಾಗಗಳಲ್ಲಿ ಕಪ್ಪು ಅಥವಾ ಮೃದುವಾಗಿರುವ (ವೆಲ್ವೆಟ್‌ ತರ) ಚರ್ಮದ ಚುಕ್ಕೆಗಳು ಕಾಣಿಸಿಕೊಳ್ಳಬಹುದು. ಇದು ಇನ್ಸುಲಿನ್ ಸಮಸ್ಯೆಯ ಮೊದಲ ಸಂಕೇತವಾಗಿದೆ.
ಕೈಕಾಲು ಸುಟ್ಟಂತೆ ಭಾಸವಾಗುವುದು: ಕೆಲವರಿಗೆ ಕೈ ಅಥವಾ ಕಾಲುಗಳಲ್ಲಿ ಸುಡುವ ಅನುಭವವಾಗುತ್ತದೆ.
ದೃಷ್ಟಿ ಮಸುಕಾಗುವುದು: ಸಕ್ಕರೆ ಮಟ್ಟದ ಏರಿಳಿತ ಕಣ್ಣಿನ ಅಸಮತೋಲನಕ್ಕೆ ಕಾರಣವಾಗಬಹುದು. ಇದು ದೃಷ್ಟಿ ಮಸುಕಾಗುವಂತೆ ಮಾಡಬಹುದು. ಕೆಲವೊಮ್ಮೆ ದೃಷ್ಟಿ ಸ್ಪಷ್ಟವಾಗಿ ಕಾಣುವುದು, ಕೆಲವೊಮ್ಮೆ ಮಸುಕಾಗುವುದು.
ಗಾಯಗಳು ನಿಧಾನವಾಗಿ ಗುಣವಾಗುವುದು: ಸಣ್ಣ ಗಾಯಗಳು ಗುಣವಾಗಲು ಸಾಮಾನ್ಯ ಸಮಯಕ್ಕಿಂತ ಹೆಚ್ಚು ಸಮಯ ತೆಗೆದುಕೊಂಡರೆ ಇದು ಎಚ್ಚರಿಕೆಯಾಗಿದೆ.
ಅಲರ್ಜಿ: ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಹೆಚ್ಚಿದಾಗ ದೇಹಕ್ಕೆ ಅಲರ್ಜಿಯಾಗುವ ಸಾಧ್ಯತೆ ಹೆಚ್ಚುತ್ತದೆ.
(ಡಾ. ಎಸ್. ಸತೀಶ್ ಕುಮಾರ್, ಎಚ್‌ಒಡಿ ಮತ್ತು ಪ್ರಮುಖ ಸಲಹೆಗಾರರು, ಮಧುಮೇಹ ಮತ್ತು ಬಾರಿಯಾಟ್ರಿಕ್ ಔಷಧ, ಆಸ್ಟರ್ ಆರ್‌ವಿ ಆಸ್ಪತ್ರೆ)
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.