ಕೊರೊನಾ ಒಂದಿಷ್ಟು ತಿಳಿಯೋಣ | ಚಳಿಗಾಲ: ಇರಲಿ ಕಾಳಜಿ

ಮಂಗಳೂರು: ಚಳಿಗಾಲ ಶುರುವಾಗಿದೆ. ಅದರ ಜೊತೆಗೆ ಕೊರೊನಾ ಸೋಂಕು ಹೆಚ್ಚಾಗಬಹುದು ಎಂಬ ಭಯ ಬಹುತೇಕರಲ್ಲಿ ಕಾಡುತ್ತಿದೆ. ಸಾಮಾನ್ಯವಾಗಿ ವೈರಸ್‌ಗಳು ಚಳಿಯ ವಾತಾವರಣದಲ್ಲಿ ಹೆಚ್ಚು ಸಕ್ರಿಯವಾಗುತ್ತವೆ. ಹಾಗೆಯೇ ಚಳಿಯಿಂದಾಗಿ ಆಸ್ತಮಾ ಮತ್ತಿತರ ಶ್ವಾಸಕೋಶ ಸಂಬಂಧ ಸಮಸ್ಯೆಗಳು ತೀವ್ರವಾಗುವ ಸಾಧ್ಯತೆಯೂ ಇರುತ್ತದೆ.

ಚಳಿಗಾಲದಲ್ಲಿ ಯಾವ ರೀತಿ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಬೇಕು ಎಂಬ ಬಗ್ಗೆಯೂ ಹಲವರಲ್ಲಿ ಗೊಂದಲಗಳಿವೆ. ಈ ಬಗ್ಗೆ ಮಂಗಳೂರಿನ ಯೆನೆಪೋಯ ಆಸ್ಪತ್ರೆಯ ವೈದ್ಯ (ಜನರಲ್‌ ಮೆಡಿಸಿನ್‌) ಡಾ. ಸಂತೋಷ್‌ ಆರ್‌.ಜಿ ವಿವರ ನೀಡಿದ್ದಾರೆ.

ಚಳಿಗಾಲದ ವಾತಾವರಣದಲ್ಲಿ ಎಲ್ಲ ರೀತಿಯ ವೈರಸ್‌ಗಳು ಜಾಗೃತಗೊಳ್ಳುತ್ತವೆ ಮತ್ತು ಹೆಚ್ಚು ಕಾಲ ಜೀವಿಸುತ್ತವೆ. ಹೀಗಾಗಿ ಕೊರೊನಾ ಸೋಂಕು ಹೆಚ್ಚಾಗುವ ಸಾಧ್ಯತೆ ಇದೆ. ಎಲ್ಲ ವೈರಸ್‌ ಸೋಂಕುಗಳ ಲಕ್ಷಣ ಸಾಮಾನ್ಯವಾಗಿ ಒಂದೇ ಆಗಿರುವುದರಿಂದ, ಕೋವಿಡ್–19 ಪತ್ತೆ ಮಾಡಲು ತುಸು ಸಮಯ ಹಿಡಿಯಬಹುದು. ಹೀಗಾಗಿ ಸ್ವಯಂ ಜಾಗೃತಿಯೇ ಇದಕ್ಕೆ ದೊಡ್ಡ ಮದ್ದು ಎನ್ನುತ್ತಾರೆ ಡಾ. ಸಂತೋಷ್‌.