ಹಜಾರೆಗೆ ಸೋನಿಯಾ ತೀಕ್ಷ್ಣ ಪ್ರತ್ಯುತ್ತರ

ನವದೆಹಲಿ (ಪಿಟಿಐ): ತಮ್ಮ ಹೆಸರಿಗೆ ಕಳಂಕ ಹಚ್ಚುವ ಹೇಳಿಕೆ ನೀಡುತ್ತಿರುವ ಕಾಂಗ್ರೆಸ್ ನಾಯಕರ ವರ್ತನೆ ಬಗೆಗೆ ಸೋನಿಯಾ ಗಾಂಧಿ ಅವರಿಗೆ ಹಜಾರೆ ಅವರು ಬರೆದಿದ್ದ ಪತ್ರಕ್ಕೆ ಸೋನಿಯಾ ಖಾರವಾಗಿಯೇ ಪ್ರತಿಕ್ರಿಯಿಸಿದ್ದಾರೆ.

ತಾನು ತನ್ನ ಅಭಿಪ್ರಾಯಗಳನ್ನು ಈ ಹಿಂದಿನ ಪತ್ರದಲ್ಲಿಯೇ ತಿಳಿಸಿದ್ದೇನೆ ಎಂದಷ್ಟೇ ಸೋನಿಯಾ ಅವರು ತೀಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ.

~ನಿಮ್ಮ 9 ಜೂನ್ 2011ರ ಪತ್ರ ನನಗೆ ತಲುಪಿದೆ. ನಾನು ದೆಹಲಿಯಲ್ಲಿ ಇರದಿದ್ದುದರಿಂದ ಉತ್ತರಿಸಲಾಗಲಿಲ್ಲ~ ಎಂದು ಹೇಳಿರುವ ಸೋನಿಯಾ, ~ಯಾರ ವಿರುದ್ಧವೂ ಕಳಂಚ ಹಚ್ಚುವ ಪ್ರಚಾರಕ್ಕೆ ನಾನು ವಿರುದ್ಧವಾಗಿದ್ದೇನೆ~ ಎಂಬುದಾಗಿ ಬರೆದ ಎಪ್ರಿಲ್ 19ರ ಪತ್ರವನ್ನು ಉಲ್ಲೇಖಿಸಿ ಅದರಲ್ಲೇ ತನ್ನ ನಿಲುವನ್ನು ತಿಳಿಸಿರುವುದಾಗಿ ಹೇಳಿದ್ದಾರೆ.

ಕಾಂಗ್ರೆಸ್ ಪಕ್ಷದ ಮಾಧ್ಯಮ ವಿಭಾಗದ ಜನಾರ್ದನ ದ್ವಿವೇದಿ ಅವರು ಹಜಾರೆ ಅವರು ಆರ್ಎಸ್ಎಸ್ ಸಂಘಟನೆಯ ಮುಖವಾಡ ಎಂದು ಜರೆದಿದ್ದನ್ನು ಪ್ರಶ್ನಿಸಿದ್ದ ಹಜಾರೆ ಅವರು ಸೋನಿಯಾ ಅವರಿಗೆ ಈ ಆರೋಪವನ್ನು ಸಾಬೀತು ಮಾಡುವಂತೆ ಪತ್ರ ಬರೆದಿದ್ದರು.

ತಮ್ಮ ಹೆಸರಿಗೆ ಕಳಂಕ ಹಚ್ಚುವ ಇಂತಹ ಅಪಪ್ರಚಾರಗಳನ್ನು ಕಾಂಗ್ರೆಸ್ ಪಕ್ಷದ ಮುಖಂಡರು ಹಾಗೂ ಯುಪಿಎ ಯ ಸಚಿವರು ಮಾಡುತ್ತಿರುವುದು ತಮಗೆ ತೀವ್ರ ನೋವನ್ನುಂಟು ಮಾಡಿದೆ ಎಂದು ಹಜಾರೆ ಪತ್ರದಲ್ಲಿ ತಿಳಿಸಿದ್ದರು.